1 Cofyil, à zɔ̀m kɔn dɛ̀bɛ́ gakó Yezu wɛ̀rhɛ́ ǹdə́ dɛ̀bɛ́ gakó ń cèrhè lyì bí ni kùr-ju yi ní, kɔn mé yí dɛ̃ rɛ́ tɛ̀bɛ́ Yi kwè mò n vò Arəzana w mɔ́ yò, à sɛ́bɛ́ rɛ́ nã́yéé ré à kɛ̃ mɔ́ wẽ́. Ń byili ń zɔ̀mà nɛ́ tùntúmə́ bé ń cír mó ne ǹdə́ Eshirhə náàcɛ̀nɛ́ ŋwɔ̀nɔ́, fòró n zɛ̃̀ n vò Arəzana wa. 3 Wɔ́ bə̀myɛ́ nɛ ń byili ń cìn ń cu mú kwã nɛ́, n wɛ̀rhɛ́ wẽ̀ nánzhəzhɔ̌ n ce bə lwar pamparɛ̃ɛ̃ bə̀ ń ŋwɛ́nɛ́, tə́tɔ̀ná tɛ̀nɛ́ yé. Ń lyí bi dwã shə́-èna, sə ń zɔ̀m Yi pyɛ̀lɛ̀ rɛ́ yò ǹdə́ bɛ. 4 Dɛ̃ rə̀dù, ń yà ń nə́ ń tó be ń jí kùjú, n zɛ̃̀ n pə bɛ nyí n wɔ̀: "Mɛ̃na Zhərəzalɛm nɛ́, á dɛ̃̀ kɔn dɛ́ dɛ̀bɛ́ à Da bwəl rə̀ nyí mú, dɛ̀bɛ́ à byili ába mó. 5 Zhã wɔ́ nɛ̃̌ ń yà ń mə́ ń pɛ nɛ̃̌-shɔ, sə nyɔ̀nɔ̀ ǹdə́ dwã màngɛlɛ́, wɔ́ Eshirhə náàcɛ̀nɛ́ wẽ́ ámyɛ̌ b'ǎ zwẽ nɛ̃̌-shɔ nɛ́." 6 Dɛ̃ rə̀dù, Yezu ǹdə́ ń tùntúmə́ bé y'à jě dwã yó. Bə zɛ̃̀ bə bwə̀rh mò bə wɔ̀: "Cinu, wɔ́ èlǎsɛ̃́ ǹ b'ǎ zwẽ Esərayɛl lyì bí cɔ w ń pə bɛ bə̀ cìn-cìnú?" 7 N wɔ̀ bɛ: "Rə̀myɛ́ yi rí ǹdə́ rə̀ dɛ̃ rɛ́ lwar mɔ́ də̀ ámyɛ̌ yé yé. Wɔ́ à Da ǹdə́ ń sə̀pwà jàn ń cír rə̀myɛ́ n cĩ́. 8 Sə Eshirhə náàcɛ̀nɛ́ gə tú è só á yó w yi ní, á m'ǎ nə jàn, sə á m'ǎ yə̀ à zhə̀n-cínnə Zhərəzalɛm nɛ́, ǹdə́ Zhide ǹdə́ Samarɛ tənèsé púlə́púlə́ wə, kɔn mé yí lũ w cə-yala gakó." 9 Ń gə́ tú n zɔ̀m n zhɛ̀, Yi kwè mò ń la dɛ̃̌ ǹdə́ bə̀ gwẽ̌ zhǐ bə̀ n'ê nyǐ mu. Ébɔ̃ círhí mu, bə̀ k'ê bə mɔ nɛ yé. 10 Lyì bə̀lyè bə̀ y'à zù gã̀-pwẽ̀ bə̀ bə lyí bi, ǹdə́ bə̀ gwẽ̌ zhǐ bə̀ n'ê nyǐ ń jàà wà. 11 Lyì bí wɔ̀ bɛ: "Gəlile lyì, byè yil á zhǐ á n'á nyǐ dɛ̃̌ èta? Yezu mɔ̀bɔ́ Yi kwè ń la Arəzana w mɔ́, ń mà n ká n bə̀ èta, ǹdə á gə́ nə mɔ ń la nɛ́." 12 Rə̀myɛ́ yó, tùntúmə́ bé ká shí pyɔ̀ w bə̀ n'ê byẽ̀ bə̀ Olyivyə́r pyɔ̀ mɔ́ yó bə só tɛ̃́ bə vò Zhərəzalɛm. Pyɔ̀ w òmyɛ́ ǹdə́ Zhərəzalɛm bə nyɛ ǹdə́ dwã yé. Kɔn bá myɛrhɛ ǹdə coló òdù ta. 13 Bə̀ gə́ yúwə́, bə vò dɛ̃̌-yó jì y bə̀ n'ê gùlí dwã è wẽ́ twéé twéé mó wə. È y'à wɔ́ Pyɛɛrɛ ǹdə́ Zhã ǹdə́ Zhakɛ, ǹdə́ Andərɛ ǹdə́ Shilipu, ǹdə́ Tɔma ǹdə́ Bətələmyi ǹdə́ Məco, ǹdə́ Aləfɛ byǐ Zhakɛ ǹdə́ yə̀wǎl cìnə́ bé gùlú w lò mə̀dù ń yíl Shəmɔ, e súlí Zhakɛ byǐ Zhidə. 