2 Kɔrɛ̃tɛ 6

1Nə́myɛ̌ byɛ̀bɛ́ nə́ r'é tó Yi ni nə́ twĩ̀ mú n'é lwə̀l ába: bə̀k'á shɛ̀nɛ́ pansɛ́ Yi pɔ ába mɔ́ yə̀ nánfò yé. 2Bə̀ kɛ̃ Yi zɔ̀mɛ̀ rɛ́ sɛ́bɛ́ ré wẽ́ bə̀ Yi wòwə̀: "Yi rí tɛ̀bɛ́ à só mó gə́ tú e yí, à zwẽ ǹ lwə̌l mó; vwǎrh mɔ́ dɛ̃ rɛ́ gə́ tú e yí, à tú a sɛ̃ mɔ́." Nyǐnə, yi rí yúwə́; nyǐnə, dɛ̃ rɛ́ tɛ̀bɛ́ á mə̌ s'á nə vwǎrh mɔ́ yúwə́. 3Nə́ r'é dɛ̃̀ nə́ cìnə̀, mùnì ga lò lò bə̀ká ń tu tɛ̃́, bə zɛ̃̀ bə tó rə̀myɛ́ dɛnnɛ bə zɔ̀m nə́ sõ nə́ tum dí shò-kwã nɛ́ yé. 4Nə́ r'é byili kɔn gakó wẽ́ bə̀ nə́ wɔ́ Yi tùntùnnə̀. Nə́ r'é pyɛ́nɛ́ nə́ cìn yò-cə̀ə̀lè ǹdə́ zwini ǹdə́ nɔ̀nɔ̀ dwí gakó wẽ́. 5Bə̀ n'ê mà nə́ba; bə̀ n'ê ce nə́ba byə̀nə́-jù wə̀; bə́ n'ê ce lyì bí zɛ̃̀ búlə́ ne ǹdə́ nə́ba; bə̀ n'ê ce nə́ twĩ̀ tùm-kùlə̀; nə́ t'á dɛ̀ɛ̀ nə́ swí yé; nə́ t'á jí nə́ swí yé. 6Nə́ wɔ́ wu-põ̀ cìnə́; nə́ yě Yi zhə̀n dɛ́; nə́ zhe cìn-pyɔ́nɔ́; nə́ zhe wu-bɔ̀nɔ̀; Eshirhə náàcɛ̀nɛ́ ŋwɛ́nɛ́ ǹdə́ nə́ba; nə́ zhe sónó zhə̀n zhə̀nà. 7Yi n'ê pɛ nə́ba jàn nə́ m'é bwə̀l zhə̀n dé nə́ byili. Cángá nyə̀ná nɛ́ nə̀ wɔ́ nə́ búlə́ wẽ̀ nə́ m'é bwí nə́ j'ǎ m'é cə̀r nə́ cìn yé ne. 8Bə̀ n'ê cèrhé nə́ba, bə̀ j'à n'ê ce nə́ba cìzhìlə̀. Bə̀ n'ê zɔ̀m nə́ yil náàcɛ̀nɛ́, bə̀ j'à n'ê zhìlì nə́ yilə. Bə̀ n'ê nyǐ nə́ba ǹdə kɔ̀mdɛ̀ ta, e jà wɔ́ zhə̀n nə́ r'é zɔ̀mà. 9Bə̀ n'ê wɛ̀rhɛ́ ǹdə bə̀ yə̀l nə́ pár ta, lyì bí gakó j'à yě nə́ pár náàcɛ̀nɛ́. Bə̀ n'ê nyǐ nə́ba ǹdə cùùrì ta, nə́ j'ǎ yə̀ cì yé. Bə̀ pɔ nə́ba còrhò-tum, sə bə̀ yə̀ nə́ba gwi yé. 10Bə̀ n'ê nyǐ nə́ba ǹdə lyì byɛ̀bɛ́ bə̀ wun zhìlì ta, nə́ wun j'à nyɛ̀ twéé twéé. Bə̀ n'ê nyǐ nə́ba ǹdə nə̀mwà ta, e jà lyì nánzhəzhɔ̌ tó nə́ dɛnnɛ bə jǐrh nə̀cɛ̀nà. Bə̀ n'ê nyǐ nə́ba ǹdə nə́ bə kaka zhe ta, e jà nə́ zhe kɔn gakó. 11Da-byǎ Kɔrɛ̃tɛ lyì, nə́ pul nə́ wun nə́ zɔ̀m ǹd'ába pamparɛ̃ɛ̃. 12Nə́ yə̀ kaka shèè nə́ wẽ́ yé. Wɔ́ ámyɛ̌ á yə̀ á wun ní pul ǹdə́ nə́ba yé. 13À n'â zɔ̀m ǹd'ába ǹdə lò gə́ nə́ ń zɔ̀m ǹdə́ ń byǎ nɛ́. Wɛ̀rhɛ́na ǹdə nə́myɛ ta: pulnə á wun ní pamparɛ̃ɛ̃ ǹdə́ nə́ba. 14Á bə̀k'á tó lyì byɛ̀bɛ́ bə̀ yə̀ Yi ni zhí ni á wɛ̀rhɛ́ ǹdə bə̀ ta yé. Kɔn dɛ̀bɛ́ rə̀ wɔ́ cángá ǹdə́ dɛ̀bɛ́ rə̀ də̀ cángá wɔ̌ rə̀ bá tó dwã? Pwẽ̀ ǹdə́ cə-byín wɔ̌ rə̀ zhə̀l ǹdə́ dwã? 15Kristə ǹdə́ Shətana nyí wɔ̌ è má yə̀ rə̀dù? Ráá lò mɔ̀bɔ́ ń zù Kristə ǹdə́ mɔ̀bɔ́ ń yə̀ Kristə zwì tùntwĩ̀ĩ̀ wɔ̌ è yàl rə̀dù? 16Yi jì y ǹdə́ wẽ̀ tɛ̀bɛ́ rə̀ də̀ Yi mú jààsɛ́ wɔ̌ è yàl rə̀dù? Nə́myɛ̌ wɔ́ Yi nã́nyì y jì. Yi cìcì wòwə̀: "À bá yə̀ nɛ́ ǹdə́ bɛ a tó be à n'â zhə̀lə̀, a yə̀ bə̀ Yi, sə bə̀ má yə̀ à lyì." 17Wɔ́ rə̀myɛ́ yil Cinu kə́ n wɔ̀: "Dunə á yẽ̌ be, á vò á jòm kwã nɛ́. Á bə̀k'á dwə̀rh kɔn dɛ̀bɛ́ rə̀ zhe jìmdì yé. Rə̀myɛ́ yi ní, à má zwẽ ába. 18À má yə̀ á Da, sə ámyɛ m'ǎ yə̀ à byǎ ǹdə́ à bə̀kwá. Wɔ́ Cinu jàn-bə-swɛ̃́-zhe cə́bal mɔ́ ń zɔ̀m èta."

will be added

X\