Romains 7

1Gɛnaamge, m'je m'asen taaɗn ute ɗoobm kɛn jikilimge lee uuno ɔɔ maam m'jeele ɗoobm se naase kic 'jeelin̰ki, ɗoobm jikilimge lee tɛɗ se ɔk tɔɔgɔ do debkilim ki kaaɗ kɛn naan̰ utu zɛɛr sum. 2'Booyki m'asen taaɗa: mɛnda jaay ɔkga gaaba se. Kaaɗ kɛn jaay gaabin̰ utu iŋg zɛɛr se, ɗoobm jikilimge lee tɛɗ se, gaasin̰ gɛn rɛsn gaabin̰a. Num kɛn gaabin̰ jaay ooyga se, ɗoobm jikilimge lee tɛɗ se, ɔk tɔɔgɔ don̰ ki ey sum ɔɔ naan̰ kɔŋ kɔkŋ gaabm kuuy. 3Anum kɛn gaabin̰ utu zɛɛr sum ɓo, naan̰ teec ɓaa ɔk gaabm kuuy se, j'an̰ daŋin̰ mɛnd kɛɛsn gaaba. Num kɛn gaabin̰ jaay ooyga se, ɗoobm kɛn jikilimge lee tɛɗ se ɔk tɔɔgɔ don̰ ki ey sum. Kɛn naan̰ ɔk gaaba kuuy kic ɓo, j'an̰ kɔŋ daŋ mɛnd kɛɛsn gaaba ey sum. 4Gɛnaamge, naase kic 'tecki bini. Naase se, Ko Taar kɛn Raa ɛɗo Musa ki se ɔk tɔɔgɔ dose ki ey sum taa naase ooykiga ute al‑Masi. Ɓɔrse naase se 'tɛɗkiga mɛtn deb kuuy, naan̰ se al‑Masi kɛn Raa durin̰oga daan yoge tu se, taa naan̰ se ɓo naajege j'aki tɛɗn nakgen tɔɔl Raa ki. 5Ɗeere, do dɔkin̰ se, naajege k'tɛɗkiro nakŋ kɛn daa rojege ɓo jea. Ɔɔ nakgen ɔk tɔɔgɔ do rojege tu se ɓo kɛn ɔljeki k'tɛɗki nakgen kɛn ajenki kɔl yo ki. 6Do dɔkin̰ se, naajege j'iŋgkiro ɓulu do Ko Taar kɛn Raa ɛɗo Musa ki se, num ɓɔrse naajege se aan gɔɔ jee ooyga kooyo naɓo al‑Masi ɔɔɗjekiga dojege maakŋ Ko Taar kɛn Raa ɛɗo Musa ki jaay tɛɗjeki ɓulge se. Bin ɓo naajege ɓɔrse j'ɔŋkiga ɗoobm kiji gɛn tɛɗn naabm Raa. Ɔɔ ɗoobm se, Nirl Salal ɓo taaɗjesin̰ki. Bin num naajege se, k'tɛɗki naabm Raa se ute Ko Taar kɛn Raa ɛɗo Musa ki jaay k'raaŋin̰oga raaŋ do dɔkin̰ se eyo, taa ɗoobm se kaaɗin̰ deelga. 7Tap ki num j'aki taaɗ j'ɔɔki ɗi? Kɛn ɔl jeege tɛɗ kusin̰ se, Ko Taar kɛn Raa ɛɗo Musa ki la? Gɔtɔ! Ko Taar kɛn Raa ɛɗo Musa ki se kusin̰ la? Gɔtɔ! Num kɛn ɔlum jaay maam m'jeel kusin̰ se Ko Taar kɛn Raa ɛɗo Musa ki. Num kɛn Ko Taar kɛn Raa ɛɗo Musa ki jaay taaɗ ɔɔ: Ɔn̰te dɔŋɔ, ey se kɛn maam m'dɔŋ kic num, m'jeelin̰ nakŋ se m'tɛɗ te kusin̰ eyo. 8Num kɛn Ko Taar kɛn Raa ɛɗo Musa ki jaay taaɗum m'jeel kusin̰ sum se, kusin̰ ɔŋ ɗoobo ɔɔ ɔlum m'baag dɔŋ napar nakgen ɓaa se paac. 