Romains 6

1Anum j'aki taaɗn j'ɔɔki ɗi? Naajege j'aki lee tɛɗn kusin̰ ɓo taa bɛɛ Raa se 'ziiɗn tɛɗn dɛn la? 2Gɔtɔ! Taa naajege se aan gɔɔ jeegen ooyga kooyo ɔɔ ute kusin̰ se lɛ, k'gaaŋkiga. Bin num, j'aki kiŋg maakŋ kusin̰ ki ɔɔ ɗi daala? 3'Jeelki ey la? Kɛn naajegen paacn̰ jaay k'batizjekiro se, naajege k'tɛɗkiga kalaŋ ute Isa al‑Masi. Kaaɗ kɛn se naajege j'ooykiroga tɛlɛ ute naan̰a. 4Ute batɛm kɛn k'batizjeki se, naajege j'ooykiga ute naan̰a ɔɔ k'duubjekiga ute naan̰ kici. Aan gɔɔ Raa Bubjege duro al‑Masi daan yoge tu ute tɔɔgin̰ se, naajege kic ɓo, naan̰ tɛrljekiga kiŋgjege tɛɗga kiji. 5Ɗeere, naajege se j'ooykiga kalaŋ ute naan̰a. Ɔɔ aan gɔɔ naan̰ duro daan yoge tu se, naajege kic j'utu j'aki dur daan yoge tu aan gɔɔ gɛn naan̰ se kici. 6K'jeelki, aan gɔɔ Isa k'tɔɔlin̰ do kaag ki se, naajege ute kiŋgjegen do dɔkin̰ se kic ɓo j'ooykiroga ute naan̰a tɛlɛ. Taa naan̰ se ɓo daa rojegen kɛn ɔljeki k'tɛɗki kusin̰ se, 'kɔkŋ tɔɔgɔ dojege tu ey sum. Bin se, naajege j'aki kɔŋ tɛɗn ɓul gɛn tɛɗn kusin̰ ey sum. 7Ɗeere, debm ooyga se, ɔɔɗnga ute kusin̰a. 8Anum kɛn naajege jaay j'ooykiga ute al‑Masi se, k'jeelki j'aki ɓaa kiŋg ute naan̰a kici. 9K'jeelki, al‑Masi jaay ooy duro daan yoge tu se, mɔɔtn naan̰ 'kɔŋ kooy eyo, taa yo se ɔk tɔɔgɔ don̰ ki ey sum. 10Num Isa se ooyga ɔɔ naan̰ ooy se jɛ‑kalaŋ sum taa kusin̰ jikilimge ɔɔ mɔɔtn naan̰ kooy ey sum. Ɔɔ ɓɔrse jaay naan̰ utu iŋg zɛɛr se kiŋg naan̰ iŋg se, gɛn Raa. 11Ɔɔ naase kic ɓo iŋgki aan gɔɔ jeegen ooyga kooyo kɛn 'gaaŋkiga ute kusin̰a. Ɔɔ ɓɔrse iŋgki kiŋg gɛn Raa, taa naase 'tɛɗkiga kalaŋ ute Isa al‑Masi. 12Ɔn̰te kɔn̰ki kusin̰ kɔkŋ tɔɔgɔ do daa rose kɛn utu kooy se ɔɔ ɔn̰te 'tɛɗki nakŋ naan̰ ɓo je se. 'Jeelki, ɓii kalaŋ se, naase utu aki kooyo. 