Kɔlɔɔsɛ 4

1Ámyɛ̌ yó-cìnə́ bé, zəna á tùntùnnə̀ bé ǹdə́ wu-cángá, s'á bə̀k'á cír jàlà á só, á zɛ̃̀ á bə jàlà só yé. Á yě b'ǎmyɛ zhe Yó-cə́bal mə̀dù ń ŋwɛ́nɛ́ Arəzana wa. 2Cenə jàn nɛ́ ǹdə́ Yi-co twéé gakó; zəna á yírhə́, s'á ce Yi nə̀bán twéé twéé. 3Lwə̌lnə Yi nə́myɛ yilə, bə̀ rə̀ pə nə́ba sɔ́má nə́ bwə̀l rə̀ zɔ̀mɛ̀ rɛ́, sə nə́ bwə̀l kɔn dɛ̀bɛ́ rə̀ shèè Kristə shò-kwã nɛ́ mɔ́ nə́ byili, bə̀ wɔ́ zɔ̀mɛ̀ rɛ́ rə̀myɛ́ bwə̌l mó yil bə̀ co ne byə̀nə́-jù wə̀. 4Lwə̌lnə Yi mùnì ga a ŋwɛ̀nɛ́ a byili rə̀ zɔ̀mɛ̀ rɛ́ pamparɛ̃ɛ̃ ǹdə à gə́ mə̌ sá byili ri ní. 5Zəna á cìn ǹdə́ surhə nyɛ̀bɛ́ nə̀ càn ǹdə́ lyì bí byɛ̀bɛ́ bə̀ də̀ Kristə-lyì mú, s'á wɛ̀rhɛ́ á gə́ wɔ̌ nɛ́ á zə á cìn náàcɛ̀nɛ́ twéé gakó. 6Cenə á zɔ̀mà nɛ́ yə̀ zɔ̀mà nyɛ̀bɛ́ nə̀ càn twéé twéé, nə̀ zhe shil, s'á lwar náàcɛ̀nɛ́ á gə́ b'ǎ lyár lò mɔ̀bɔ́ gakó ń la ába zɔ̀mɛ̀ bwə̌rh mó né. 7Nə́ da-byǐ nántwə̌ Tishiki mà n byili ába kɔn gə́ wɔ́ nɛ́ à sõ. Ń nə́ ń tó ne ń twĩ̀ Cinu tum dí ǹdə kɔn gə́ mə̌ nɛ́. 8Wɔ́ rə̀myɛ́ è ce à n'â twĩ̀ mù á sõ, mùnì ga n byili ába kɔn gə́ wɔ́ nɛ́ nə́ sõ, sə n pə ába cícú n súlí. 9À n'â twĩ̀ ńmyɛ̌ ǹdə́ Oneshim. Ńmyɛ wɔ́ nə́ da-byǐ nántwə̌. Wɔ́ ámyɛ̌ lò ǹdə́ mɔ. Bə̀myɛ́ bə̀lyè y ga má byili ába kɔn gə́ wɔ́ nɛ́ nyɔ̀nɔ̀ mɔ́ gakó. 10Arəsətarkɛ nə́ ń ce ába. Ń tó ne ń ŋwɛ́nɛ́ byə̀nə́-jù wə̀. Barnabaasɛ nəkɔ́-byǐ Markɛ myɛ nə́ ń ce ába. Nə́ y'ǎ zɔ̀m ń yò ǹd'ába. Ń gə tú á sõ, s'á zwẽ ń zhəəlé cɛ̀nɛ̀. 11Yezu mú mɔ̀bɔ́ bə̀ n'ê byẽ̀ bə̀ Zhusətuusi mú myɛ nə́ ń ce ába. Zhwifubá byɛ̀bɛ́ bə̀ jǐrh Kristə-lyì mú wẽ́, wɔ́ bə̀myɛ́ bə̀tɔ̀ y bə̀ n'ê tó ne bə̀ twĩ̀ Yi pyɛ̀lɛ̀ rɛ́ yilə, sə bə̀ pɔ nɛ wu-jɔ̀. 12Epafəraasɛ nə́ ń ce ába. Ńmyɛ wɔ́ ámyɛ̌ lò. Ń wɔ́ Yezu Kristə tùntùnnə̀. Ń nə́ ń lwə̀l Yi á yil dɛ̃́dɛ̃́ twéé gakó, mùnì ga á yə̀ rə̀ lyì nántwə̌rh, s'á zhì kẽkẽ á wɛ̀rhɛ́ Yi pùbùlə̀ kɔn gakó wẽ́. 13Ń nə́ ń twĩ̀ dɛ̃́dɛ̃́ ámyɛ̌ ǹdə́ Laɔdɛɛsɛ Kristə-lyì bí ǹdə́ Yərəpoli nyə̀ná bɛ́ ga yilə. Àmyɛ́ cìcì mú wɔ̌ à wə̀l rə̀myɛ́. 14Nə́ dɔwa Lwiki ń wɔ́ lyìtwə́r mó ǹdə́ Dɛmaasɛ myɛ n'ê ce ába. 15Wálna Laɔdɛɛsɛ Kristə-lyì bí ǹdə́ Nəmfa ǹdə́ gùlú w lyì bí bə̀ n'ê jòm dwã yó ń sõ kɛ̀lɛ́ w mɔ́ nɛ bə̀ nyǐ nə́ r'é ce be. 16Á gə kàrmə̀ sɛ́bɛ́ rɛ́ tɛ̀bɛ́ á zhɛ̀, s'á pə rɛ Laɔdɛɛsɛ gùlú w lyì bí myɛ nɛ bə kàrmə̀. Sə à sɛ́bɛ́ rɛ́ tɛ̀bɛ́ bə̀ la pə rə shí Laɔdɛɛsɛ rə bə̀ á sõ mó, sə ámyɛ kàrmə̀ rɛ̀. 17Wálna Arəcipi ni bə̀ ń zə tum dí tɛ̀bɛ́ Cinu pɔ mɔ mɔ́ cɛ̀nɛ̀, sə n twĩ̌ di náàcɛ̀nɛ́ n báásɛ. 18Wɔ́ àmyɛ́ Pwəə à n'â zɔ̀m zɔ̀mà nɛ́ nyɛ̀bɛ́ à m'â ce ába. Wɔ́ àmyɛ́ cìcì jɛ̃̀ è kɛ̃ nɛ. Lyǐrhnə bə̀ nyǐ wɔ́ byə̀nə́-jù w à ŋwɛ́nɛ́. Yi bá cĩ́ bwəl á yó!

will be added

X\