Efɛɛzɛ 6

1Ámyɛ̌ bə̀sɔ́ná bɛ́, zwẽnə á dabá ǹd'á nábá nyí ni, ǹdə Cinu gə́ nə́ ń yǎl nɛ́. Rə̀myɛ́ wɔ́ kɔn dɛ̀bɛ́ rə̀ mǎ. 2Yi nyə́ né gakó wẽ́, wɔ́ nyí rí tɛ̀bɛ́ rə̀ n'ê wə̀l bə̀: "Nyám ǹ da ǹdə́ ǹ ná" mɔ́ nɛ rə̀ jɛ̀nɛ̀ rə bwəl nyí rə bé súlí. 3Rə̀ wòwə̀: "Ǹ gə nə́ ǹ nyàm ǹ da ǹdə́ ǹ ná, ǹ b'ǎ nə wu-nyɔ̃̀, ǹ myə̌l já zə dwɛ̀lɛ̀ cɛ yó." 4Ámyɛ̌ dabá, bə̀k'á wɛ̀rhɛ́ á bə̀sɔ́ná bɛ́, á ce bə̀ lyimə zɛ̃̀ yé. Kɔ́nna bɛ, s'á cící bi, á cèrhè bè, ǹdə́ Cinu cìcì surhə né. 5Ámyɛ̌ tùntùnnə̀ bé, zwẽnə á yó-cìnə́ bé cɛ yó mó nyí ni. Nyámna bɛ ǹdə́ wu-põ̀, ǹdə á gə́ n'á zwẽ Kristə nyí ni ní. 6È bə̀ká yə̀ bə̀ gə zhǐ bə̀ yírhə́, á zɛ̃̀ á n'á twĩ̀ á pɛ bɛ ǹdə wɔ́ numbyínsi pùbùlə̀ wɔ̀rhɔ́ á n'á pyà ta yé. Wɛ̀rhɛ́na kɔn dɛ̀bɛ́ Yi n'ê yàlá, ǹd'á wun gakó á tumə né wẽ́, ǹdə Kristə tùntùnnə̀ ta. 7Twĩ̌nə á pə á yó-cìnə́ bé ne ǹdə́ wu òdù, ǹdə wɔ́ Kristə ne á n'á twĩ̀ á pɛ ta, sə è bə̀ká yə̀ ǹdə wɔ́ numbyínsi dúdú ni á n'á twĩ̀ á pɛ ta yé. 8Lwarna bə̀ lò mɔ̀bɔ́ ń nə́ ń wɛ̀rhɛ́ cɛ̀nɛ̀, rə̀-ná-cí gə wɔ́ lò tùntùnnə̀, ráá ń gə cǐ ń cìn myɛ, ń bá nə cɛ̀nɛ̀ rɛ́ ń wɛ̀rhɛ́ mɔ́ Cinu sõ. 9Ámyɛ̌ yó-cìnə́ bé, ámyɛ wɛ̀rhɛ́na cɛ̀nɛ̀ ǹd'á tùntùnnə̀ bé. Á bə̀k'á bya bɛ yé. Lwarna b'ǎmyɛ̌ ǹdə́ bə̀myɛ́ ga zhe yó-cə́bal mə̀dù, ń ŋwɛ́nɛ́ Arəzana w ń cǐ ámyɛ̌ ga. Lyì bí gakó wɔ́ kɔn rə̀dù ń sono. 10À zɔ̀mɛ̀ nánkwɛɛ́rɛ́ à la byilu mú, wɔ́ lwə́l à n'â lwə̀l ába, s'á zhí Cinu ni á b'á pyà wu-jɔ̀ ń jàn dɛ́ nánfɔ̀lɔ̀ w wẽ́. 