Efɛɛzɛ 1

1Àmyɛ́ Pwəə, Yi ce à wɔ́ Yezu Kristə tùntúm ǹdə rə̀ gə́ n'ê yǎl nɛ́. Wɔ́ àmyɛ́ à n'â kɛ̃ sɛ́bɛ́ rɛ́ tɛ̀bɛ́ à la ámyɛ̌ byɛ̀bɛ́ á wɔ́ Yi lyì, á ŋwɛ́nɛ́ Efɛɛzɛ nɛ́, á zù Yezu Kristə mó ne pɔ. 2Nə́ Da Yi ǹdə́ nə́ Cinu Yezu Kristə má cĩ́ bwəl á yó, sə bə pə ába yə̀-zùlə́! 3Bànà nə́ cèrhé nə́ Cinu Yezu Kristə Da Yi rí, bə̀ rə̀ cĩ́ bwəl dwí tɛ̀bɛ́ gakó rə̀ n'ê shí dɛ̃̌ Arəzana w mɔ́ nə́ yó. Bwəl lé rə̀myɛ́, wɔ́ Eshirhə náàcɛ̀nɛ́ sõ rə̀ n'ê shí ní, Kristə jàn yilə. 4Yi tó Kristə dɛnnɛ rə cír nə́ba ǹdə́ rə̀ gwẽ̌ yə̀ lũ w wɛ̀rhɛ́ yé, rə ce nə́ jǐrh rə̀ lyì zhə̀nà, dóó bə̀k'á jòm nə́ yó w rə̀ yé né yé. 5Rə̀ gə́ só nə́ba mó ce, rə̀ gu rə̀ wẽ́ rə̀ n'ê yǎl bə̀ nə́ tó Yezu Kristə dɛnnɛ nə́ jǐrh rə̀ byǎ. Rə̀myɛ́ yàl rə̀ pùbùlə̀, rə̀ gə́ wɔ́ wu-bɔ̀nɔ̀ cí mú yilə. Rə̀ wɛ̀rhɛ́ èta nə́ yilə, 6mùnì ga nə́ cèrhé re rə̀ gə́ tó rə̀ Byì-sónó w dɛnnɛ rə pə nə́ba rə̀ pɛnɛ́ y nánfɔ̀lɔ̀ w mɔ́ yilə. 7Kristə zə ń cìn n yə̀ vwĩ̀-kɔna. Nə́ zɛ̃̀ nə́ tó ń jal mɔ́ dɛnnɛ nə́ nə nə́ cìnə̀, nə́ jà nə́ nə nə́ dwə́ə́ré sǔbri. Èta, Yi byili rə̀ yò-cɔ̀nɔ̀ w nánfɔ̀lɔ̀ w rə̀ wɛ̀rhɛ́ ǹdə́ nə́ba mɔ́. 8Rə̀ yò-cɔ̀nɔ̀ w já dɛ̃́dɛ̃́, rə̀ pɔ nə́ba surhə ǹdə́ lárma dwí gakó. 9Kɔn ŋwɛ́nɛ́ rə̀ y'à shèè, Yi y'à dámǎ rə gu rə̀ wẽ́ rə̀ la tó Kristə dɛnnɛ rə wɛ̀rhɛ́, rə̀ gə́ wɔ́ wu-bɔ̀nɔ̀ cí mú yilə. Wɔ́ rə̀myɛ́ Yi ce nə́ lwar. 10Yi n'ê yǎl rə pyìrh kɔn dɛ́ rə̀myɛ́ mɔ́ ǹdə́ rə̀ yi rí gə tú rə̀ yúwə́. Rə̀myɛ́ yi ní, Yi bá mù kɔn dɛ̀bɛ́ rə̀ ŋwɛ́nɛ́ dɛ̃̌ ǹdə́ cɛ yó mó dwí gakó dwã w rə ce Kristə jɔ̃̀ w n cìní. 11Yi n'ê wɛ̀rhɛ́ kɔn gakó rə tó ǹdə rə̀myɛ́ cìcì gə́ n'ê yǎl nɛ́. Wɔ́ rə̀myɛ́ è ce rə tó Kristə dɛnnɛ rə cír nə́ba mùnì nə́ jǐrh rə̀ sə̀pwà lyì. Wɔ́ èta rə̀ y'à dámǎ rə gu rə̀ wẽ́ rə̀ la nɛ́ wɔ̀rhɔ́, 12mùnì ga nə́myɛ̌ byɛ̀bɛ́ nə́ tó yé nə́ r'é dɛ̃̀ kɔn Kristə sõ mó cèrhé re rə̀ zùwə́ y nánfɔ̀lɔ̀ w yilə. 13Kɔn wɔ́ èta ǹd'ámyɛ; á nyɛ̀ɛ̀ zɔ̀mɛ̀ rɛ́ tɛ̀bɛ́ rə̀ wɔ́ zhə̀n mɔ́. Wɔ́ rə̀myɛ́ rə̀ wɔ́ yò-ècɔ̀nɔ̀ nyí rí Yi tó rə̀ dɛnnɛ rə vwǎrh ába mɔ́. Á zù Kristə, Yi ce Eshirhə náàcɛ̀nɛ́ y rə̀ y'à bwəl è nyí mú só á yó wə. Eshirhə y èmyɛ́ wɔ́ rə̀ cìcì myɔrhɔ rə̀ cĩ́ á yala nɛ. 14Yi gə́ ce Eshirhə náàcɛ̀nɛ́ só nə́ yó mó n'ê byili bə̀, dɛ̃ rɛ́ tɛ̀bɛ́ Yi lyì bí la vwǎrh nɔ námpúm mú gə yúwə́, rə̀ bá pə nə́ba kɔn dɛ́ dɛ̀bɛ́ rə̀ bwəl nyí bə̀ rə̀ la nə́ba pɔ mɔ́ gakó, mùnì ga nə́ cèrhé re rə̀ zùwə́ y nánfɔ̀lɔ̀ w yilə. 15Wɔ́ rə̀myɛ́ gakó è ce, èlǎsɛ̃́ à gə́ nyɛ̀ɛ̀ b'ǎ zhí Cinu Yezu ni, á j'ǎ só byɛ̀bɛ́ bə̀ wɔ́ ń lyì mú, 16à n'â ce Yi nə̀bán twéé gakó á yilə. À gə la Yi-co wɔ̀rhɔ́ gakó, à t'â swě á yò yé. 17À n'â lwə̀l mɔ̀bɔ́ ń wɔ́ nə́ Cinu Yezu Kristə Yi rí, n jà ń wɔ́ ń Da, ń mə̌ ǹdə́ còrhó mó ne, bə̀ ń ce Eshirhə náàcɛ̀nɛ́ pə ába surhə á lwar ń pár náàcɛ̀nɛ́. 18À n'â lwə̀l mò bə̀ ń pul á wun ní pamparɛ̃ɛ̃, mùnì á sú kɔn dɛ̀bɛ́ ń byẽ̀ ába á n'á dɛ̃̀ ń sõ mó kùrə̀, s'á lwar kɔn dɛ́ nánfɔ̀lɔ̀ w kɔ̀bɔ́ ń bwəl nyí bə̀ ń la ń lyì bí ni pɔ mɔ́ myɛ gə́ wɔ́ nɛ́, 19s'á j'ǎ lwar jàn dɛ́ nánfɔ̀lɔ̀ w rə̀ ŋwɛ́nɛ́ nə́myɛ̌ byɛ̀bɛ́ nə́ zù mù mú wẽ́ rə̀ n'ê twĩ̀ mú yé-shò. Yi ce jàn nánfɔ̀lɔ̀ w òmyɛ́ mɔ́ n'ô twĩ̀. 20Rə̀ tó rə̀ gə́ bwìrhì Kristə rə ce n zɛ̃̀ n vò dɛ̃̌ Arəzana w ń jě rə̀ jə̀jĩ́ ní mú dɛnnɛ, rə byili rə̀ jàn nánfɔ̀lɔ̀ wá. 21Èta, rə̀ ce Kristə cǐ jàn cìnə́ bé bə̀ ŋwɛ́nɛ́ dɛ̃̌ bə̀ zhe ŋwɔ̀nɔ́, bə̀ n'ê jí pyɛ̀lɛ̀ mɔ́ dwí gakó. Ń zhe ŋwɔ̀nɔ́ du kɔn dɛ̀bɛ́ dwí gakó rə̀ ŋwɛ́nɛ́ èlǎsɛ̃́ lũ w wẽ́, ǹdə́ tɛ̀bɛ́ rə̀ la lũ w kɔ̀bɔ́ ò bàn mɔ́ wẽ́ yál mɔ́ gakó. 22Yi co kɔn gakó Kristə nə̀rh kùr w ń cǐ. Rə̀ ce ń wɔ́ ń lyì bí gùlú w yó-cə́bal. 23Gùlú w wɔ́ Kristə yala. Ń ŋwɛ́nɛ́ ò wẽ́ námpúm. Yi cìcì zɛ̃̀ rə̀ ŋwɛ́nɛ́ Kristə wẽ́ námpúm.

will be added

X\