2 Kɔrɛ̃tɛ 1

1Àmyɛ́ Pwəə à wɔ́ Yezu Kristə tùntúm ǹdə Yi gə́ n'ê yǎl nɛ́. Wɔ́ àmyɛ́ ǹdə́ nə́ da-byǐ Timote nə́ r'é kɛ̃ sɛ́bɛ́ rɛ́ tɛ̀bɛ́ nə́ la Yi gùlú w lyì bí bə̀ ŋwɛ́nɛ́ Kɔrɛ̃tɛ nɛ́ mɔ́ nɛ pɔ. È də̀ ámyɛ̌ dúdú yé. Wɔ́ ǹdə́ Yi lyì bí byɛ̀bɛ́ gakó bə̀ ŋwɛ́nɛ́ Akəyi tənà y púlə́púlə́ wẽ́ mó. 2Nə́ Da Yi ǹdə́ Cinu Yezu Kristə bá cĩ́ bwəl á yó, sə bə pə ába yə̀-zùlə́! 3Bànà nə́ cèrhé nə́ Cinu Yezu Kristə Da Yi rí! Ń wɔ́ nə́ Da ǹdə́ nə́ Yi. Ń zhe wu-bɔ̀nɔ̀ dɛ̃́dɛ̃́. Ń nə́ ń pɛ nə́ba wu-jɔ̀ twéé twéé. 4Ń nə́ ń zal nə́ wun ni zwini dwí gakó wẽ́, mùnì ga nə́myɛ ŋwɛ̀nɛ́ nə́ zə lyì byɛ̀bɛ́ bə̀ ŋwɛ́nɛ́ zwini dwí gakó wẽ́ mó wun ni ǹdə́ wu-jɔ̀ w kɔ̀bɔ́ Yi n'ê pɛ nə́ba mɔ́. 5Nə́ r'é nɛ wu-jɔ̀ dɛ̃́dɛ̃́ Kristə jàn yilə, ǹdə nə́ gə́ n'é tó mo nə́ nwɛ̀nɛ̀ dɛ̃́dɛ̃́ nɛ́. 6Sə nə́ gə́ n'é nwɛ̀nɛ̀ èta mɔ́, wɔ́ á wun ni zal ǹd'á vwǎrh yilə. Nə́ gə́ nɔ wu-jɔ̀ mɔ́, wɔ́ mùnì ga nə́ zə ámyɛ wun ni, á ŋwɛ̀nɛ́ á pyɛ́nɛ́ á zhì kẽkẽ á nɔ̀nɔ̀ w wẽ́ ǹdə nə́myɛ ta. 7Nə́ yě náàcɛ̀nɛ́ b'ǎ gə́ n'á tó á nwɛ̀nɛ̀ mɔ́ ce, á b'ǎ tó á nə wu-jɔ̀ w myɛ. 8Da-byǎ, nə́ r'é yǎl b'ǎ lwar bə̀ nə́ nwɛ̀nɛ̀ dɛ̃́dɛ̃́ Azhi tənà y wa. Nɔ̀nɔ̀ w kɔ̀bɔ́ nə́ nɔ gàà mɔ́ y'à du nə́ jàn. Nə́ y'à n'ê bùl bə̀ nə́ m'ǎ cì. 9Nə́ y'ǎ n'é bùl bə̀ bə̀ kɔ́ nə́ bùrsì bə̀ la nə́ba gu. Rə̀myɛ́ ce, nə́ y'ǎ k'é bə nə́ cìcì zhə̀n zhe yé. Wɔ́ Yi zhə̀n nə́ y'ǎ zhe, bə̀ rə̀myɛ́ n'ê bwìrhì cùùrì. 10Wɔ́ rə̀myɛ́ rə̀ zwẽ nə́ba cu jɔ̃̀ w rə̀myɛ́ yi ní, sə rə̀ gwẽ̌ bá zwẽ nə́ba. Zhə̀nà, nə́ yě náàcɛ̀nɛ́ bə̀ rə̀ gwẽ̌ bá zwẽ nə́ba. 11Ámyɛ n'á sɛ̃ nə́ba ǹdə́ Yi lwə̌l. Èta, lyì nánzhəzhɔ̌ Yi-co jàn yilə, Yi bá wɛ̀rhɛ́ nə́ba cɛ̀nɛ̀, sə nunə nánzhəzhɔ̌ má tó rə̀myɛ́ dɛnnɛ bə ce Yi nə̀bán nə́ yilə. 12Kɔn dɛ̀bɛ́ rə̀ n'ê pɛ nə́ba wu-nyɔ̃̀ mɔ́, wɔ́ nə́ gə́ pwèlè nə́ wun nə́ zə nə́ cìn lũ w wẽ́ ǹdə́ cɛ̀nɛ̀ ǹdə́ zhə̀n dɛ́ tɛ̀bɛ́ rə̀ n'ê shí Yi sono mó. Sə kɔn du, wɔ́ nə́ gə́ n'é