1 Kɔrɛ̃tɛ 1

1Àmyɛ́ Pwəə, Yi byẽ̀ nè ǹdə́ rə̀ pùbùlə̀ b'à yál Yezu Kristə tùntúm. Wɔ́ àmyɛ́ ǹdə́ nə́ da-byǐ Sɔsətɛnnɛ nə́ r'é kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ byɛ̀bɛ́ á wɔ́ Yi gùlú w lyì bí, á ŋwɛ́nɛ́ Kɔrɛ̃tɛ nɛ́ mɔ́ nɛ pɔ. Yi byẽ̀ ába b'ǎ yál rə̀ lyì Yezu Kristə jàn yilə, ǹdə́ byɛ̀bɛ́ bə̀ ŋwɛ́nɛ́ jààsɛ́ gakó wẽ́, bə̀ n'ê cèrhé Yezu Kristə mó, ń wɔ́ nə́myɛ̌ ǹdə́ bə̀myɛ́ ga Cinu. 3Nə́ Da Yi ǹdə́ Cinu Yezu Kristə bá cĩ́ bwəl á yó, sə bə pə ába yə̀-zùlə́! 4À n'â ce Yi nə̀bán á yil twéé gakó yò-ècɛ̀nà nɛ́ nyɛ̀bɛ́ rə̀ wɛ̀rhɛ́ ába Yezu Kristə jàn yil mó yilə. 5Zhə̀nà, Yi pɔ ába rə̀ pansɛ nánzhəzhɔ̌ Yezu Kristə yilə. Sə kɔn du, rə̀ pɔ ába rə̀ zɔ̀mɛ̀ rɛ́ bwə̌l mó, rə já pə ába lárma. 6Bə̀ bwə̀l Kristə yò w bə byili ába, sə á zwẽ ò nyí zhə̀nà. 7Rə̀myɛ́ ce, Yi pɛnɛ́ èdù ga yə̀ ámyɛ̌ byɛ̀bɛ́ á n'á dɛ̃̀ nə́ Cinu Yezu Kristə twírí y mú mwìrì yé. 8Wɔ́ Yi rə̀ bá ce á zhì kẽkẽ kɔn mé yí dɛ̃ rɛ́ tɛ̀bɛ́ nə́ Cinu Yezu Kristə mà n ká n bə̀ mɔ́, sə yò t'â la á yó w yál ń twírí y yù w yé. 9Yi wɔ́ zhə̀n-cí. Wɔ́ rə̀myɛ́ rə̀ byẽ̀ ába b'ǎ mú rə̀ Byǐ nə́ Cinu Yezu Kristə ne mó. 10Da-byǎ, à n'â lwə̀l ába nə́ Cinu Yezu Kristə yil lé yilə: nyɛ̀ɛ̀nà dwã zɔ̀mà kùrə̀; pɔrá bə̀ká yə̀ á bwə̌l w yé; cenə á nyí yə̀ rə̀dù námpúm; cenə á pùbùlə̀ né yə̀ rə̀dù, sə á surhə né myɛ yə̀ rə̀dù. 11Zhə̀nà, da-byǎ, lyì shí Kolowe dǒ sõ bə bé byili ni b'ǎ nyí bə dwã mə̌ yé. 12Kɔn dɛ̀bɛ́ à n'â yǎl a wɔ̀ mɔ́, wɔ́: á jàlà n'ê wə̀l bə̀ bə̀myɛ́ wɔ́ Pwəə kwã-lyì, jàlà wɔ̀ bə̀ bə̀myɛ́ wɔ́ Apɔlɔɔsɛ kwã-lyì, jàlà myɛ wɔ̀ bə̀ bə̀myɛ́ wɔ́ Kəfaasɛ kwã-lyì, jàlà wɔ̀ bə̀ bə̀myɛ́ wɔ́ Kristə kwã-lyì. 13Kristə bɔ̀n dwã w kə̀kàlsɛ̀ nánzhəzhɔ̌ nà? Wɔ́ Pwəə bə̀ pəpa də̀-jɔrhɔ́ w yó á yil nà? Nà wɔ́ Pwəə yil lé yil á zwẽ nɛ̃̌-shɔ wá? 14À n'â ce Yi nə̀báná à gə́ yə̀ nɛ̃̌-shɔ á mə̀dù ga nɛ pɛ mɔ́ yilə. Wɔ́ Kərsəpuusi ǹdə́ Gəyuusi dúdú ni àmyɛ́ pɔ nɛ̃̌-shɔ. 15Èta, lò lò wàr ń mà n wɔ̀ bə̀ wɔ́ àmyɛ́ yil lé yil ń zwẽ nɛ̃̌-shɔ yé. 16Zhə̀nà, à pɔ nɛ̃̌-shɔ Sətəfanaasɛ kɛ̀lɛ́ y lyì bí ni, sə à t'â bùl b'à pɔ nɛ̃̌-shɔ lò dõ ne yé. 17Kristə yə̀ nɛ̀ twĩ̀ b'à pə nɛ̃̌-shɔ yé. Ń twĩ̀ nì b'à bwə̌l yò-ècɔ̀nɔ̀ nyí rí, sə à bə̀ká bwə̀l lè ǹdə́ numbyínsi lárma zɔ̀mà yé. Èta, ń cu mú də̀-jɔrhɔ́ w yó mó t'â la nánfò yál yé. 18Bə̀ gə́ n'ê bwə̀l bə̀ Kristə cù də̀-jɔrhɔ́ w yó mó, zɔ̀mà nɛ́ nə̀myɛ́ nyɛ̌ ǹdə nyə̀nyààrɛ̀ ta byɛ̀bɛ́ bə̀ yò n'ô yǎl o zhìlì mú yilə. Sə è gə wɔ́ nə́myɛ̌ byɛ̀bɛ́ nə́ ŋwɛ́nɛ́ vwǎrh mɔ́ sɔ́má y yó mó yilə, nə̀ wɔ́ Yi jàn. 19Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə̀ Yi wòwə̀: "À bá cɔ̀ surhə cìnə́ bé surhə né; a ce lárma cìnə́ bé lárma mɔ́ jǐrh nánfò." 