Orɔm 16

1À n'â yǎl a ce á lwar bə̀ wɔ́ àmyɛ́ cìcì à twĩ̀ nə́ nəkɔ́ Febe á sõ. Ń ŋwɛ́nɛ́ Kristə-lyì gùlú w Shənkəre né mó wẽ́ ń nə́ ń twĩ̀. 2Zwẽnə ń zhəəlé Cinu yil lé yilə, ǹdə Kristə-lyì gə́ mə̌ sə bə wɛ̀rhɛ́ nɛ́. Ń gə zhe kɔn tum á sõ gakó, s'á sɛ̃ mɔ, bə̀ ń sɛ̃ lyì nánzhəzhɔ̌ nɛ, sə ń sɛ̃ àmyɛ́ nɛ kɔn du. 3Cenə Pərshii ǹdə́ Akəlaasɛ á pɛ̃. Bə̀ tó ne bə twĩ̀ Yezu Kristə tum dí. 4Bə̀ zhɔ̃̀ bə̀ myə̀lə́ né bə mé zwẽ à nyǎn dɛ́. È də̀ àmyɛ́ dúdú ni bə̀ wɛ̀rhɛ́ cɛ̀nɛ̀ yé. Bə̀ wɛ̀rhɛ́ cɛ̀nɛ̀ Kristə gùúlí lyì bí bə̀ də̀ Zhwifubá mó gakó myɛ nɛ. Rə̀myɛ́ ce, wɔ́ nə́ gakó nə́ r'é ce bə̀ nə̀báná. 5Cenə Kristə-lyì bí bə̀ n'ê gùlí dwã bə̀ sõ kɛ̀lɛ́ w mɔ́ myɛ á pɛ̃. Cenə à da-byǐ Epənɛɛtɛ. Wɔ́ ńmyɛ̌ ń yàl nã́yə́ə́ mó Azhi tənà y wẽ́ n zù Kristə. 6Cenə Marɛ, bə̀ ń twĩ̀ dɛ̃́dɛ̃́ n pə ába. 7Cenə Andəronikuusi ǹdə́ Zhənyaasɛ. Àmyɛ́ ǹdə́ bə̀myɛ́ wɔ́ dwí. Nə́ tó dwã nə́ twĩ̀ byə̀nə́-jì. Bə̀ jɛ̀rɛ̀ nɛ bə zù Kristə, sə bə̀ jǐrh ń tùntúmə́. Lyì bí n'ê zɔ̀m bə̀ yil náàcɛ̀nɛ́. 8Cenə Ampəlyətuusi. Ń wɔ́ à dɔwa Cinu wẽ́. 9Cenə nə́ tó-dõ Yərəbɛ̃ mɔ́ nə́ ga n'é twĩ̀ Kristə tum dí mú, e súlí nə́ da-byǐ nántwə̌ Sətəciisi. 10Cenə Apɛlɛsɛ. Ń tumə né n'ê byili bə̀ ń zhí Kristə ne zhə̀nà. Cenə Arəsətobuuli kɛ̀lɛ́ y lyì bí. 11Cenə Erɔjɔɔnɛ. Àmyɛ́ ǹdə́ ńmyɛ wɔ́ dwí. Cenə Narshiisi kɛ̀lɛ́ y lyì bí byɛ̀bɛ́ bə̀ zù Cinu mú. 12Cenə Tərəfɛɛnɛ ǹdə́ Tərəfɔɔsɛ. Bə̀ twĩ̀ dɛ̃́dɛ̃́ Cinu yilə. Cenə à nəkɔ́ nántwə̌ Pərshiidi. Ńmyɛ twĩ̀ dɛ̃́dɛ̃́ Cinu yilə. 13Cenə Orofyiisi. Ń wɔ́ Cinu tùntùnnə̀ námpúm. Cenə ń ná mɔ́ myɛ, bə̀ ń ná mɔ́ wɔ́ nə́ ga ná. 14Cenə Asə̃kiriiti ǹdə́ Fələgɔ̃ ǹdə́ Erəmɛɛsɛ ǹdə́ Pətərəbaasɛ ǹdə́ Erəmaasɛ, e súlí nə́ da-byǎ bɛ́ dwã bɛ́ bə̀ ŋwɛ́nɛ́ bə̀ sõ mó. 15Cenə Shələlooge ǹdə́ Zhəli ǹdə́ Nere, e súlí ń nəkɔ́ mɔ́, ǹdə́ Olɛ̃paasɛ, e súlí Kristə-lyì bí dwã bɛ́ bə̀ ŋwɛ́nɛ́ bə̀ sõ mó gakó. 16Cenə dwã, á kwə̀ə̀lè dwã náàcɛ̀nɛ́ ǹdə da-byǎ ta. Kristə gùúlí gakó