1 Pyɛɛrɛ 1

1Àmyɛ́ Yezu Kristə tùntúm Pyɛɛrɛ, à n'â kɛ̃ sɛ́bɛ́ rɛ́ tɛ̀bɛ́ à la ámyɛ̌ byɛ̀bɛ́ Yi cír mó ne pɔ. Á làà dɛ̃̌ á vò á wɔ́ zhələ Pɔ̃ ǹdə́ Galəshi ǹdə́ Kapadɔɔsɛ ǹdə́ Azhi, e súlí Byitini tənèsé wẽ́. 2Nə́ Da Yi cír ába ǹdə rə̀ gə́ y'à dámǎ rə kə́ rə cĩ́ ní. Rə ce á jǐrh rə̀ sə̀pwà lyì rə̀ Eshirhə y jàn yilə, mùnì á zwẽ Yezu Kristə nyí ni, sə ń jal mɔ́ vùr á yə̀-bəlwàálɛ́ á jǐrh wárhgáá. Yi bá cĩ́ bwəl á yó, sə rə̀ yə̀-zùlə́ né j'â n'ê súlí á yó w twéé twéé! 3Bànà nə́ cèrhé nə́ Cinu Yezu Kristə Da Yi rí! Rə̀ nɔ̀nɔ̀-dǔr mó já. Rə̀myɛ́ ce, rə̀ tó Yezu Kristə bùrhù mú dɛnnɛ rə ce bə kwɛrhɛ bə lù nə́ba. Èta, rə̀ ce nə́ r'é dɛ̃̀ kɔn dɛ́ tɛ̀bɛ́ rə̀ la nə́ba pɔ rə̀ t'â cɔ̀ mɔ́. 4Sə nə́ wun nyɛ̀ nə̀cɛ̀ndɛ́ tɛ̀bɛ́ Yi tɛnɛ rə cĩ́ nə́myɛ̌ byɛ̀bɛ́ nə́ wɔ́ rə̀ lyì ni mú yilə. Nə̀cɛ̀ndɛ́ rə̀myɛ́ wàr rə̀ la cɔ̌, rə̀ wàr rə̀ la jìmdì zal, rə̀ wàr rə̀ la zhɔ̌ myɛ yé. Yi tɛnɛ rɛ rə cĩ́ ába Arəzana wa. 5Sə á gə́ zhí Yi ni mú ce, rə̀ n'ê yìlì ába ǹdə́ rə̀ jàn dɛ́, kɔn la mé yí á nə rə̀ vwǎrh mɔ́. Sə lũ zhɔ̌ dɛ̃ rɛ́ yùwə̀, rə̀ bá ce lò gakó nə rə̀ vwǎrh mɔ́ ǹdə́ ń yírhə́. 6Wɔ́ rə̀myɛ́ è ce á wun nyɛ̀ dɛ̃́dɛ̃́, ǹd'á yě bə̀ wẽ̀ nánzhəzhɔ̌ bá ce á nə wu-zhìlù námpɔ́lɛ́ ga. 7Wẽ̀ dé rə̀myɛ́ wɔ́ zhẽ́ rə̀ n'ê zhẽ̀ ába, mùnì bə lwar ǹd'á gə zhí Yi ni kẽkẽ. Sánə́má wɔ̌ mə̀ cɔ̀, sə ǹdə́ rə̀myɛ́ ga, bə̀ yá ce mo myǐn w bə nyǐ ǹdə́ mə̀ gə càn. Sə ámyɛ̌ Yi-ni-zhú mú zhe kùr dɛ̃́dɛ̃́ du sánə́má. Wẽ̀ dé gə n'ê zhẽ̀ ába, bə̀ má tó rə̀myɛ́ dɛnnɛ bə lwar ǹd'á Yi-ni-zhú mú gə wɔ́ kẽkẽ. Èta, Yezu Kristə gə túwə́, á b'ǎ tó á nə Yi còrhó w ǹdə́ rə̀ zùwə́ yə́. 8Á yə̀ mɔ nɛ yé, á j'ǎ só mo; á zhí mu, á yírhə́ j'à bə mɔ nɛ èlǎsɛ̃́ yé, á n'á fùù ǹdə́ wu-nyɔ̃̀ nánfɔ̀lɔ̀ kɔ̀bɔ́ lò wàr ń la byilu ǹdə́ ń nyí, 9bə̀ ń nə́ ń vwǎrh ába. Wɔ́ rə̀myɛ́ rə̀ wɔ́ á Yi-ni-zhú mú kùr ré. 10Yi nyì-zwennə bé y'à jɛ̀rɛ̀ bə zɔ̀m vwǎrh mɔ́ mə̀ wɔ́ pɛnɛ́ y Yi tɛnɛ á yil mó yò. Sə bə̀ y'à n'ê pyà ǹdə́ bə̀ wun gakó sə bə lwar rə̀ gə́ la lyì bí ní vwǎrh. 11Kristə Eshirhə y y'à ŋwɛ́nɛ́ ǹdə́ bɛ, e dámǎ e byili bi nɔ̀nɔ̀ w kɔ̀bɔ́ Kristə mó la nɔ̀nɔ̀ mɔ́, ǹdə́ zùwə́ y kɛ̀bɛ́ ń la tà-kwã n nə nɔ̀nɔ̀ w kwã nɛ́ mɔ́ yò. Sə bə̀ y'à n'ê pyà sə bə lwar yi rí tɛ̀bɛ́ ywẽ̀ né nə̀myɛ́ la wɔ̀rhɔ́ mɔ́, ǹdə́ nə̀ gə́ la nɛ́ tó mó. 12Sə Yi ce rə̀ nyì-zwennə bé lwar bə̀ ywẽ̀ né nyɛ̀bɛ́ bə̀ byili èta mɔ́ də̀ bə̀myɛ́ cìcì yil yé; wɔ́ ámyɛ̌ yilə. Sə èlǎsɛ̃́, byɛ̀bɛ́ bə̀ bwə̀l yò-ècɔ̀nɔ̀ nyí rí bə byili ába mó, tó rə̀ dɛnnɛ bə byili ába ywẽ̀ né nə̀myɛ́ ǹdə́ Eshirhə náàcɛ̀nɛ́ y è shí dɛ̃̌ Arəzana w mɔ́ jàn. Màlɛ́kabá cìcì mú n'ê yǎl ǹdə́ bə̀ wun gakó sə bə lwar nə̀ kùrə̀. 