Kɔlɔɔsɛ 3

1Á tó Kristə ne á bwìrhì. Rə̀myɛ́ ce, pyǎna kɔn dɛ̀bɛ́ rə̀ ŋwɛ́nɛ́ dɛ̃̌, ń gə́ jě Yi jə̀jĩ́ ni mə̀gã̌ mɔ́. 2Cenə dɛ̀bɛ́ rə̀ ŋwɛ́nɛ́ dɛ̃̌ mɔ́ pyǎ yò zù ába, s'á bə̀k'á yẽ̌ dɛ̀bɛ́ rə̀ ŋwɛ́nɛ́ cɛ yó mó pyǎ yò zù ába yé, 3b'ǎ cùwə̀, sə á nyǔ mú tó Kristə ne mə shèè Yi wẽ́. 4Wɔ́ Kristə ń wɔ́ á nyǔ mú. Sə ń gə ká ń túwə́, rə̀myɛ́ yó, ámyɛ b'ǎ tó mo á zù ń zùwə́ y wẽ́. 5Rə̀myɛ́ ce, vǔrnə lũ w nyə̀ná nɛ́ á wẽ́: fwə̌l, ǹdə́ tùntùm-bəywààlɛ̀, ǹdə́ bùlə̀ námməlwǎlsɛ, ǹdə́ shilə námməlwǎlsɛ, ǹdə́ nə̀cɛ̀ndɛ̀ pyǎ kɔn lyɛ̃ cɛ nɛ, bə̀ nə̀cɛ̀ndɛ́ pyǎ kɔn lyɛ̃ cɛ nɛ mɔ́ n'ê twí è jǐrh ǹdə yi ta numbyíní yilə. 6Wɔ́ rə̀myɛ́ rə̀ n'ê zɛ̃̀ Yi lyim ni ǹdə́ byɛ̀bɛ́ bə̀ t'â zwẽ rə̀ nyí ni mú. 7Shãã ga, ámyɛ gə́ y'ǎ gwẽ̌ ŋwɛ́nɛ́ wẽ̀ dé rə̀myɛ́ mɔ́ wẽ́ yi ní, wɔ́ èta á y'ǎ n'á wɛ̀rhɛ́ nɛ́. 8Sə èlǎsɛ̃́, yẽ̌nə wẽ̀ dé tɛ̀bɛ́ èta mɔ́ nɛ: lyim, ǹdə́ jàn tumə, ǹdə́ wu-bárhɛ́. Dwã tùùrhì ǹdə́ zɔ̀m-bəywààlɛ̀ bə mə̌ sə nə du á nyú w yé. 9Á bə̀k'á gõ̀ kɔma á pə dwã nɛ yé, b'ǎ vùr á shãã ga tùntwə̃̀ə̃̀ né ǹdə kàmə̀-zù-dwã́ ta. 10Sə èlǎsɛ̃́, kɔn nyɛ̌ ǹdə wɔ́ kàmə̀-zù-dwə̃̀ á k'á zù ta. Á jǐrh lyì-dùlə̀, byɛ̀bɛ́ bə̀ j'â wɔ́ nándùlə̀ twéé twéé, bə̀ nyɛrhɛ bə̀ Wǎrhna mɔ́, mùnì ga bə lwar ń pár náàcɛ̀nɛ́. 11Èta, Zhwifubá ǹdə́ byɛ̀bɛ́ bə̀ də̀ Zhwifubá mó ga jǐrh kɔn rə̀dù; byɛ̀bɛ́ bə̀ gòm mó ǹdə́ byɛ̀bɛ́ bə̀ yə̀ gòm mó ga jǐrh kɔn rə̀dù; zhələ ǹdə́ gɔ-má ǹdə́ yómə́ ǹdə́ byɛ̀bɛ́ bə̀ cǐ bə̀ cìn mú ga jǐrh kɔn rə̀dù. Sə Kristə wɔ́ kɔn gakó, ń ŋwɛ́nɛ́ á gakó wẽ́. 12Yi só ába, rə̀ cír ába, mùnì ga á yə̀ rə̀myɛ́ lyì. Rə̀myɛ́ ce, cenə jàn nɛ́ á yə̀ nɔ̀nɔ̀-dǔr cìnə́, á swéné dwã. Yálna cìn-lwəl cìnə́ ǹdə́ lyì-nyɛ̀mɛ̀, ǹdə́ wu-bɔ̀nɔ̀ cìnə́, ǹdə́ cìn-pyɔ́nɔ́ cìnə́. 