'Jeelki, kɛn Ko Taar kɛn Raa ɛɗo Musa ki se jaay gɔtɔ se, kusin̰ kic ɓo, gɔtɔ. 9Do dɔkin̰ kɛn maam m'jeel te Ko Taar kɛn Raa ɛɗo Musa ki ey se, maam m'utu m'iŋg zɛɛrɛ. Num kɛn Ko Taar Raa ɛɗo Musa ki taaɗum nakgen gɛn tɛɗa sum se, kusin̰ ɓaaɗo taaɗ tɔɔgin̰ dom ki, 10ɔɔ kusin̰ kɛn ɔk tɔɔgɔ dom ki se, tɛɗum maam m'ooyga. Ɔɔ maam kɛn debm m'ooyga kooy se, Ko Taar kɛn Raa ɛɗo Musa ki ey num am kɛɗn kaaja se, ɓɔrse, ɔlumga yo ki. 11Ute ɗoobm nakgen Ko Taar kɛn Raa ɛɗo Musa ki taaɗ ɔɔ gɛn tɛɗa se, kusin̰ ɔŋ ɗoobo ɔɔ dɛrlum ɔlum m'tɛɗn kusin̰a ɔɔ tɔɔluma. 12Ey num Ko Taar kɛn Raa ɛɗo Musa ki se ɗoobm salal ɔɔ nakgen naan̰ taaɗ ɔɔ gɛn tɛɗ se kic ɓo, salal, ute ɗoobin̰a ɔɔ jiga. 13Bin num nakŋ jigan ese se ɓo tɛɗga nakŋ kɛn am tɔɔl la? Gɔtɔ! Num gaŋ kɛn tɔɔlum se, kusin̰a. Ute nakgen jiga se ɓo, kusin̰ ɔŋ ɗoobo gɛn tɔɔluma. Bin jaay ɓo k'jeele kusin̰ se, naan̰ kusin̰ ɗeer ɗeer. Anum ute Ko Taar kɛn Raa ɛɗo Musa kɛn taaɗjeki ɔɔ j'ɔn̰te 'tɛɗki kusin̰ se, ute naan̰ se ɓo, kusin̰ taaɗ naabin̰ tooɗ tal ɔɔ naan̰ se, kusin̰ aak eyo. 14K'jeelki Ko Taar kɛn Raa ɛɗo Musa ki se iin̰o gɔtn Raa ki, num maam lɛ, goon debkilim sum ɔɔ kusin̰ se, tɛɗumga maam tɛɗga ɓulin̰a. 15Ɗeere, nakŋ maam m'tɛɗ se m'ɔnd te mɛtin̰ eyo, taa maam m'tɛɗ nakŋ kɛn maam m'je eyo; ey num nakŋ maam m'je, tap ɓo maam m'ɔŋ tɛɗin̰ eyo. 16Kɛn maam jaay m'tɛɗ nakŋ kɛn maam m'je ey se, bin se maam m'jeele Ko Taar kɛn Raa ɛɗo Musa ki se, naan̰ jiga. 17Anum kɛn ɔlum jaay m'tɛɗn nakŋ jig ey se, maam mal eyo, num kusin̰a kɛn utu maakum ki se ɓo, ɔlum m'tɛɗn naan̰ se. 18Maam m'jeele maakŋ maam goon debkilim ki se, nakŋ bɛɛ tap ɓo gɔtɔ. Taa maam se m'je m'tɛɗn nakŋ bɛɛ, naɓo maam m'ɔk tɔɔgŋ gɛn tɛɗn naan̰ se eyo. 19Ɗeere, bɛɛ kɛn maam m'je se, tap ɓo maam m'ɔŋ tɛɗin̰ eyo; gaŋ kusin̰ kɛn maam m'je ey se ɓo, maam m'lee m'tɛɗin̰a. 20Kɛn maam jaay m'tɛɗ nakŋ kɛn maam m'je ey se, kɛse maam mala ɓo tɛɗin̰ ute maakum eyo, num kusin̰ kɛn maakum ki se ɓo, ɔlum m'tɛɗ naan̰ ese. 21Maam m'jeelin̰ ute maakum se, bɛɛki num, m'tɛɗn nakŋ bɛɛ, naɓo kusin̰ se ɔk tɔɔgɔ dom ki ɔɔ ɔlum ɓo gɛn tɛɗn kusin̰ sum. 22Saapm maam ki se, Ko Taar kɛn Raa ɛɗo Musa ki se tɔɔlumi. 23Num maam m'naam maakum ki ne ɗim kuuy kɛn ɔk tɔɔgɔ ɔɔ ɔŋ ɔn̰um saapum ɔŋ tɛɗ nakŋ bɛɛ eyo ɔɔ kusin̰ se ɓo tɛɗum m'tɛɗga ɓulu gɛn tɛɗn nakgen jig eyo. 24Maam se kapin̰ tɔɔluma! Num naŋa jaay am kɔɔɗn doma maakŋ daa ro kɛn am kɔl yo ki se? 25Kɛse ute ɗoobm Mɛljege Isa al‑Masi! Bin num k'tɔɔmki Raa! Taa naan̰ se ɓo ute saapum se maam m'je m'tɛɗ nakŋ bɛɛ; num gaŋ maakŋ daa rom ki se, kusin̰ se ɔk tɔɔgɔ dom ki.

will be added

X\