wɛ̀rhɛ́ èta ǹd'ámyɛ mɔ́. Rə̀myɛ́ wɔ́ Yi pɛnɛ́, sə è də̀ numbyíní surhə tum yé. 13Nə́ yə̀ kɔn dõ nə́ sábá wẽ́ kɛ̃ nə́ pə ába yé. Wɔ́ tɛ̀bɛ́ á n'á kàrmə̀ á nyɛ̌ rə̀ kùr mó dúdú, sə à n'â bùl b'ǎ m'ǎ j'á sú rə̀ gakó kùr náàcɛ̀nɛ́. Èlǎsɛ̃́, á nyɛ̌ rə̀ kùr námpɔ́lɛ́, sə dɛ̃ rɛ́ tɛ̀bɛ́ Cinu Yezu ká ń bàn mɔ́ yùwə̀, á wun bá yə̀ nyɛ̀n ǹdə́ nə́ba, sə nə́myɛ wun bá yə̀ nyɛ̀n ǹd'ámyɛ. 15Wɔ́ à gə́ y'à yě rə̀myɛ́ pamparɛ̃ɛ̃ mɔ́ è ce à y'à n'â yǎl a jɛ̀rɛ̀ a tó á sono, sá zhì á sono a lyɛ̃ a vò Masɛdwanɛ; à gə shí gàà mɔ́, sá ká tó á sono, mùnì ga á wun kwɛrhɛ nə zə nyɛ̀n nə súlí, sə á sɛ̃ nɛ a lyɛ̃ a yí Zhide. 17À gə́ byili b'à la rə̀myɛ́ wɔ̀rhɔ́ mɔ́, à yə̀ tɛ́rɛ́ a má byili ri nà? Nà a gə gu à wẽ́ à la kɔn wɔ̀rhɔ́, a gə zɛ̃̀ a wɔ̀ bə̀ "ɔ̃̀ɔ̃̂", a ká wɔ̀ bə̀ "ɔ̃́ɔ̃́", wɔ́ numbyíní pùbùlə̀ tum nà? 18Yi wɔ́ à zhə̀n-cí. Rə̀ cìcì yě bə̀ kɔn dɛ̀bɛ́ à byili mú də̀ wò à wò bə̀ "ɔ̃̀ɔ̃̂" a já ká wɔ̀ bə̀ "ɔ̃́ɔ̃́" myɛ yé. 19Àmyɛ́ ǹdə́ Shəlaasɛ ǹdə́ Timote gə́ bwə̀l Yi Byǐ Yezu Kristə yò w nə́ byili ába mó, rə̀ yə̀ "ɔ̃̀ɔ̃̂" yàl rə ká yə́yɛ́lɛ́ rə yə̀ "ɔ̃́ɔ̃́" yé. Ń zɔ̀mà nɛ́ yàl "ɔ̃̀ɔ̃̂" twéé twéé yilə. 20Zhə̀nà, Yezu zɔ̀mà nɛ́ wɔ́ "ɔ̃̀ɔ̃̂" Yi nyə́ né rə̀ bwəl mó gakó yilə. Wɔ́ ńmyɛ̌ dɛnnɛ nə́ r'é tó né nə́ cèrhé Yi nə́ wɔ̀ bə̀: "Amɛ̀n". 21Wɔ́ Yi cìcì rə̀ n'ê súlí nə́myɛ̌ ǹd'ámyɛ̌ ga jàn Kristə jàn yilə. Wɔ́ rə̀myɛ́ rə̀ cír nə́ba rə cĩ́ nə́ dúdú rə̀ cìcì yilə. 22Rə cĩ́ rə̀ myɔrhɔ nə́ yó, rə jɛ̀rɛ̀ rə ce rə̀ Eshirhə y nə́ wun ní wẽ́, rə mé byili bə̀ rə̀ bá pə nə́ba kɔn dɛ̀bɛ́ gakó rə̀ bwəl nə́ba rə̀ nyí mú. 23Zhə̀n zhə̀nà, Yi wɔ́ à zhə̀n-cí. À gə gòm kɔma, sá cì! Wɔ́ à gə́ t'â yǎl a zhìlì á wun ni mú è ce, à ká yə̀ kwɛ̃̀ a bə̀ Kɔrɛ̃tɛ yé. 24Á zhí Yi ni kẽkẽ, nə́ zɛ̃̀ nə́ r'é yǎl nə́ mù dwã nɛ ǹd'ába nə́ pyà á wu-nyɔ̃̀, sé də̀ yál nə́ r'é yǎl nə́ byili ába á Yi-ni-zhú mú gə́ mə̌ sə mə yə̀ nɛ́ yé.

will be added

X\