Zhakɛ 5

1Èlǎsɛ̃́, ámyɛ̌ nə̀cɛ̀nà bɛ́, cilinə kɔn dɛ̀bɛ́ à la ába byilu mú: kúrhnə á wɔ́wɛ́lɛ́ zwini rí rə̀ bàn ába zal mɔ́ yilə. 2Á nə̀cɛ̀ndɛ́ dɛ̀rhɛ̀; cɔ̃́ jú á gàndɛ́. 3Á sánə́má mɔ́ ǹdə́ á wársɛ́ jú rə shɛ̀l. Sə rə̀ jú mú bá yə̀ zhə̀n-kɔn rə byili b'ǎ yə̀ cɛ̀nɛ̀ twĩ̀ yé. Mə̀ má jí ába ǹdə myǐn ta. Lũ w zhɔ̌ bwəlse, á j'ǎ gwẽ̌ n'á pyà nə̀cɛ̀ndɛ̀ á cĩ́ dɛ̃̌. 4Á kwè lyì bə jə̀r á cɛsɛ́, sə á yə̀ bɛ̀ kwɛ̃̌ yé. Bə̀ n'ê kúrhə́, sə lũ gakó cǐnnə mó nyɛ̀ɛ̀ bə̀ cələ né. 5Á pyà wu-nyɔ̃̀ dwí gakó cɛ yó, á jú kùjú á sú, á nù kɔn lyɛ̃ cɛ nɛ, á jǐrh ǹdə bə̀-tǎnsɛ bə̀ la gu ta. 6Á kɔ́ wu-cángá cìnə́ bùrsì á gu bi, bə̀ yə̀ cẽ yé. 7Da-byǎ, pyɛ́nɛ́na á cìn á m'á dɛ̃̀ Cinu twírí yə́. Nyǐnə vwàlnà gə́ ya n wɛ̀rhɛ́ nɛ́: ń nə́ ń dɛ̃̀ tɛ̀bɛ́ ń dù cɛ y wẽ́ mó byǎ náàcɛ̀nà; ń nə́ ń dɛ̃̀ dwà nã́yə́ə́ y ǹdə́ nánkwaá y ga ǹdə́ cìn-pyɔ́nɔ́. 8Ámyɛ pyɛ́nɛ́na á cìnə̀, s'á zə wu-jɔ̀, bə̀ Cinu twírí y bwəlse. 9Da-byǎ, á bə̀k'á zə ŋwɔ́ŋwɔ̌ ǹdə́ dwã yé, mùnì ga Yi bə̀ká kə́ á bùrsì rə pə ába dóó yé. Nyǐnə bùr-kárna mɔ́ ŋwɛ́nɛ́ bwə̀rə̀ y nyí ni. 10Da-byǎ, kwěnə Yi nyì-zwennə bé bə̀ zɔ̀m Cinu yil lé yil mó nà. Bə̀ shɛ̀nɛ́ bə pyɛ́nɛ́ bə̀ cìn bə nwɛ̀nɛ̀. 11Tɛ́rɛ́na lyì bí byɛ̀bɛ́ bə̀ shɛ̀nɛ́ nɔ̀nɔ̀ w mɔ́ yò. Nə́myɛ̌ n'é wə̀l bə̀ nyǐ bə̀ wɔ́ wu-nyɔ̃̀ cìnə́. Bə̀ zɔ̀m Zhɔɔbɛ wu-jɔ̀ w yò á nyɛ̀ɛ̀. Á yě kɔn dɛ́ dɛ̀bɛ́ Cinu pɔ mɔ rə̀myɛ́ kwã nɛ́ mɔ́. Cinu wɔ́ wu-bɔ̀nɔ̀ ǹdə́ nɔ̀nɔ̀-dǔr cə́bal zhə̀nà. 12Da-byǎ, kɔn du: á bə̀k'á bwəl nyí ǹdə́ Yi yil lé, ráá cɛ yá, ráá kɔn dõ yé. Á gə mə̌ s'á wɔ̀ bə̀ ɔ̃̀ɔ̃̂, sé yə̀ ɔ̃̀ɔ̃̂; á gə mə̌ s'á wɔ̀ bə̀ ɔ̃́ɔ̃́, sé yə̀ ɔ̃́ɔ̃́; mùnì ga Yi bə̀ká kə́ á bùrsì rə pə ába dóó yé. 13Á mə̀dù gə nə́ ń nwɛ̀nɛ̀, sə n lwə̀l Yi. Ń mɔ̀ gə zhe wu-nyɔ̃̀, sə n nún n cèrhé Yi. 14Ń mɔ̀ gə tú ń bə jàn zhe, sə n byẽ̀ á gùlú w yé né cìnə́ bé bə bé lwə̀l Yi ń yilə, sə bə zə nwə̃̌ bə tútǔ mu Cinu yil lé yilə. 15Bə̀ gə lwə̀l Yi ǹdə́ bə̀ wun gakó, Yi-co w òmyɛ́ bá zwẽ nə̀bwɛ̃̀ mɔ́. Cinu mà n wárh mɔ. Ń gə wɛ̀rhɛ́ yə̀-bəlwàálɛ myɛ, ń mà n nə rə̀ sǔbri. 16Byilinə á dwə́ə́ré dwã nɛ, s'á lwə̀l Yi dwã yilə, mùnì á nə bəsàzùlí. Wu-cángá cí gə lwə̀l Yi, ń Yi lwə̌l mó zhe jàn nánfɔ̀lɔ̀. 17Elyi yà ń wɔ́ numbyíní ǹdə nə́ gakó ta, sə ń lwə̀l Yi ǹdə́ ń wu gakó mùnì ga dwà y bə̀k'á nyɔ̀ yé. Sə zhə̀n ga dwà y wɛ̀rhɛ́ byinə nə̀tɔ̀ ǹdə́ fwã́, ǹdə́ è nɛ̃̌ yə̀ cɛ y yó twərh yé. 18N kə́ n lwə̀l Yi, sə è nyɔ̀wà, jíjí lyĩ rə ce byǎ. 19Da-byǎ, ámyɛ̌ mə̀dù gə ywə̀r zhə̀n dɛ́ sɔ́má y yó n jé, sə da-byǐ mə̀dù ká n zə mɔ n bà, 20lwarna bə̀ lò ǹ ká ń zə yə̀-bəlɔ̀lɔ́ cí n kwɛ̃̀ n yẽ̌ lwɛlɛ sɔ́má y ń yà ń ŋwɛ́nɛ́ è yó mó ne, ǹ zwẽ mo cu jɔ̃̀ wà, sə ń mà n nə ń yə̀-bəlwàálɛ nánzhəzhɔ̌ sǔbri.

will be added

X\