Tite 2

1Gaŋ naai se, 'dooy jeege ute taargen kɛn ɓaa ute taar Isa al‑Masi kɛn salal se. 2Ɔɔ taaɗ gaab‑gɔɔlge tu se ɔɔ k'bɔɔb roɗe, k'tɛɗ jeege aɗen kaal maak ki, k'j'iŋg do mɛtɛkɗege tu, j'ɔk taar Raaɗe jiga, k'je jeege ute maakɗe paac ɔɔ do nakge tun ese paac se j'aay kaamɗe do ki. 3Bin se mɛnd‑gɔɔlge se kic ɓo taaɗɗen k'tɛɗn nakŋ kɛn tɔɔl Raa ki, j'ɔn̰te kɔɔɗn jeege j'ɔn̰te tɛɗn mɛnd kaayge num k'dooy jeege gɛn tɛɗn nakgen bɛɛ. 4K'dɛjn̰ mɛndgen sɛɛm se naŋa kic ɓo je gaabin̰a ute gɛnin̰ge, 5k'j'iŋg do mɛtɛkɗege tu ɔɔ k'bɔɔb j'ɔk roɗe bɛɛ k'tɛɗ mɛnd kiŋg ɓeege, k'tɛɗ mɛndgen jiga k'booy j'uun taar gaabɗege. Taa bin se nam kuuy kɔŋ taaɗn iŋg kus ro taar Raa ki eyo. 6Ɔɔ gaan kɔɗge se kic ɓo dɛjɗe j'iŋg do mɛtɛkɗe ki, 7do nakge tun ɓaa se paac. Naai mala 'tɛɗn nakgen jiga kɛn jeege aakga kic num 'kuun bɔlɔti. Kɛn dooy jeege ute taar Raa se, dooyɗe ute maaki paac taa naaɗe ai kaal maak ki. 8Taargen naai an 'dooy jeege se, dooyɗe te taargen kɛn mɛt ki kɛn jeege kɔŋ taar iŋg kus maak ki eyo, bin se taa jee taamooyjege se sɔkɔn̰ɔ aɗen tɔɔlɔ taa naaɗe ɔŋ te taar ɗim kusin̰ jaay gɛn taaɗn rojege tu eyo. 9Taaɗ ɓulge tu ɔɔ daayum k'sook mɛlɗege tu do nakge tun k'tɛɗn paac. K'tɛɗ nakgen 'raapm maakŋ mɛlɗege ɔɔ j'ɔn̰te naajn̰ taara ute naaɗe. 10J'ɔn̰te ɓoogŋ ɗim mɛlɗege ɔɔ daayum j'ɔn̰te tujn̰ ɔrmɗege ute mɛlɗege. Kɛn naaɗe jaay k'tɛɗ naan̰ se, 'kɔl jeege paac kaal taar Raa Mɛl Kaajjege se maak ki. 11Taa Raa se taaɗga bɛɛn̰a, bɛɛn̰ se ɓo kɛn aaj jeege paac. 12Bɛɛn̰ se, dooyjeki taa j'aki kɔn̰ nakgen jig eyo naanin̰ ki ɔɔ j'aki kɔn̰ gɛn dɔŋ nakgen jee jeel Raa mal eyo lee dɔŋ se kici. Bin se j'aki kɔŋ kiŋg do naaŋ kɛn ara ki se, j'aki bɔɔbm kɔkŋ rojege, j'aki tɛɗn nakgen ute ɗoobin̰a ɔɔ j'aki kɔkŋ taar Raa se ɔɔn̰ɔ, 13j'aki kaakŋ kaam ɓii kɛn Isa al‑Masi aɗe ɓaa, naan̰ ɓo debm naaje j'ɔndki dojege don̰ ki. Naan̰ ɓo Raa magal Debm Kaaja ɔɔ debm tɔɔgɔ. 14Isa al‑Masi se, naan̰ mala ɓo ɔn̰ ron̰ ooy taa naajege taa ajeki dugŋ dojege maakŋ kusin̰ ki. Ɔɔ naan̰ tugjeki kusin̰jege se, taa j'aki tɛɗn jee naan̰gen mala mala, jee daayum maakɗe raap sakan̰ gɛn tɛɗn nakgen jiga naanin̰ ki. 15Kɛse ɓo taar kɛn naai an dooy jeege, an dɛjɛ ɔɔ an mooy jeege ute tɔɔgi. Ɔɔ naai se nam ɔn̰ten kaaki aan gɔɔ debm cɛrɛ.

will be added

X\