Romains 13

1Tɔɔggen iŋg do jeege tu paac se, 'sookɗeki. Taa tɔɔgge se paacn̰ iin̰o gɔtn Raa ki ɔɔ kɛngen ɓɔrse utu do naaŋ ki se kic ɓo Raa ɓo tɔndɗe. 2Taa naan̰ se ɓo, debm baate sookŋ tɔɔgge tu se, kɛse aan gɔɔ naan̰ baate tookŋ tɛɗn nakŋ Raa maakin̰ jen ro ki. Ɔɔ jee baate sookŋ tɔɔgge tu se, nakŋ ɔɔn̰ utu kaan doɗe ki. 3Anum jee tɛɗn nakŋ bɛɛ se, naaɗe ɓeer tɔɔgge tu eyo, num jee tɛɗn nakŋ kusin̰ se ɓo, kɛn ɓeer tɔɔgge tu. Kɛn naai jaay 'je ɓeer tɔɔgge tu ey num, 'tɛɗ bɛɛ. Bin se naaɗe ai tɔɔmɔ. 4'Jeelki, tɔɔgge se naaɗe se kaam ji Raa taa asen noogo gɛn tɛɗn nakgen jiga. Kɛn naase jaay 'tɛɗkiga kusin̰ se, 'ɓeerɗeki. Taa tɔnd kɛn Raa tɔndɗe se cɛr eyo, num naan̰ tɔndɗe se taa an̰ tɛɗn naabin̰a gɛn dabar jee kɛn tɛɗn nakŋ kusin̰a. Ɔɔ ute ɗoobm se ɓo, Raa taaɗ maak‑taarin̰ do jeege tun tɛɗ nakgen jig eyo. 5Kɛn bin num, 'sookki tɔɔgge tu, taa j'asen dabar sum eyo, num 'sookɗeki taa naase 'jeelki maakse ki naabɗe se ute ɗoobin̰a. 6Taa naan̰ se ɓo, naase 'lee ɔgɗeki miiri. Ɔɔ jee kɛn k'tɔndɗe gɛn lee tiir gurs miiri gɔtse ki se, naabm kɛn naaɗe lee tɛɗin̰ ute ɗoobin̰ se, naaɗe tɛɗin̰ gɛn Raa. 7Jee se jaay nakŋ kɛn naaɗe je ɔɔ j'aɗe kɔgse, ɔgɗesin̰ki. Jee tɔkŋ miirge se, 'tiir ɛɗɗeki nakɗe ɔɔ nakgen paacn̰ gɛn kɔgɔ se, ɔgɗesin̰ki. Tɔɔggen kɛn aɗeki sook se, 'sookɗeki. Jeegen aalɗeki kaal maak ki se aalɗeki maak ki kici. 8Ɔn̰te kɔn̰ki sɛɛ nam dose ki. Num sɛɛ kɛn 'tɛɗn dose ki se, 'jeki naapa. Taa debm jaay je naapin̰ se, kɛse Ko Taar kɛn Raa ɛɗo Musa ki se, naan̰ tɛɗ aasin̰ga ute ɗoobin̰a. 9Taa nakgen kɛn Raa taaɗ ɔɔ gɛn tɛɗa kɛn ɔɔ: Ɔn̰te 'kɛɛsn mɛnd nam, ɔn̰te 'kɛɛsn gaaba nam, ɔn̰te 'tɔɔl nam, ɔn̰te 'ɓoogŋ nakŋ nam, ɔn̰ten 'dɔŋ nakŋ nam se. Taargen kuuy ɔɔp se kic paac kon̰ ɓo kɛn ɔɔ: 'Je naapi aan gɔɔ roi mala. 10Anum debm je naapin̰ se tɛɗin̰ kusin̰ eyo. Taa naan̰ se ɓo, debm je jeege se, Ko Taar kɛn Raa ɛɗo Musa ki taaɗ paac se, naan̰ tɛɗ aasin̰ga ute ɗoobin̰a. 11Bin ɓo gɛnaamge, 'tɛɗki nakgen se taa naase 'jeelki kaaɗn ɓɔrsen kɛn j'iŋgki maak ki se. Taa kaaɗn j'anki kiin̰ maakŋ bijege tu se aanga. Taa kaaɗn kɛn Raa utu aɗe ɓaa asen kaaj se, ɔɔpga gɔɔrɔ. Kaaɗn se, dɔk eyo aan gɔɔ kaaɗn kɛn j'utu j'aalki kaal maakjege do Isa ki ey sum. 12Nɔɔrɔ deelga, gɔtɔ ɔɔpga baata kiipi. Nakgen kɛn jeege lee tɛɗ maakŋ gɔt kɛn ɔɔɗ se, ɔɔɗki dose ro ki. 'Jeki nakgen kɛn j'an kuɗn bɔɔrɔ maakŋ gɔt kɛn wɔɔrɔ. 13K'j'iŋgki aan gɔɔ debm kɛn lee maakŋ katara ki. Ɔn̰te 'kɔski anki deel te gɔtin̰a ɔɔ ɔn̰te 'kaayki tɔtɔ kic anki deel te gɔtin̰a, ɔn̰te 'kɛɛski naapa rɛn̰ rɛn̰, ɔn̰te 'tɛɗki nakŋ sɔkɔn̰ge, ɔn̰te 'mooyki te naapa, ɔɔ ɔn̰te 'tɛɗki maak‑kilimi do naapge tu. 14Num ɔn̰ki gaab tɔɔgse se 'tɛɗn Mɛljege Isa al‑Masi. Ɔn̰te jeki nakŋ kɛn daa rose ɓo dɔŋɔ gɛn tