1 Pyɛɛrɛ 3

1Kana, ámyɛ zwẽnə á byə́nə́ bé nyí ni. Èta, bá bə̀ jàlà gə gwẽ̌ t'â zwẽ Yi zɔ̀mɛ̀ rɛ́ myɛ, á tùntwə̃̀ə̃̀ né bá ce bə zwẽ nyí ǹd'á yə̀ á nyí púr yé, 2bə̀ bə̀ má pwírí á zhe á cìn cɛ̀nɛ̀, á n'á nyàm bɛ̀, á t'á wɛ̀rhɛ́ yààyàà yé. 3Á bə̀k'á pyà gàndɛ̀ tɛ̀bɛ́ rə̀ càn zú, á bə á ywẽ́, á ce sánə́má cìbyǔr, á kwɛrhɛ á yala nɛ́. E yə̀ rə̀myɛ́ dúdú á la m'á byili á cɛ̀nɛ̀ yé. 4Á cɛ̀nɛ̀ rɛ́ mə̌ sə rə yə̀ á wun ní wẽ́ rə̀ ŋwɛ́nɛ́, s'á zə wu-bɔ̀nɔ̀, á yə̀ kana byɛ̀bɛ́ bə̀ nyɛ̌ shɛ́shɛ́. Cɛ̀nɛ̀ rɛ́ rə̀myɛ́ mɔ́ t'â lyɛ̃ yé, e j'à wɔ́ rə̀myɛ́ dwí rí Yi n'ê yàlá. 5Wɔ́ èta shãã ga kana bɛ́ byɛ̀bɛ́ bə̀ y'à zhí Yi ni bə̀ n'ê dɛ̃̀ rə̀ nyì-bwelé y pyǐrh mó y'à n'ê wɛ̀rhɛ́ nɛ́, bə̀ m'ê byili bə̀ bə̀ càn, bə̀ gə́ y'à n'ê zwẽ bə̀ byə́nə́ bé nyí ni mú yilə. 6Wɛ̀rhɛ́na ǹdə Sara ta. Ń gə́ yà ń nə́ ń zwẽ Abəraham nyí ni mú ce, ń yà ń nə́ ń byẽ̀ mò bə̀ ń yó-cə́bal. Ámyɛ gə n'á twĩ̀ cɛ̀nɛ̀, á t'á dùr kaka ywẽ, sə́ nyǐ á wɔ́ Sara bə̀kwá. 7Bala, ámyɛ mə̌ s'á jòm ǹd'á kana bɛ́ cɛ̀nɛ̀, á nyǐ bə̀ yò. Á mə̌ s'á lwar bə̀ bə̀ wɔ́ kana, bə̀ jàn dɛ́ bə já yé. Zəna bɛ ǹdə́ nyɔ̀mɔ̀, b'ǎmyɛ̌ ǹdə́ bə̀myɛ́ ga mə̌ s'á tó dwã á nə nyǔ mə̀ t'â la zhɔ̌ pɛnɛ́ y Yi sõ. Á gə wɛ̀rhɛ́ èta, kaka t'â la á yé ne cə̌r á Yi-co wẽ́ yé. 8Tɛ̀bɛ́ rə̀ dàl mɔ́, cenə á gakó bùlə̀ né yə̀ rə̀dù, s'á surhə né myɛ yə̀ rə̀dù. Swénénə dwã ǹdə da-byǎ ta. Zəna nɔ̀nɔ̀-dǔr ǹdə́ cìn-lwəl ǹdə́ dwã. 9Lò gə wɛ̀rhɛ́ mɔ́ lwɛlɛ, sə ǹ bə̀ká wɛ̀rhɛ́ mɔ lwɛlɛ yé. Lò gə tùrh mó, sə ǹ bə̀ká tùrh mò yé. Ǹ gaga mɔ́ wál bə̀ Yi bá cĩ́ bwəl ń yó, bə̀ Yi gə́ byẽ̀ ába mó, rə̀ bwəl nyí bə̀ rə̀ bá cĩ́ bwəl á yó. 10Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: "Lò mɔ̀bɔ́ ǹ nə́ ǹ yǎl ń swéné ǹ cìnə̀, sə ǹ wu myɛ já yə̀ nyɛ̀n; sə ǹ bə̀ká shɛ̀nɛ́ ǹ mə̀jòlò w púr lwɛlɛ gaga yé; sə ǹ bə̀ká shɛ̀nɛ́ kɔma myɛ shí ǹ nyú w yé. 11Ǹ mə̌ sə́ cẽ lwɛlɛ wɔ̀rhɔ́ yò, sə́ wɛ̀rhɛ́ cɛ̀nɛ̀; sə́ pyà bə̀ yə̀-zùlə́ yál nɛ́ twéé twéé. 12Zhə̀nà, Cinu yírhə́ pyǎ wu-cángá cìnə́ yó, ń nə́ ń zwẽ bə̀ lwə̌l, sə ń bə lyì bí byɛ̀bɛ́ bə̀ n'ê wɛ̀rhɛ́ lwɛlɛ mɔ́ só yé." 13Á gə n'á ce yə̀wǎl nɛ́ ǹdə́ cɛ̀nɛ̀ wɔ̀rhɔ́, mɔ̌ ń mà n wɛ̀rhɛ́ ába lwɛlɛ? 