1 Tesəloniki 3

1Rə̀myɛ́ ce, nə́ wàr nə́ b'ǎ yẽ̌ kɔn dɛnɛ yé. Nə́ j'ǎ pwírí kɔn mə̌ b'àmyɛ́ ǹdə́ Shəlvɛ̃ mɛ̃ Atɛnnɛ nɛ́. 2Wɔ́ rə̀myɛ́ è ce nə́ twĩ̀ Timote á sõ. Ń wɔ́ nə́ da-byǐ ń nə́ ń tó nə́ba ń bwə̀l Kristə yò-ècɔ̀nɔ̀ nyí rí Yi yilə. Nə́ twĩ̀ mù á sõ mùnì ga n sɛ̃ ába á kwɛrhɛ á zhí Yi ní kẽkẽ, sə n súlí á wu-jɔ̀. 3Èta, á mə̀dù ga bə̀ká n tə̀ lũ w kɔ̀bɔ́ nɔ̀nɔ̀ w yil n gə ń wu yé. Á cìcì yě bə̀ nɔ̀nɔ̀ w òmyɛ́ wɔ́ Yi pùbùlə̀. 4Nə́ gə́ y'ǎ ŋwɛ́nɛ́ á sõ yi ní, nə́ y'ǎ n'é byili ába bə̀ nyǐ nə́ b'ǎ nwɛ̀nɛ̀, s'á yě bə̀ kɔn yàl ǹdə nə́ gə́ byili ní. 5À y'à k'â wàr à bá dɛ̃̀ yé. Wɔ́ rə̀myɛ́ è ce a twĩ̀ Timote á sõ, mùnì ga a lwar á gə́ zhí Yi ni ní. Ywẽ zhe ne. Dɛ̀ga Shətana swèlè ába, sə è gə swèlè ába, sə́ nyǐ nə́ tum dí nə́ twĩ̀ á sõ mó bə kùr zhe yé. 6Sə èlǎsɛ̃́, Timote ká n shí á sõ n bà. Ń byili nə́ba á gə́ zhí Kristə ne né, ǹd'á gə́ só dwã nɛ́. Rə̀myɛ́ ce nə́ wun nyɛ̀. Ń byili nə́ba b'ǎ yə̀ nə́ yò swě yé, sə á n'á yǎl á nə nə́ba, nə́myɛ j'ǎ n'é yǎl nə́ nə ába. 7Da-byǎ, á gə́ zhí Kristə ne èta mɔ́ n'ê zal nə́ wun ni nə́ wu-zhìlù w ǹdə́ nə́ nɔ̀nɔ̀ w wẽ́. 8Èlǎsɛ̃́, nə́ wun k'â jě, á gə́ gwẽ̌ zhí Cinu ni kẽkẽ mó yilə. 9Nə́ yə̀l nə́ gə́ m'ǎ ce Yi nə̀bán nɛ́ á yil yé, b'ǎ n'á pɛ nə́ba wu-nyɔ̃̀ nánfɔ̀lɔ̀ rə̀ yé né. 10Cəcɛ̃ ǹdə́ nə̀nyɔ́nɔ́ ga, nə́ r'é lwə̀l Yi ǹdə́ nə́ wun gakó bə̀ rə̀ ce nə́ k'á nə ába, sə nə́ sɛ̃ ába á lwar kɔn dɛ̀bɛ́ á yə̀ ŋwɛ̀nɛ́ á lwar á Yi-ni-zhú mú shò-kwã nɛ́ mɔ́. 11Nə́ Da Yi cìcì ǹdə́ nə́ Cinu Yezu bá kwɛrhɛ nə́ sɔ́má y mùnì ga nə́ ŋwɛ̀nɛ́ nə́ b'ǎ sõ! 12Cinu mà n ce á kwɛrhɛ á swéné dwã, s'á kwɛrhɛ á swéné lyì bí gakó twéé twéé, ǹdə nə́ gə́ só ába né mó. 13Èta, ń mà n súlí á wu-jɔ̀. Nə́ Cinu Yezu gə tú ǹdə́ ń lyì bí gakó yùwə̀, á m'ǎ yə̀ nə́ Da Yi lyì námpúm, dóó t'â la á yó w jǒm yé.

will be added

X\