lyì bí n'ê ce ába. 17Da-byǎ, à n'â lwə̀l ába: dɛ̃̌na á cìn ǹdə́ lyì bí byɛ̀bɛ́ bə̀ n'ê zə pɔrá bə̀ twí mú. Lyì bí bə̀myɛ́ mɔ́ bə shɛ̀ kɔn dɛ́ dɛ̀bɛ́ bə̀ byili ába á zwẽ rə̀ nyí mú yò yé. Èta, bə̀ n'ê dwĩ̀ Kristə-lyì bí. Rə̀myɛ́ ce, á bə̀k'á tó bə̀ kùr yé. 18Lyì bí bə̀myɛ́ mɔ́ dwí rí t'â twĩ̀ nə́ Cinu Kristə yil yé. Wɔ́ bə̀ sə̀pwà sǔlné yil bə̀ n'ê twĩ̀. Bə̀ n'ê jə́jɛ̀rɛ́ lyì bí byɛ̀bɛ́ bə̀ bəbwàl nyí zõ mó ǹdə́ nyì-gwàl ǹdə́ zɔ̀m-fwààlɛ́ tɛ̀bɛ́ lyì bí só cilu mú. 19Lyì bí gakó yě b'ǎ n'á twĩ̀ ǹdə Cinu gə́ byili ní. Rə̀myɛ́ ce, à wu nyɛ̀ á yilə. Sə à n'â yǎl b'ǎ zə surhə á m'á twĩ̀ cɛ̀nɛ̀, s'á dɛ̃̀ á cìn twéé twéé á bə̀k'á zù lwɛlɛ wẽ́ yé. 20Kɔn k'ê t'â la dɔnɔ yé, Yi rí rə̀ n'ê pɛ yə̀-zùlə́ né mó bá zhìlì Shətana yò á nə̀rh kùr wə. Cinu Yezu mà n cĩ́ bwəl á yó! 21Timote mó àmyɛ́ ǹdə́ ńmyɛ̌ n'é twĩ̀ Cinu tum dí mú nə́ ń ce ába. Lushuusi ǹdə́ Zhasɔ̃ ǹdə́ Sɔsəpatɛɛrɛ myɛ n'ê ce ába, b'àmyɛ́ ǹdə́ bə̀myɛ́ wɔ́ dwí. 22Wɔ́ àmyɛ́ Tərəcuusi Pwəə ce a kɛ̃ sɛ́bɛ́ rɛ́ tɛ̀bɛ́, à n'â ce ába Cinu mú ń ce nə́ mù dwã nɛ́ mɔ́ yil lé yilə. 23Gəyuusi nə́ ń ce ába. Wɔ́ ńmyɛ̌ sõ à n'â zwɛ̃̀ nɛ́. Wɔ́ ńmyɛ̌ sõ byɛ̀bɛ́ bə̀ zù Kristə mó myɛ gakó n'ê gùlí dwã nɛ́. Eraasɛ mɔ́ ń nə́ ń nyǐ cɔ w sə̀byǐ mú yò mó ǹdə́ nə́ da-byǐ Kərətuusi n'ê ce ába. 24((Cinu Yezu Kristə mà n cĩ́ bwəl á gakó yó!)) 25Cèrhénə nə́ cèrhé Yi. Wɔ́ rə̀myɛ́ rə̀ wɔ̌ rə̀ bá tó Yezu Kristə yò-ècɔ̀nɔ̀ nyí rí à bwə̀l a byili ába mó dɛnnɛ rə ce á zhí mu kẽkẽ. Rə̀ tó yò-ècɔ̀nɔ̀ nyí rí rə̀myɛ́ mɔ́ dɛnnɛ rə byili kɔn dɛ̀bɛ́ rə̀ y'à shèè shãã ga mɔ́. 26Sə èlǎsɛ̃́, Yi nyì-zwennə bé byili kɔn dɛ́ rə̀myɛ́ mɔ́ kùr pamparɛ̃ɛ̃ bə̀ sábá nɛ́ wẽ́, ǹdə Yi rí rə̀ ŋwɛ́nɛ́ twéé twéé mó gə́ pɔ nyí ní, mùnì ga tənə̀rh dwí gakó lyì bí lwar rɛ, sə bə shɛ̀nɛ́ bə zwẽ nyí bə zù mù. 27Yi dúdú rə̀ wɔ́ surhə cə́bal. Bànà nə́ tó Yezu Kristə dɛnnɛ nə́ cèrhé re twéé twéé byinə nə̀ bə zhɔ̌ zhe yilə! Amɛ̀n!

will be added

X\