2 Pyɛɛrɛ 1

1Àmyɛ́ Shəmɔ-Pyɛɛrɛ, à wɔ́ Yezu Kristə tùntùnnə̀ ǹdə́ ń tùntúm, à n'â kɛ̃ sɛ́bɛ́ rɛ́ tɛ̀bɛ́. Yezu Kristə wɔ́ nə́ Yi ǹdə́ nə́ Zwennə. Ń wɔ́ wu-cángá cí. Wɔ́ rə̀myɛ́ yilə, ń ce ámyɛ zù mù ǹdə nə́myɛ̌ ta. Wɔ́ ámyɛ̌ nɛ à n'â kɛ̃ sɛ́bɛ́ rɛ́ tɛ̀bɛ́ à la pɔ. 2Yi ǹdə́ nə́ Cinu Yezu bá cĩ́ bwəl á yó, sə bə̀ yə̀-zùlə́ né j'â n'ê súlí á yó w twéé twéé, á gə́ yě bə̀ pár mɔ́ yilə! 3Yi gə́ wɔ́ jàn cə́bal mɔ́ ce, rə̀ pɔ nə́ba kɔn dɛ̀bɛ́ gakó rə̀ bá ce nə́ zhì nə́ nà y yó nə́ zhí rə̀myɛ́ nɛ, sə nə́ zə myə̌l. Rə̀ ce nə́ lwar mɔ̀bɔ́ ń byẽ̀ nə́ba mùnì nə́ nə ń zùwə́ y ǹdə́ ń cɛ̀nɛ̀ rɛ́ mɔ́ gə́ wɔ́ nɛ́. 4Èta, Yi pɔ nə́ba rə̀ cɛ̀nɛ̀ pansɛ́ nánfwààlɛ́ rə̀ y'à bwəl nə́ba sə̀ nyí mú. Wɔ́ cɛ̀nɛ̀ pansɛ́ sə̀myɛ́ mɔ́ dɛnnɛ á b'ǎ tó né á yẽ̌ shilə námməlwǎlsɛ́ sə̀ ŋwɛ́nɛ́ sə̀ n'ê zhìlì lyì bí yò lũ w wẽ́ mó ne, á wu yə̀ òdù ǹdə́ Yi cìcì. 5Rə̀myɛ́ ce, cenə jàn nɛ́ á twĩ̀ tùm-ècɛ̀nà á súlí á Yi-ni-zhú mú ni. Á gə n'á twĩ̀ tùm-ècɛ̀nà, s'á lwar Yi pùbùlə̀ né myɛ á súlí. 6Á gə lwar Yi pùbùlə̀ né, s'á yə̀ cìn-zal cìnə́ myɛ á súlí. Á gə wɔ́ cìn-zal cìnə́, s'á yə̀ cìn-pyɔ́nɔ́ cìnə́ myɛ á súlí. Á gə wɔ́ cìn-pyɔ́nɔ́ cìnə́, s'á zhí Yi ni ǹd'á wun gakó á súlí. 7Á gə zhí Yi ni ǹd'á wun gakó, s'á wɛ̀rhɛ́ cɛ̀nɛ̀ ǹdə́ dwã á súlí, s'á swéné dwã. 8Á gə wɔ́ rə̀myɛ́ gakó cìnə́ kɔn yí, rə̀ bá pə ába yə̀wǎl rə ce á kwɛrhɛ á lwar nə́ Cinu Yezu Kristə párá. 9Sə lò mɔ̀bɔ́ ǹ də̀ rə̀myɛ́ gakó cí, ǹ wɔ́ ǹdə lyìlyǒ ta, ǹ bə yé né nɛ yé. Ǹ kə́ ǹ yə̀l bə̀ bə̀ vùr ǹ shãã ga yə̀-bəlwàálɛ́ yé. 10Da-byǎ, Yi cír ába, rə byẽ̀ ába. Rə̀myɛ́ ce, cenə jàn nɛ́ á zhì á nà y yó á shɛ̀ rə̀ byə̀l lé twéé twéé. Á gə n'á wɛ̀rhɛ́ èta, á t'á la tɛ̃́ tu gaga yé. 11Èta, á b'ǎ nə sɔ́má á zù nə́ Cinu ǹdə́ nə́ Zwennə Yezu Kristə tənà y è ŋwɛ́nɛ́ byinə nə̀ bə zhɔ̌ zhe yil mó wẽ́ nàná. 12Wɔ́ rə̀myɛ́ è ce, ǹd'á jɛ̀rɛ̀ á yě ywẽ̀ né nə̀myɛ́, á zhǐ á nà y yó zhə̀n dɛ́ bə̀ byili ába mó wẽ́ ga, à gwẽ̌ n'â lyǐrh ne ába twéé twéé. 13À n'â bùl b'à gə́ gwẽ̌ ŋwɛ́nɛ́ lũ w wẽ́ mó, à mə̌ sá sɛ̃ ába á surhə né pul ywẽ̀ né nə̀myɛ́ shò-kwã nɛ́. 14Nə́ Cinu Yezu Kristə ce a lwar b'à bwə́l zhǐr lũ w ò n'ô lyɛ̃ mɔ́ wẽ́. 15Sə à bá wɛ̀rhɛ́ à gə́ wɔ̌ nɛ́ gakó, mùnì ga, à gə tú à tɛ̀nɛ́ myɛ, s'á bə̀k'á swě ywẽ̀ né nə̀myɛ́ gaga yé. 16Nə́ gə́ byili ába nə́ Cinu Yezu Kristə jàn dɛ́ ǹdə́ ń twírí y yò mó, è də̀ səswalsɛ numbyíní tɛ́rɛ́ ǹdə́ è surhə nə́ m'é byili ába yé. Nə́ cìcì yírhə́ nɔ ń zùwə́ yə́. 17Ń Da Yi wòwə̀: "Mɔ̀bɔ́ wɔ́ àmyɛ́ Byǐ, à só mo dɛ̃́dɛ̃́. Wɔ́ ńmyɛ̌ à cír." Wɔ́ rə̀myɛ́ yi ní, Yi jàn-bə-swɛ̃́-zhe cə́bal mɔ́ pɔ mɔ pyɛ̀lɛ̀ ǹdə́ zùwə́ nánfɔ̀lɔ̀. 18Nə́ gə́ y'ǎ tó mo nə́ ŋwɛ́nɛ́ pyɔ̀ w náàcɔ̀nɔ̀ w yó mó yi ní, wɔ́ rə̀myɛ́ yó cəl lé rə̀myɛ́ mɔ́ zhì dɛ̃̌ rə zɔ̀m, nə́ cìcì zhã̌ nyɛ̀ɛ̀. 19Wɔ́ rə̀myɛ́ è ce nə́ zwẽ Yi nyì-zwennə bé zɔ̀mà nɛ́ nə́ zhǐ kẽkẽ, tə́tɔ̀ná tɛ̀nɛ́ yé. Ámyɛ mə̌ s'á cili ni náàcɛ̀nɛ́, bə̀ nə̀ wɔ́ ǹdə pàntɛ́mɛ́ è yə̌r cə-byín wẽ́ ta, kɔn la bé yí cə-lár, cə-lár nə̀ŋwɔ w du o yə̌r á wun ní. 20Sə kɔn du, lwarna bə̀ lò tɛ̀nɛ́ ń wɔ̌ Yi nyì-zwennə zɔ̀mà nɛ́ nə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó kùrə̀ ń la byilu ǹdə́ ń sə̀pwà jàn yé. 21Lò tɛ̀nɛ́ ń zɔ̀m nyì-zwennə zɔ̀mà ǹdə́ ń sə̀pwà pùbùlə̀ yé. Wɔ́ Eshirhə náàcɛ̀nɛ́ è ce lyì zɔ̀m zɔ̀mà nɛ́ nyɛ̀bɛ́ nə̀ shí Yi sõ mó.

will be added

X\