14 Bə̀myɛ́ ǹdə́ kana jàlà, ǹdə́ Yezu ná, ǹdə́ Yezu da-byǎ bɛ́ y'à wɛ̀rhɛ́ wu òdù bə̀ n'ê gùlí dwã bə̀ ce Yi twéé twéé. 15 Dɛ̃ rə̀dù, lyì bí byɛ̀bɛ́ bə̀ y'à zù Yezu Kristə mó y'à tú dwã yó; bə̀ y'à yú lyì zɔ̌m ǹdə́ shí-èlyè. Pyɛɛrɛ zɛ̃̀ n zhì bə̀ gakó yé né n wɔ̀ bɛ: 16 "Da-byǎ, bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Dəvyidi yà ń dámǎ n zɔ̀m kɔn rə̀dù Zhidə shò-kwã nɛ́. Wɔ́ nyɔ́ɔ́ bə̀ kɔn dɛ́ rə̀myɛ́ mɔ́ pyǐrh. Wɔ́ Zhidə mó ńmyɛ̌ ń zə lyì bí n bə̀ bə zə Yezu mú. 17 Ń yà ń ŋwɛ́nɛ́ nə́ wẽ́ ń nə́ ń tó nə́ba ń twĩ̀ tum dí Cinu co nə́ jɔ̃̀ w mɔ́." ( 18 Ń zə wársɛ́ shɛ̀bɛ́ bə̀ kwɛ̃̌ mɔ n zɛ̃̀ n mə n twĩ̀ ń lwɛlɛ rɛ́ mɔ́ n vò n mə n yə̀ cɛ. Sə ń tu tɛ̃́ cɛ y èmyɛ́ wẽ́, ń pwǐ y lá, ń lyuuré gakó sàrh rə̀ pyě tɛ̃́. 19 Zhərəzalɛm lyì bí gakó nyɛ̀ɛ̀ yò w òmyɛ́. Wɔ́ rə̀myɛ́ è ce, bə̀ co cɛ y èmyɛ́ yil ǹdə́ bə̀ lũ zɔ̀mà nɛ́ bə̀ Akɛlədama. Rə̀ kùr wɔ́: "Jal cɛ".) 20 "E jà bə̀ y'à kɛ̃ Nwíísí sɛ́bɛ́ rɛ́ wẽ́ bə wɔ̀: 'Ń kɛ̀lɛ́ y kùr bá jé; lò lò tá ń la gàà jǒm kə́dò yé.' Bə̀ kɛ̃ rə̀ jàà dõ myɛ wẽ́ bə wɔ̀: 'Sə lò dõ mà n zhì ń jàà wà.' " 21 Pyɛɛrɛ súlí n wɔ̀: "È gə́ wɔ́ èta, kɔn wɔ́ nyɔ́ɔ́ bə̀ lò dõ zwí nə́ wẽ́, n tó nə́ba n yə̀ Yezu bùrhù mú zhə̀n-cínnə. Lyì ŋwɛ́nɛ́ bə̀ y'à n'ê tó nə́ba Cinu Yezu gə́ yà ń gwẽ̌ ŋwɛ́nɛ́, nə́myɛ̌ ǹdə́ ńmyɛ̌ n'é tó dwã nə́ zhə̀l cɛmɛ nɛ́ wa, Zhã gə́ pɔ mɔ nɛ̃̌-shɔ mɔ́ yi ní, kɔn mé yí Yi gə́ kwè mò n vò Arəzana w mɔ́; nə́ b'ǎ cír bə̀myɛ́ mə̀dù." 23 Bə vùr lyì bə̀lyè. È y'à wɔ́ Zhozefu mú mɔ̀bɔ́ bə̀ n'ê byẽ̀ bə̀ Barsabaasɛ mɔ́, ń yà ń zhe yil dõ bə̀ n'ê byẽ̀ bə̀ Zhusətuusi; sə ń dõ mó yà ń yíl Macaasɛ. 24 Bə̀ gakó zɛ̃̀ bə tó dwã bə lwə̀l Yi bə wɔ̀: "Cinu, ǹmyɛ́ ǹ yě lò gakó wu. Byili nə́ba mɔ̀bɔ́ ǹ cír byɛ̀bɛ́ bə̀lyè y wẽ́ 25 bə̀ ń yál tùntúm n zhì Zhidə jàà y wa, n twĩ̀ tum dí tɛ̀bɛ́ Zhidə zhǐr n yẽ̌ n vò ń sə̀pwà jàà y w mɔ́." 26 Bə zɛ̃̀ bə tə́ tántɛ́ɛ́ bə̀ la mé cír mə̀dù, sə tántɛ́ɛ́ y zɔ Macaasɛ. Wɔ́ ńmyɛ̌ bə̀ ce ń zù tùntúmə́ bé shí ǹdə́ mə̀dù y wẽ́.