13Zəna cìn-pyɔ́nɔ́ ǹdə́ dwã. Lò mə̀dù gə tú ń zhe zɔ̀mɛ̀ ǹdə́ ń dõ, s'á pə dwã sǔbri. Cinu pɔ ába sǔbri; ámyɛ mə̌ s'á pə dwã sǔbri. 14Sə kɔn du, swénénə dwã, bə̀ wɔ́ sónó w ò n'ô ce nyì-dwìì námpúm yàl nɛ́. 15Cenə yə̀-zùlə́ né nyɛ̀bɛ́ Kristə nə́ ń pɛ mɔ́ yə̀ á wẽ́. Wɔ́ yə̀-zùlə́ né nə̀myɛ́ yil Yi byẽ̀ ába rə ce á ŋwɛ́nɛ́ dwã yó, mùnì ga á jǐrh kɔn rə̀dù. Cenə rə̀ nə̀bán twéé twéé. 16Yẽ̌nə Kristə zɔ̀mɛ̀ rɛ́ jòm á wẽ́ námpúm. Byilinə dwã nɛ, s'á cící dwã ǹdə́ surhə nyɛ̀bɛ́ nə̀ càn. Núnnə núrh shɛ̀bɛ́ sə̀ n'ê shí Eshirhə náàcɛ̀nɛ́ sõ, ǹdə́ núrh dwí gakó á m'á ce Yi nə̀bán ǹd'á wun gakó. 17Kɔn dɛ̀bɛ́ gakó á n'á zɔ̀mà, ǹdə́ dɛ̀bɛ́ gakó á n'á wɛ̀rhɛ́, wɛ̀rhɛ́na rə̀ gakó Cinu Yezu yil lé yilə, á tó ńmyɛ̌ dɛnnɛ á ce nə́ Da Yi nə̀báná. 18Ámyɛ̌ kana bɛ́, shɛ̀nɛ́na á byə́nə́ bé nyí ni, bə̀ wɔ́ rə̀myɛ́ rə̀ wɔ́ Cinu pùbùlə̀. 19Ámyɛ̌ bala bɛ́, swénénə á kana bɛ́, s'á bə̀k'á gwirhi á yə́rh ǹdə́ bɛ yé. 20Ámyɛ̌ bə̀sɔ́ná bɛ́, cilinə á dabá ǹd'á nábá zɔ̀mà kɔn gakó wẽ́, bə̀ wɔ́ rə̀myɛ́ Cinu nə́ ń yàlá. 21Ámyɛ̌ dabá, á bə̀k'á kwè lyim twéé twéé ǹd'á bə̀sɔ́ná bɛ́ yé, mùnì ga bə̀ wun bə̀ká gə yé. 22Ámyɛ̌ tùntùnnə̀ bé, shɛ̀nɛ́na á yó-cìnə́ bé cɛ yó mó nyí ni kɔn gakó wẽ́. Shɛ̀nɛ́na bə̀ nyí ni ǹd'á pùbùlə̀, á gə́ n'á nyàm Cinu mú yilə. Sə è bə̀ká yə̀ bə̀ yírh dǔr dúdú yil á n'á shɛ̀nɛ́ bə̀ nyí ni, e jǐrh ǹdə wɔ́ numbyínsi nyí ni shɔ̀nɔ́ ta yé. 23Kɔn dɛ̀bɛ́ gakó á n'á wɛ̀rhɛ́ mɔ́, wɛ̀rhɛ́na rɛ ǹd'á wun gakó. Á yě bə̀ wɔ́ Cinu yil á n'á wɛ̀rhɛ́ rɛ, sə è də̀ numbyíní dúdú yil yé. 24Á yě b'ǎ m'ǎ nə cəl kwǎndɛ nə̀cɛ̀ndɛ́ tɛ̀bɛ́ Yi cĩ́ rə̀ lyì bí ni mú wẽ́, bə̀ wɔ́ Kristə ń wɔ́ á yó-cə́bal mɔ́ cìcì mú; wɔ́ ńmyɛ̌ nyí ni á n'á shɛ̀nɛ́ nɛ́. 25Lò mɔ̀bɔ́ ǹ wɛ̀rhɛ́ lwɛlɛ, ǹ b'ǎ nə còrhò-tum rə̀ yilə; bə̀ lyì bí gakó wɔ́ kɔn rə̀dù Yi sono.

will be added

X\