Romains 15

1Naajegen k'tɔɔgki ɗoobm al‑Masi ki se, k'sɛrkki gɛnaajegen ɔk tɔɔg eyo gɛn kiŋg ɗoobm Raa ki se ɔɔ j'ɔn̰te jeki nakŋ kɛn ajeki tɔɔl naajege tu sum. 2Naŋa naŋa kic ɓo je nakŋ kɛn tɔɔl naapin̰ ki taa an̰ tɛɗn bɛɛ ɔɔ an̰ noogin̰ kɔkŋ ɗoobm al‑Masi se tɔɔgŋ ɓaa ute naanin̰a. 3'Jeelki, al‑Masi se je te bɛɛ naan̰ mala eyo, num aan gɔɔ kɛn Kitap taaɗ ɔɔ: Naajn̰ kɛn k'naaji naai Raa se, kɛse k'naajum maama. 4Anum taargen kɛn k'raaŋin̰o do dɔkin̰ maakŋ Kitap ki se, taa ajeki dooyo. Taargen se ɓo kɛn ajeki kɛɗn kaay kaama ɔɔ ajeki sɛl maakjege taa j'aki kɔnd dojege do Raa ki. 5Ɔn̰ Raa debm kɛɗn kaay kaama ɔɔ debm sɛl jeege se, asen tɛɗn aki kiŋg dɔɔkŋ taarse kalaŋ aan gɔɔ kɛn Isa al‑Masi jen ro ki. 6Bin jaay ɓo, maakse 'tɛɗn kalaŋ ɔɔ mindse kic tɛɗn kalaŋ, naase aki nookŋ Raa kɛn Bubm Mɛljege Isa al‑Masi se. 7Anum ɔkki naapa jiga aan gɔɔ kɛn al‑Masi ɔksen naase jiga se. Bin se aki kɔl jeege 'nookŋ Raa. 8'Ɓooyki m'asen taaɗa: al‑Masi jaay ɓaaɗo tɛɗ debm tɛɗn naabm Yaudge se, taa nakŋ kɛn Raa taaɗo ɓugŋ Yaudge tu ɔɔ utu aɗen tɛɗ se, naan̰ tɛɗɗesin̰ga ute ɗoobin̰a ɔɔ kɛse je aɗen taaɗn ɔɔ Raa se naan̰ tuj ɔrmin̰ eyo. 9Ɔɔ naan̰ ɓaaɗo se, taa jeegen kɛn Yaudge ey kic ɓo nookŋ Raa taa bɛɛn̰a aan gɔɔ kɛn Kitap taaɗ ɔɔ: Taa naan̰ se ɓo, maakŋ jeege tun Yaudge ey se, maam m'utu m'ai tɔɔmɔ; ɔɔ maam m'utu m'kaar kaa taa m'nookŋ roi. 10Tɛr Kitap taaɗ ɔɔ: Naasen jee ɓaa se paac se 'tɛɗki maak‑raapo ute jee kɛn Raa bɛɛr tɔɔɗɗenga tɔɔɗɔ ɔɔ naaɗe tɛɗga jee naan̰ge se. 11Ɔɔ tɛr daala Kitap taaɗ ɔɔ: Naasen paacn̰ kɛn Yaudge ey se, 'tɔɔmki Mɛljege Raa ɔɔ ɔn̰ jeegen ɓaa se paac, an̰ nooko. 12Ɔɔ tɛr debm taaɗ taar teeco taar Raa ki ron̰ Ezayi kic taaɗga daala ɔɔ: Deba utu aɗe teecn̰ mɛtjil Jɛsɛ ki se ɔɔ naan̰ se utu aɗe ɓaa kɔsn gaara do jeege tu paac ɔɔ mɛtjil jeegen do naaŋ ki paac utu kɔnd doɗe don̰ ki. 13Ɔn̰ Raa kɛn tɛɗ jeege ɔnd doɗe don̰ ki ɔɔ kɛn naase aalki maakse don̰ ki se, asen kɛɗn maak‑raap dɛna ute lapia. Taa naan̰ se ɓo, ute tɔɔgŋ Nirl Salal se, naase aki kɔnd dose paac don̰ ki. 14Gɛnaamge, maakum ki se maam m'jeele naase se jeegen kɛn lee tɛɗ nakgen bɛɛ. Ɔɔ taar mɛt ki se kic, naase 'jeel ɔkkiga mɛtin̰a. Ɔɔ naase se, aaskiga gɛn dɛjn̰ naapa. 15Naɓo maakŋ maktub kɛn m'raaŋsen ese se, nakgen mɛtin̰ge se maam m'taaɗsenoga mɛtin̰ tal, taa naase aki saapm do nakge tun kɛn naase 'jeelin̰kiga jeele. Ɔɔ kɛn ɔlum jaay m'taaɗsen mɛtn nakgen se tal se, taa bɛɛ Raa kɛn tɛɗum se, 16m'tɛɗga debm tɛɗn naabm Isa al‑Masi daan jeege tun Yaudge eyo. Maam m'ɛɗ rom paac gɛn taaɗn Labar Jiga gɛn Raa se jeege tu, taa jee Yaudge ey se kic ɓo 'kaal maakɗe don̰ ki ɔɔ bin se, naaɗe tɛɗn gɔɔ sɛrkŋ kɛn tɔɔl Raa ki. Ɔɔ kɛn tɛɗɗe jaay naaɗe tɛɗ jee Raage se, kɛse Nirl Salal. 