2 Tesəloniki 1

1Wɔ́ àmyɛ́ Pwəə ǹdə́ Shəlvɛ̃ ǹdə́ Timote nə́ r'é kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ Tesəloniki Kristə-lyì gùlú w lyì bí ni pɔ. Á zhí nə́ Da Yi ǹdə́ nə́ Cinu Yezu Kristə ne. 2Bə̀ má cĩ́ bwəl á yó, sə bə pə ába yə̀-zùlə́! 3Da-byǎ, nə́ mə̌ dwã sə nə́ ce Yi nə̀bán twéé twéé á yilə, b'ǎ Yi-ni-zhú mú n'ê súlí, e jà á dwã sónó w myɛ n'ô súlí ò la gaga. Rə̀myɛ́ wɔ́ kɔn dɛ̀bɛ́ rə̀ càn. 4Wɔ́ rə̀myɛ́ è ce, nə́ r'é zɔ̀m á yò, nə́ r'é ji á gar nə́ byili Yi gùúlí dwã bɛ́ lyì bí ni. Nə́ r'é byili bə̀ nə́ wun nyɛ̀ á gə́ zhí Cinu ni á zhǐ kẽkẽ nɔ̀nɔ̀ ǹdə́ zwini tɛ̀bɛ́ á n'á nɛ mɔ́ ga yírh w mó yilə. 5Rə̀myɛ́ n'ê byili pamparɛ̃ɛ̃ bə̀ lyì bí bùrsí Yi la kɔ́ mɔ́ bá yə̀ cángá. Rə̀myɛ́ mɔ́ yilə, nɔ̀nɔ̀ w kɔ̀bɔ́ á pyɛ́nɛ́ á n'á nwɛ̀nɛ̀ mɔ́ ce Yi bá ce á zù rə̀ tənà y wa, bə̀ wɔ́ èmyɛ́ yil á n'á nwɛ̀nɛ̀. 6Zhə̀nà, Yi bá wɛ̀rhɛ́ kɔn dɛ̀bɛ́ rə̀ wɔ́ cángá: rə̀ bá ká ce byɛ̀bɛ́ bə̀ n'ê nwɛ̀nɛ̀ ába mɔ́ nwɛ̀nɛ̀. 7Sə è gə wɔ́ ámyɛ̌ byɛ̀bɛ́ á n'á nwɛ̀nɛ̀ zà zà mɔ́ yilə, Yi bá pə shìrhə́ nə́myɛ̌ ǹd'ámyɛ̌ ga nɛ, dɛ̃ rɛ́ tɛ̀bɛ́ Cinu Yezu ká ń bàn mɔ́ yùwə̀. Ń gə tú ń ká ń bàn yi ní, ń bà n zə ń màlɛ́kabá ǹdə́ bə̀ jàn nánfɔ̀lɔ̀ w n shí dɛ̃̌, 8n mə n bə̀ ǹdə́ myìn-zhù nánfɔ̀lɔ̀, n zɛ̃̀ n pə còrhò-tum byɛ̀bɛ́ bə̀ yə̀ Yi zwì, bə̀ j'à yə̀ nə́ Cinu Yezu yò-ècɔ̀nɔ̀ nyí rí zwẽ mó ne. 9Nyǐnə còrhò-tum dí Yi la lyì bí bə̀myɛ́ nɛ pɔ mɔ́: rə̀ bá zhìlì bə̀ yò lyɛ́lyɛ́; rə̀ bá jì bì bə vò pyépyé; bə̀ t'â la rə̀ zùwə́ myɛ nyí ni bwəlse yé. 10Rə̀myɛ́ gakó bá wɛ̀rhɛ́ dɛ̃ rɛ́ tɛ̀bɛ́ Cinu ká ń bàn mɔ́ yùwə̀. Rə̀myɛ́ yi ní, ń lyì bí byɛ̀bɛ́ bə̀ zwẽ ń nyí mú gakó bá cèrhé mo. Ámyɛ b'ǎ tó á yə̀ bə̀ wẽ́, á gə́ shɛ̀nɛ́ á zwẽ zɔ̀mà nɛ́ nə́ byili ába mó yilə. 11Wɔ́ rə̀myɛ́ è ce nə́ r'é lwə̀l Yi twéé twéé á yilə. È gə́ wɔ́ rə̀myɛ́ rə̀ byẽ̀ ába mó ce, nə́ r'é lwə̀l lè bə̀ rə̀ sɛ̃ ába á ŋwɛ̀nɛ́ á wɛ̀rhɛ́ kɔn gakó rə tó rə̀ pùbùlə̀ nè. Kɔn dɛ̀bɛ́ gakó á n'á yǎl á wɛ̀rhɛ́, sə Yi sɛ̃ ába ǹdə́ rə̀ jàn dɛ́, mùnì ga á wɛ̀rhɛ́ cɛ̀nɛ̀, sə rə sɛ̃ ába á twĩ̀ á Yi-ni-zhú tumə né á báásɛ. 12Èta, nə́ Cinu Yezu yil lé má tó á dɛnnɛ rə du ǹdə́ còrhó, sə ńmyɛ mà n ce ámyɛ yil du. Rə̀myɛ́ gakó bá wɛ̀rhɛ́ nə́ Yi ǹdə́ Cinu Yezu Kristə jàn yilə.

will be added

X\