11Kwěnə Yi búlə́ wẽ̀ dé gakó á zə á jɔ̃̀ wà, mùnì á ŋwɛ̀nɛ́ á zhì á cẽ Shətana sòlò mó. 12Nə́ t'á bwí ǹdə́ numbyínsi yé. Nə́ r'é bwí ǹdə́ jàn cìnə́ námməlwǎlsɛ́ shɛ̀bɛ́ dwí gakó sə̀ ŋwɛ́nɛ́ dɛ̃̌, yírhə́ wàr nə̀ nɛ, sə̀ zhe jàn ǹdə́ ŋwɔ̀nɔ́ cə-byín lũ w wẽ́ mó. 13Rə̀myɛ́ ce, kwěnə Yi búlə́ wẽ̀ dé gakó á zə á jɔ̃̀ w èlǎsɛ̃́, mùnì dwã nɛ́ nyɛ̀bɛ́ nə̀ bə càn mɔ́ gə tú nə̀ yúwə́, s'á ŋwɛ̀nɛ́ á zhì á bú búlə́ né kɔn mé yí nə̀ zhɔ̌, s'á zhì á nà y yó kẽkẽ. 14Zɛ̃̀nà á zhì dɛ̃̌ á dɛ̃̀. Cenə zhə̀n dɛ́ á cã̌ nɛ́ ǹdə cã̌-tɔ̀nɔ̀ ta. Zwínə cángá tumə né nə yə̀ ǹdə kàmə̀-zwǐ kɛ̀bɛ́ á m'á cə̀r á cìn búlə́ jàà w ta. 15Cenə yə̀wǎl á nə̀rh né ǹdə nə̀cìlə̀ ta, á m'á bwə̀l yò-ècɔ̀nɔ̀ nyí rí rə̀ n'ê pɛ yə̀-zùlə́ mó. 16Zəna á Yi-ni-zhú mú mə yə̀ ku á m'á cə̀r á cìn kɔn gakó wẽ́ twéé gakó. Shətana gə tú è la zə è swé ré ǹdə́ rə̀ myǐn mú e dul ába, sə ku w cə̀r rè. 17Zwẽnə Yi vwǎrh mɔ́ á pú ǹdə cɔ̀bɔ́ yə́-pú ta, s'á zwẽ Yi zɔ̀mɛ̀ rɛ́ Eshirhə náàcɛ̀nɛ́ n'ê pɛ ába ǹdə búlə́ shù ta mɔ́. 18Cenə Yi dɛ̃ gakó, á lwə̀l lè ǹdə́ Eshirhə náàcɛ̀nɛ́ jàn, s'á zhìlì á yala nɛ kɔn gakó wẽ́, á lwə̀l lè dɛ̃ gakó rə̀ lyì bí gakó yilə. 19Lwə̌lnə re àmyɛ yilə, mùnì à gə la zɔ̌m, sə rə sɛ̃ nɛ ǹdə́ zɔ̀mà nyɛ̀bɛ́ nə̀ má ce a byili yò-ècɔ̀nɔ̀ nyí rí rə̀ y'à shèè mó ǹdə́ wu-jɔ̀. 20À wɔ́ yò-ècɔ̀nɔ̀ nyí rí rə̀myɛ́ bwə̀lnə̀. Wɔ́ rə̀myɛ́ yil bə̀ zɔ nɛ bə ce byə̀nə́-jù wə̀. Lwə̌lnə Yi à yilə, mùnì a zɔ̀m ǹdə à gə́ mə̌ sá zɔ̀m nɛ́ ǹdə́ wu-jɔ̀. 21Tishiki wɔ́ nə́ da-byǐ nántwə̌. Ń nə́ ń twĩ̀ Cinu tum dí ǹdə kɔn gə́ mə̌ nɛ́. Ń mà n zɔ̀m à yò ǹd'ába, n byili ába kɔn dɛ̀bɛ́ à n'â wɛ̀rhɛ́. 22À n'â twĩ̀ mù á sõ, mùnì n byili ába kɔn dɛ̀bɛ́ rə̀ ŋwɛ́nɛ́ nə́ sono, sə n súlí n zə á wun ní. 23Nə́ Da Yi ǹdə́ Cinu Yezu Kristə má ce bə̀ yə̀-zùlə́ né ǹdə́ bə̀ sónó w yə̀ nɛ́ ǹd'ámyɛ̌ ǹdə́ nə́ da-byǎ bɛ́ gakó, á kwɛrhɛ á zhí bi. 24Yi má cĩ́ bwəl lyì byɛ̀bɛ́ gakó bə̀ só nə́ Cinu Yezu Kristə ǹdə́ sónó páá mɔ́ yó!

will be added

X\