17Taa naan̰ se ɓo, maam kɛn m'tɛɗga kalaŋ ute Isa al‑Masi se, maakum raap do naabum kɛn maam m'tɛɗ Raa ki. 18Anum maam se m'je m'kuun maan ɗim ey sum, num m'je ɓo m'taaɗn nakŋ kɛn al‑Masi tɛɗ ute ɗoobm maama kɛn taa jeegen Yaudge ey se tookŋ taar Raa. Ɔɔ naabm se, naan̰ tɛɗin̰ ute naabum kɛn maam m'tɛɗa ɔɔ ute taarum kɛn maam m'taaɗa, 19ɔɔ ute tɔɔgŋ Nirl Salal se, naan̰ ɔlum m'tɛɗn nakŋ‑kɔɔɓge ute nakgen deel doa. Bin ɓo gɔtɔ ɓaa se paac, maam m'taaɗga Labar Jigan gɛn al‑Masi se paac jeege tu, m'baago maakŋ gɛgɛr kɛn Jeruzalɛm ki bini m'aan taa naaŋ kɛn Iliri ki. 20Naɓo maam se daayum m'je taaɗn Labar Jigan gɛn Isa al‑Masi se, gɔtn kɛn k'taaɗ te ro al‑Masi ey ɓɔrtɔ. Anum jee kɛn booyga booy taar gɛn jee dooygen kuuy se, maam m'je m'ɓaa gɔtn ese ey sum, taa maam se m'je tɛɗn naab eyo do naabm gɛn deb kuuy ki. 21Taa naan̰ se ɓo, maam m'tɛɗ aan gɔɔ kɛn Kitap taaɗa: Jee kɛn booy j'ɔɔsɗe te maanin̰ ey se, naaɗe utu an̰ kaaka. Ɔɔ jeegen kɛn booy te taarin̰ ey se lɛ, naaɗe utu booy kɔkŋ taarin̰a. 22Kɛse ɓo nakŋ gaasumga ɗoobo mɛt dɛna gɛn ɓaa gɔtse ki. 23Anum ɓɔrse jaay ɓo, naabum gɔtn ara se naŋga. Ey num m'ɔkga ɓaara dɛna kɛn maam m'je m'ɓaa gɔtse ki, naɓo m'ɔŋ te ɗoob eyo. 24Anum kɛn maam jaay m'ɓaa taa naaŋ Espan̰ ki se, maam m'kaal gɔtse ki. Ɗeere, kɛn am kɔlum m'ɓaa gɔtse ki se, taa m'asen ɓaa kaak jaay am tɔɔlɔ ɔɔ kɛn maam jaay m'aanga gɔtse ki se, m'tiŋg cɔkɔ jaay ɓo sɔm amki noogŋ gɛn ɓaa taa naaŋ Espan̰ ki. 25Num ɓɔrse se, maam m'ɓaa ɓaa maakŋ gɛgɛr kɛn Jeruzalɛm ki taa ɓaa noogŋ jee Raagen gɔtn naane. 26Taa jee al‑Masigen taa naaŋ Masedoan ki ute kɛngen taa naaŋ Akayi ki se, uuno doa gɛn tusn naka gɛn noogŋ jee Raagen Jeruzalɛm ki jaay ɔk ɗim ey se. 27Ɗeere, naaɗe se malin̰ge ɓo uuno doa taa aɗe noogo. Kɛn ɗeer se, naaɗe kic ɔk sɛɛ doɗe ki, taa Yaudge se noogoga jee kɛn Yaudge ey se gɛn kɔŋ bɛɛ Raa. Bin num jeegen Yaudge ey se, naaɗe noogŋ Yaudge ute maalɗe kici. 28Kɛn naabm se jaay m'naŋin̰ga ɔɔ nakse jaay ɓaa m'ɛɗin̰ga gɛnaage tun Jeruzalɛm ki se, maam m'utu m'ɓaa taa naaŋ Espan̰ ki ɔɔ maam m'utu m'kaal gɔtse ki kici. 29Maam m'jeele, ɓii kɛn m'kaan gɔtse ki se, al‑Masi asen tɛɗn bɛɛn̰ dɛn aak eyo. 30Gɛnaamge, 'booyki m'asen taaɗa: aan gɔɔ naajege j'aalki maakjege do Mɛljege Isa al‑Masi ki ɔɔ ute maak‑je kɛn Nirl Salal ɛɗjeki do naapge tu se, aayki kaamse 'ɗoki gɛn tɔnd mɛtn Raa taa maama. 31'Tɔndki mɛtn Raa kɛn maam jaay m'aanga taa naaŋ Jude ki num, jee kɛn aal maakɗe do Isa al‑Masi ki ey se, am dabar eyo. Ɔɔ tɛr 'tɔndki mɛtn Raa taa nakŋ kɛn maam m'ɓaa kɛɗn jee Raage tun maakŋ gɛgɛr kɛn Jeruzalɛm ki se, nakŋ se naaɗe an̰ kɔkin̰ jiga aɗen tɛɗn bɛɛ. 32Bin ɓo, kɛn Raa jaay je num, maam m'utu m'ɓaa gɔtse ki ute maak‑raapo ɔɔ kɛn m'aanga naane se, m'utu m'ɓaa tɔɔl maakuma. 33Ɔn̰ Raa debm kɛɗn lapia jeege tu se, 'kiŋg ute naase paac. Amin.

will be added

X\