1 Tesəloniki 5

1Da-byǎ, kɔn də̀ nyɔ́ɔ́ bə̀ nə́ kɛ̃ sɛ́bɛ́ nə́ m'é byili ába yi rí ǹdə́ dɛ̃ rɛ́ tɛ̀bɛ́ Cinu bàn mɔ́ yé. 2Á cìcì mú yě pamparɛ̃ɛ̃ bə̀ dɛ̃ rɛ́ tɛ̀bɛ́ ń bàn mɔ́, ń mà n jàr nə́ba ǹdə ŋwɔ̀l-bal gə́ ya n bə̀ cəcɛ̃ nɛ nɛ́. 3Lwarna bə̀ lyì bí gə tú bə̀ n'ê wə̀l bə̀ èlǎsɛ̃́ myɛ̌, yə̀-zùlə́ ŋwɛ́nɛ́, bə̀ kaka ywẽ bə bɛ zhe, wɔ́ rə̀myɛ́ yi ní cìcì zwini bá zə bɛ ǹdə kɛ̃ pwǐ gə́ yá yì ní. Bə̀ t'â la lú yé. 4Da-byǎ, ámyɛ̌ tɛ̀nɛ́ cə-byín wẽ́ sə dɛ̃ rɛ́ rə̀myɛ́ bé jàr ába ǹdə ŋwɔ̀l-bal ta yé. 5Á gakó wɔ́ pwẽ̀ ǹdə́ nə̀nyɔ́nɔ́ lyì. Nə́ də̀ cəcɛ̃ ráá cə-byín lyì yé. 6Rə̀myɛ́ ce, nə́ bə mə̌ sə nə́ dɛ̀ɛ̀ ǹdə lyì bí dwã bɛ́ ta yé. Nə́ mə̌ sə nə́ zə nə́ yírhə́, sə nə́ zə nə́ cìn cɛ̀nɛ̀. 7Lyì bí byɛ̀bɛ́ bə̀ n'ê dɛ̀ɛ̀ mɔ́, wɔ́ cəcɛ̃ nɛ bə̀ n'ê dɛ̀ɛ̀. Byɛ̀bɛ́ bə̀ n'ê nywɛ̀ sɛ̃́ bə̀ tutwi tɛ̃́ mɔ́, wɔ́ cəcɛ̃ nɛ bə̀ n'ê nywɛ̀ mɔ̀. 8Sə nə́myɛ̌ wɔ́ pwẽ̀ lyì; nə́ mə̌ sə nə́ zə nə́ cìnə̀. Nə́ mə̌ sə nə́ zə nə́ Yi-ni-zhú mú ǹdə́ nə́ sónó w rə yə̀ kɔn dɛ̀bɛ́ nə́ la b'é cə̀r nə́ cìcì yé ne búlə́ jàà wà. Nə́ r'é dɛ̃̀ nə́ vwǎrh mɔ́. Bànà nə́ zə rə̀myɛ́ rə yə̀ ǹdə shə̀dáá cɔ̀bɔ́ yə́-pú ta nə́ pú. 9Yi yə̀ nə́ba byẽ̀ rə̀ la còrhò-tum pɔ yé. Rə̀ byẽ̀ nə́ba mùnì ga nə́ tó nə́ Cinu Yezu Kristə dɛnnɛ nə́ nə vwǎrh. 10Wɔ́ nə́myɛ̌ yil ń cùwə̀, mùnì ga, nə́ yírhə́ gə ŋwɛ́nɛ́, ráá nə́ gə cù myɛ, sə nə́ tó mo nə́ zù nyǔ mə̀ t'â la zhɔ̌ wẽ́. 11Rə̀myɛ́ ce, zəna dwã wun ni, s'á j'á n'á sɛ̃ dwã nɛ ǹdə́ cícú ǹdə á gə́ n'á wɛ̀rhɛ́ nɛ́ dwə́l ga mɔ́. 12Da-byǎ, nə́ r'é lwə̀l ába bə̀ nyámna byɛ̀bɛ́ bə̀ ŋwɛ́nɛ́ á yé né bə̀ n'ê twĩ̀ mú, bə̀ wɔ́ Cinu ń cír be bə̀ bə̀ yál á yé né bə cící ába. 13Nyámna bɛ, s'á swéné be dɛ̃́dɛ̃́ tum dí tɛ̀bɛ́ bə n'ê twĩ̀ mú yilə. Jǒmnə ǹdə́ dwã ǹdə́ yə̀-zùlə́. 14Da-byǎ, nə́ r'é lwə̀l ába: cícínə byɛ̀bɛ́ bə̀ n'ê wɛ̀rhɛ́ yààyàà mɔ́, s'á zə byɛ̀bɛ́ wu-zhìlù zhe mó wun ni. Sɛ̃na byɛ̀bɛ́ bə̀ jàn bə já mɔ́ nɛ, s'á zə cìn-pyɔ́nɔ́ ǹdə́ lyì bí gakó. 15Dɛ̃̌na á cìnə̀, lò lò bə̀ká càrh lwɛlɛ ǹ dõ ne yé, s'á pyà cɛ̀nɛ̀ ǹdə́ dwã, ǹdə́ lyì bí gakó. 16Cenə á wun yə̀ nyɛ̀n twéé twéé. 17Lwə̌lnə Yi dɛ̃ gakó. 18Cenə Yi nə̀bán kɔn gakó wẽ́. Wɔ́ èta rə̀ n'ê yǎl b'ǎmyɛ̌ byɛ̀bɛ́ á mù dwã nɛ ǹdə́ Yezu Kristə mó wɛ̀rhɛ́ nɛ́. 19Á bə̀k'á cə̀r Eshirhə náàcɛ̀nɛ́ tum dí yé ne yé. 20Á bə̀k'á fulsi zɔ̀mà nɛ́ nyɛ̀bɛ́ è n'ê tó lyì bí dɛnnɛ è zɔ̀m mɔ́ yé. 21Nyǐnə kɔn gakó náàcɛ̀nɛ́, s'á cír tɛ̀bɛ́ rə̀ càn mɔ́. 22Dɛ̃̌na á cìn ǹdə́ lwɛlɛ dwí gakó. 23Wɔ́ Yi cìcì rə̀ n'ê pɛ yə̀-zùlə́. Rə̀ bá ce á yə̀ rə̀myɛ́ lyì námpúm, sə rə yìlì á ywə́lsé ǹd'á wun ní ǹd'á yala nɛ́, á m'á dɛ̃̀ dɛ̃ rɛ́ tɛ̀bɛ́ nə́ Cinu Yezu Kristə ká ń bàn mɔ́, mùnì ga dóó bə̀ká jòm á yó w yé. 24Mɔ̀bɔ́ ń nə́ ń byẽ̀ ába mó wɔ́ zhə̀n-cí. Wɔ́ ńmyɛ̌ ń mà n wɛ̀rhɛ́ rə̀myɛ́ gakó. 25Da-byǎ, lwə̌lnə Yi nə́myɛ yilə. 26Cenə Kristə-lyì bí gakó á pə nə́ba, bə̀ nə́ wɔ́ da-byǎ. 27À n'â lwə̀l ába Cinu yil lé yilə, s'á kàrmə̀ sɛ́bɛ́ rɛ́ tɛ̀bɛ́ á byili Kristə-lyì bí gakó ne. 28Nə́ Cinu Yezu Kristə mà n cĩ́ bwəl á yó!

will be added

X\