Markɛ 16

1Shìrhə́ dɛ̃ rɛ́ gə́ tú e lyɛ̃, Magədala lyì bə̀kɔ́ Marɛ, ǹdə́ Zhakɛ ná Marɛ, ǹdə́ Saləmɛ yè nǔrh sə̀ lwẽ́ nã́nyə̀nyɛ̀lɛ́, bə̀ la vò bə mé tùr Yezu. 2È zɛ̃̀ nəkɔkɔ́lɛ́ jə̀máásɛ́ yùwə̀, bə pyẽ̀ pyẽ̀ bə zɛ̃̀ ǹdə́ yi rí n'ê púrhə́, bə̀ la lú-bɔ̀l mɔ́ yó. 3Bə̀ y'à n'ê bwə̀rh dwã bə̀ zhe: "Mɔ̌ lò ń mà n byíbyílí lú-bɔ̀l mɔ́ nyí rí nə́kulu w n ce kwã nɛ́ n pə nə́ba?" 4Bə̀ la nyǔ bə pwírí nə́kulu w byíbyílí ò pyě sarh nɛ, o j'à y'à já dɛ̃́dɛ̃́. 5Bə yí bə zù lú-bɔ̀l mɔ́ wa, bə nə ébɔ́-dǎl mə̀dù ń zù kàmə̀-zù-èdɔ̀lɔ̀ námpõ̀ ń jě jə̀jĩ́ sõ. Ywẽ nánfɔ̀lɔ̀ zɛ̃̀ rə̀ zhe be. 6Ébɔ́-dǎl mɔ́ wɔ̀ bɛ: "Á bə̀k'á dùr ywẽ yé. Wɔ́ Nazarɛtɛ lyì bal Yezu mú bə̀ pəpa də̀-jɔrhɔ́ w yó mó á n'á pyà. Ń tɛ̀nɛ́ nyɔ̀nɔ̀ yé. Ń bwìrhì. Nyǐnə bə̀ gə́ y'à cĩ́ mu mə̀gã̌. 7Zhəlnə á byili Pyɛɛrɛ ǹdə́ Yezu kwã-lyì bí dwã bɛ́ nɛ bə̀ nyǐ ń tó yé n vò Gəlile. Wɔ́ gàà bə̀ má nə mɔ nɛ́, ǹdə ń gə́ yà ń byili bi ní." 8Kana bɛ́ zɛ̃̀ bə shí lú-bɔ̀l mɔ́ w bə du, bə dùr. Bə̀ y'à n'ê kəkə. Bə̀ k'ê yə̀l bə̀ gə́ n'ê wɛ̀rhɛ́ nɛ́ yé. Sə ywẽ dé gə́ y'à zhe be mó ce, bə̀ yə̀ lò lò nè wə̀l bə̀ kaka yé. [ 9Yezu bwìrhì shìrhə́ dɛ̃ rɛ́ zɛ̃̀ nəkɔkɔ́lɛ́ shãã shãã, n jɛ̀rɛ̀ n lyí Magədala lyì bə̀kɔ́ Marɛ. Wɔ́ ńmyɛ̌ nə̀cílsí námməlwǎlsɛ́ shàlpyɛ̀ y y'à zhe, Yezu zɛ̃̀ n jì sì mú. 10Yezu tó-dwã bɛ́ wun y'à zhìlì, bə̀ n'ê kúrhə́. Marɛ vò n byili bi kɔn dɛ̀bɛ́ rə̀ wɛ̀rhɛ́ mɔ́. 11Ń gə́ wò bè bə̀ Yezu bwìrhì, bə̀ ńmyɛ̌ nɔ mɔ, bə̀ yə̀ nyí zwẽ yé. 12Rə̀myɛ́ kwã nɛ́, Yezu lyə́r n kwè nyɔrhɔ dõ, n mə n lyí ń kwã-lyì bí bə̀lyè ǹdə́ bə̀ ŋwɛ́nɛ́ sɔ́má yó bə̀ la gɔ sono cə-byǐ èdù wẽ́. 13Bə ká kwɛ̃̀ bə bé byili bə̀ dwã bɛ́ nɛ, sə bə̀ yə̀ bə̀myɛ zɔ̀mà nɛ́ zwẽ yé. 14Yezu zɛ̃̀ n tà-kwã n lyí ń kwã-lyì bí shí ǹdə́ mə̀dù y ǹdə́ bə̀ n'ê jí kùjú. N ji bi búlə́, bə̀ gə́ yə̀ Yi ni zhí mú, ǹdə́ bə̀ gə́ yə̀ byɛ̀bɛ́ bə̀ nɔ mɔ ń bwìrhì mú zɔ̀mà nɛ́ zwẽ mó yilə. 15N zɛ̃̀ n wɔ̀ bɛ: "Zhəlnə lũ w púlə́púlə́ wə, á bwə̀l yò-ècɔ̀nɔ̀ nyí rí á byili lyì bí gakó ne. 16Lò mɔ̀bɔ́ ń zwẽ nyí bə zɛ̃̀ bə pɔ̃ nɛ̃̌-shɔ, rə̀-ná-cí mà n nə ń cìn vwǎrh, sə lò mɔ̀bɔ́ ń yə̀ nyí zwẽ, bə̀ má kə́ ń bùrsì bə pɔ̃ dóó. 17Nyǐnə màmyaarhɛ́ tɛ̀bɛ́ byɛ̀bɛ́ bə̀ la nyí zõ mó bá wɛ̀rhɛ́ mɔ́: bə̀ má jì nə̀cílsi námməlwǎlsɛ ǹdə́ àmyɛ́ yil lé. Bə̀ má zɔ̀m dwə́ dwã zɔ̀mà. 18Bə̀ gə zɔ dɔma bə̀ jɛ̀rh w myɛ, dɔma bɛ́ t'â la bɛ kaka wɔ̀rhɔ́ yé. Bə̀ gə nyɔ̀ cə́m mɔ̀bɔ́ mə̀ n'ê gwi lò myɛ, mə̀ t'â la bɛ kaka wɔ̀rhɔ́ yé. Bə̀ gə cĩ́ bə̀ jɛ̀rh nə̀bwànà yó, nə̀bwànà bɛ́ má wárh." 19Cinu Yezu gə́ zɔ̀m ǹdə́ ń kwã-lyì bí èta n zhɛ̀, Yi ce n zɛ̃̀ n vò dɛ̃̌ Arəzana wa, sə ń jě rə̀ jə̀jĩ́ ni. 20Ń kwã-lyì bí zhǐr bə vò bə bwə̀l yò-ècɔ̀nɔ̀ nyí rí jààsɛ́ gakó wə. Sə Cinu yà ń nə́ ń sɛ̃ bɛ tum dí rə̀myɛ́ wẽ́, ń nə́ ń tó màmyaarhɛ́ bə̀ n'ê wɛ̀rhɛ́ mɔ́ dɛnnɛ ń byili bə̀ yò-ècɔ̀nɔ̀ nyí rí bə̀ n'ê bwə̀l mó wɔ́ zhə̀nà.]

will be added

X\