20Surhə cə́bal nə kə́ ń zhe kùrə̀? Byɛ̀bɛ́ bə̀ n'ê byili nyə́ né bə̀ dwã bɛ́ nɛ mɔ́, ǹdə́ byɛ̀bɛ́ bə̀ yě lũ w kɔ̀bɔ́ zɔ̀mà nɛ́ zɔ̌m mɔ́, bə̀myɛ nə k'ê zhe kùrə̀? Nyǐnə Yi ce lũ w surhə né jǐrh nyə̀nyààrɛ̀ kɔna. 21Lũ w lyì bí nɔ Yi surhə né, sə bə̀ yə̀ ŋwɛ̀nɛ́ bə lwar Yi pár ǹdə́ bə̀ cìcì surhə né yé. Wɔ́ rə̀myɛ́ è ce, rə̀ zɔ̀mɛ̀ rɛ́ rə̀ nyɛ̌ ǹdə nyə̀nyààrɛ̀ kɔn ta mɔ́, Yi pwírí kɔn mə̌ bə̀ rə̀ vwǎrh lyì bí byɛ̀bɛ́ bə̀ zù rì zɔ̀mɛ̀ rɛ́ rə̀myɛ́ jàn yil mó. 22Zhwifubá n'ê yǎl bə nə màmyaarhɛ; byɛ̀bɛ́ bə̀ də̀ Zhwifubá mó n'ê yǎl surhə zɔ̀mà. 23Sə nə́myɛ̌ wɔ́ Kristə mó bə̀ pəpa də̀-jɔrhɔ́ w yó mó yò nə́ r'é bwə̀l nə́ byili. Zhwifubá bə shɛ̀ rə̀myɛ́ yò yé; rə̀ wɔ́ nyə̀nyààrɛ̀ kɔn byɛ̀bɛ́ bə̀ də̀ Zhwifubá mó yilə. 24Sə è gə wɔ́ byɛ̀bɛ́ Yi byẽ̀ mó yilə, ǹ gə wɔ́ Zhwifu, ǹ gə də̀ Zhwifu myɛ, Kristə wɔ́ Yi jàn ǹdə́ rə̀ surhə. 25Tɛ̀bɛ́ bə̀ n'ê bùl bə̀ rə̀ wɔ́ nyə̀nyààrɛ̀ kɔn Yi yil mó, du numbyíní surhə; tɛ̀bɛ́ bə̀ n'ê bùl bə̀ rə̀ wɔ́ nə̀bwɛ̀nɛ̀ kɔn Yi yil mó, du numbyíní jàn. 26Da-byǎ, nyǐnə ámyɛ̌ byɛ̀bɛ́ Yi byẽ̀ mó wẽ́ á nyìwé: è gə wɔ́ lũ w nyə̀ná nɛ́ yilə, surhə cìnə́ bə já á wẽ́ yé, jàn cìnə́ myɛ bə já yé; e jà lyì-fwààlɛ̀ myɛ bə já yé. 27Sə Yi cír kɔn dɛ̀bɛ́ rə̀ wɔ́ nyə̀nyààrɛ̀ kɔn lũ w yil mó, rə bé ce surhə cìnə́ cìzhìlə̀. Rə cír kɔn dɛ̀bɛ́ rə̀ wɔ́ bə-jàn-zhəəre kɔn lũ w yil mó, rə bé ce jàn cìnə́ cìzhìlə̀. 28Yi cír kɔn dɛ̀bɛ́ rə̀ bə kùr zhe, tɛ̀bɛ́ rə̀ yə̀ yírh swí, tɛ̀bɛ́ rə̀ də̀ kaka lũ w yil mó, rə bé cɔ̀ kɔn dɛ̀bɛ́ rə̀ zhe kùr ò yil mó. 29Rə̀ wɛ̀rhɛ́ èta, mùnì ga lò lò bə̀ká n zhẽ̌ ń cìn dɛ̃̌ rə̀myɛ́ Yi yé né yé. 30Wɔ́ rə̀myɛ́ rə̀ mù ába dwã nɛ ǹdə́ Yezu Kristə. Wɔ́ Kristə ń jǐrh surhə né nə̀ shí Yi sõ nə́myɛ̌ yil mó. Wɔ́ ńmyɛ̌ jàn yil Yi ce nə́ k'é bə dwə́ə́re zhe, rə ce nə́ jǐrh rə̀myɛ́ lyì námpúm, rə zwẽ nə́ba nə́ yə̀-bəlwàálɛ́ wẽ́, 31mùnì kɔn yə̀ ǹdə bə̀ gə́ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ né. Bə̀ kɛ̃ bə wɔ̀: "Lò mɔ̀bɔ́ ǹ nə́ ǹ yǎl ń cèrhé ǹ cìnə̀, sə́ cèrhé ǹ cìn kɔn dɛ́ dɛ̀bɛ́ Cinu wɛ̀rhɛ́ mɔ́ yilə."

will be added

X\