13Rə̀myɛ́ ce, zəna á surhə né nə zhì kẽkẽ, s'á zə á cìn á m'á dɛ̃̀ pɛnɛ́ y nánfwɛ̀lɛ̀ y kɛ̀bɛ́ Yi la ába pɔ Yezu Kristə twírí y yù w mú. 14Zwẽnə Yi nyí ni, s'á bə̀k'á tó shilə námməlwǎlsɛ́ sə̀ y'à ŋwɛ́nɛ́ á wun ní wẽ́ shãã ga, ǹd'á gwẽ̌ yə̀l Kristə pár mɔ́ nɛ yé. 15Yálna náàcɛ̀nà á tùntwə̃̀ə̃̀ né gakó wẽ́ ǹdə mɔ̀bɔ́ ń byẽ̀ ába mó gə́ wɔ́ náàcɛ̀nɛ́ nɛ́. 16Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀: "Yálna náàcɛ̀nà, b'àmyɛ́ wɔ́ náàcɛ̀nɛ́." 17Yi t'â zə rə̀ yírhə́ rə̀ cír lyì bí yé. Rə̀ n'ê kɛ́ lò gakó bùrsì kɔn myɛrhɛ dwã ǹdə́ ǹ tùntwə̃̀ə̃̀ né. Wɔ́ Yi rí rə̀myɛ́ á n'á byẽ̀ b'ǎ Da á Yi-co wẽ́ mó. Rə̀myɛ́ ce, á mə̌ s'á tó á tùntwə̃̀ə̃̀ né dɛnnɛ á byili, ǹd'á gwẽ̌ ŋwɛ́nɛ́ cɛ yó, b'ǎ n'á nyàm dɛ̀. 18Lwarna b'è də̀ sánə́má, ǹdə́ wársɛ, ǹdə́ wẽ̀ tɛ̀bɛ́ gakó rə̀ n'ê cɔ̀ mɔ́, Yi bé zwẽ ába tùntwə̃̀ə̃̀ né nyɛ̀bɛ́ á dabá cèrhè ába nə̀ bə kùr zhe mó wẽ́ yé. 19Wɔ́ kɔn dɛ̀bɛ́ rə̀ zhe kùr dɛ̃́dɛ̃́ du mú Yi zɔ rə mé vwǎrh ába. Sə kɔn dɛ́ rə̀myɛ́ mɔ́ wɔ́ Kristə jal mɔ́ mə̀ ló tɛ̃́ mɔ́. Ń wɔ́ ǹdə pyì-bwɛ̀lɛ́ kɛ̀bɛ́ è bə yò zhe, e j'à bə jìmdì zhe ta. 20Yi cír mo ǹdə́ rə̀ gwẽ̌ yə̀ lũ w wɛ̀rhɛ́ yé. Wɔ́ ámyɛ̌ yil Yi twĩ̀ mù n bə̀ dwã nɛ́ nánkwaá nɛ́ wẽ́ èlǎsɛ̃́, rə ce á lwar ń párá. 21Wɔ́ ńmyɛ̌ jàn yil á zù Yi rí rə̀ bwìrhì mù, rə pɔ̃ zùwə́ mó; á zhí ri, á m'á dɛ̃̀ rə̀ nyì-bwelé y pyǐrh mó. 22Á gə́ zwẽ zhə̀n dɛ́ mɔ́ ce, á yò kwɛrhɛ á jǐrh wárhgáá, á m'á ŋwɛ̀nɛ́ á swéné á da-byǎ bɛ́ zhə̀n zhə̀nà. Rə̀myɛ́ yilə, swénénə dwã ǹd'á wun gakó. 23Yi zɔ̀mɛ̀ rɛ́ ce bə ká kwɛrhɛ bə lù ába, sə Yi zɔ̀mɛ̀ rɛ́ də̀ ǹdə jíjí byǐ ta rə̀ yá lyĩ rə ká cì yé. Rə̀ wɔ́ nã́nyì, rə̀ t'â cì yé. Rə̀ j'â ŋwɛ́nɛ́ gaga byinə nə̀ bə zhɔ̌ zhe yilə. 24Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: "Numbyíní wɔ́ ǹdə gɔ ta. È zùwə́ y myɛ wɔ́ ǹdə gɔ pùnə́ ta. Gɔ w n'ô kùlə̀, ò pùnə́ né n'ê shìl tɛ̃́, 25sə Cinu zɔ̀mɛ̀ rɛ́ j'â ŋwɛ́nɛ́ byinə nə̀ bə zhɔ̌ zhe yilə."Zɔ̀mɛ̀ rɛ́ rə̀myɛ́ mɔ́ wɔ́ yò-ècɔ̀nɔ̀ nyí rí bə̀ bwə̀l bə byili ába mó.

will be added

X\