14Á gə n'á wɛ̀rhɛ́ cɛ̀nɛ̀, bá á gə n'á nwɛ̀nɛ̀ rə̀myɛ́ yil myɛ, á b'ǎ nə wu-nyɔ̃̀. Á bə̀k'á dùr numbyínsí ywẽ yé, s'á bə̀k'á cĩ́ twə́lə́ á wẽ́ yé. 15Nyámna Kristə á wun ní wẽ́, bə̀ wɔ́ ńmyɛ̌ ń cǐ ába, s'á tɛnɛ, lò gə tú ń nə́ ń bwə̀rh ába kɔn dɛ̀bɛ́ rə̀ ce á n'á dɛ̃̀ kɔn Kristə sõ mó, s'á ŋwɛ̀nɛ́ á lyár mɔ, 16sé yə̀ ǹdə́ wu-bɔ̀nɔ̀ ǹdə́ cìn-lwəl. Cenə jàn nɛ́ á yə̀ lyì byɛ̀bɛ́ bə̀ n'ê nyàm Yi ǹdə́ wu-põ̀ námpúm. Twĩ̌nə á tùm-ècɛ̀nà nɛ́ Kristə jàn yil mó ǹdə́ wu òdù, mùnì ga lyì bí byɛ̀bɛ́ bə̀ n'ê zɔ̀m á yil námməlwɛ̀lɛ́ mɔ́ jí cìzhìlə̀. 17Á nɔ̀nɔ̀ w á tùm-ècɛ̀nà nɛ́ yil mó gə wɔ́ Yi pùbùlə̀, rə̀myɛ́ cɔ̃̀ á gə n'á nwɛ̀nɛ̀ tùm-bəlwǎlsɛ yilə. 18Kristə myɛ cìcì nwɛ̀nɛ̀, n cì numbyínə́ bé yə̀-bəlwàálɛ́ yil twər rə̀dù sá, twéé gakó yilə. Ń yà ń bə dóó zhe yé, sə ń cù lyì-bəlwǎlsɛ yilə, mùnì n zə ába n vò Yi sõ. Bə̀ gu mu ń gə́ wɔ́ numbyíní mú yilə, sə Eshirhə náàcɛ̀nɛ́ ká bwìrhì mù. 19Eshirhə y èmyɛ́ èdù y jàn yil ń zhə̀l byɛ̀bɛ́ bə̀ cù ǹdə́ bə̀ yə̀ cìn-cìnú nɛ mɔ́ sõ, n bwə̀l Yi zɔ̀mɛ̀ rɛ́ n byili bi. 20Wɔ́ byɛ̀bɛ́ bə̀ cẽ Yi nyí ni shãã ga, Nəwee gə́ yà ń nə́ ń fwar kùlkṍ w yi ní mú. Yi zhìlì rə̀ yala nɛ rə dɛ̃̀ dɛ̃̀ bɛ̀ rə ga. Lyì bí byɛ̀bɛ́ bə̀ zù ò wẽ́ mó y'à wɔ́ lyì màngɛlɛ́, nunə lyɛlɛ sásá. Bə̀myɛ́ dúdú bə̀ zwẽ bə̀ cìn nɛ̃̌ mɔ́ wa. 21Sə rə̀myɛ́ wɔ́ nɛ̃̌-shɔ mɔ́ Yi n'ê tó mə̀ dɛnnɛ rə vwǎrh ába zà zà mɔ́ nyɔrhɔ. Nɛ̃̌-shɔ mɔ́ t'â shàrh yala jìmdì yé. Sə ǹ nə́ ǹ tó mə̀ dɛnnɛ ǹ pɛ ǹ cìn námpúm Yi ni ǹdə́ ǹ wu gakó, Yezu Kristə gə́ cù n ká n bwìrhì mú jàn yilə. 22Ń zhə̀l ń jě Yi jə̀jĩ́ ni, ń nə́ ń jí pyɛ̀lɛ̀ màlɛ́kabá ǹdə́ dɛ̃̌ jàn cìnə́ bé dwã bɛ́ yó w Arəzana wa.

will be added

X\