13Ɔn̰te 'kɔn̰ki ɗoobo daa rose ki ɗimin̰ kalaŋ kic ɓo ɔn̰ten 'tɛɗn kusin̰a; ɔɔ ɔn̰ten 'kɔn̰in̰ki Ɓubm sitange an lee tɛɗn kusin̰a; num gaŋ ɔn̰ki rosege paac kaam ji Raa taa naan̰ an tɛɗn nakgen ute ɗoobin̰a, aan gɔɔ jeegen ooy duroga duru daan yoge tu. 14Bin num kusin̰ se kɔŋ kɔkŋ tɔɔgɔ dose ki ey sum, taa naase se iŋgki do Ko Taar kɛn Raa ɛɗo Musa ki ey sum, num naase se iŋgki ute bɛɛ gɛn Raa. 15Kɛse tap ɓo je taaɗn ɔɔ ɗi? Aan gɔɔ naajege lɛ k'j'iŋgki do Ko Taar kɛn Raa ɛɗo Musa ki eyo, num naajege lɛ k'j'iŋgki ute bɛɛ Raa sum se, bin num j'aki kɔŋ tɛɗn kusin̰a aan gɔɔ kɛn maakjege je la? Gɔtɔ! 16'Jeelki, kɛn naase jaay ɔɔpkiga kaam ji nam ɔɔ 'tookki taarin̰ se, naase 'tɛɗkiga ɓul debm kɛn naase 'tookin̰ki taarin̰ se. Taa naan̰ se ɓo kɛn kusin̰ jaay ɔk tɔɔgɔ dose ki se, naase 'tɛɗkiga ɓulu gɛn tɛɗn kusin̰a ɔɔ kusin̰ naase 'tɛɗki se, asen kɔl yo ki. Anum kɛn naase jaay 'took uunki taar Raa se, kɛse naase 'tɛɗkiga ɓul gɛn Raa ɔɔ naan̰ asen tɛɗn aki kaakŋ bɛɛ naanin̰ ki. 17Do dɔkin̰ se, naase iŋgkiro ɓulu gɛn tɛɗn kusin̰a, num gaŋ ɓɔrse, naase 'took uunkiga ute maakse paac taar mɛt kɛn k'dooyseno se. Taa naan̰ se, k'tɔɔmki Raa! 18Naase se Raa ɔɔɗsenga dose naatn maakŋ kusin̰ ki. Ɔɔ ɓɔrse naase 'tɛɗkiga ɓul Raa gɛn tɛɗn nakgen ute ɗoobin̰a. 19Kɛn maam jaay m'taaɗsen ute nakgen jikilimge lee tɛɗ se, taa naase 'booy ɔkumki yɔkɔɗ eyo do taarge tun maam m'lee m'taaɗsen se. Aan gɔɔ naase ɔn̰kiro rose gɛn tɛɗn nakgen aak kusu ɔɔ jig eyo kɛn ɔlse naase iŋgki kiŋg gɔrɗio naan Raa ki se, ɓɔrse ɔn̰ki rose 'tɛɗki ɓul Raa gɛn tɛɗn nakgen ute ɗoobin̰a; kɛse ɓo kɛn asen tɛɗn jee salal. 20Kɛn naase iŋgkiro ɓulu gɛn tɛɗn kusin̰ se, nakŋ jaay asen kɔl naase aki tɛɗn nakŋ te ɗoobin̰ taa tɔɔgɔ se, gɔtɔ. 21Anum kusin̰ kɛn naase 'tɛɗkiro se tap ɓo ɔŋkiga ɗi ro ki? Taa nakgen naase iŋg 'tɛɗkiro se, ɓɔrse ɔlseno maakŋ sɔkɔn̰ ki. 'Jeelki nakgen se ɔl jeege maakŋ yo ki. 22Ɔɔ gaŋ ɓɔrse Raa ɔɔɗsenga dose naatn maakŋ kusin̰ ki ɔɔ 'tɛɗkiga ɓulin̰ge. Bin num ɓɔrse Raa tɛɗsenga 'tɛɗkiga jee salal ɔɔ naase utu aki kɔŋ kaajn̰ gɛn daayum. 23Aan gɔɔ debm tɛɗga naaba num j'ɔgin̰ gɔt‑tɔŋgin̰ se, bin ɓo debm tɛɗga kusin̰ se kusin̰in̰ se, bɛɗin̰ yoa. Num gaŋ Raa se, kaajn̰ gɛn daayum se, naan̰ ɛɗjesin̰ki cɛrɛ taa naajege k'tɛɗkiga kalaŋ ute Mɛljege Isa al‑Masi.

will be added

X\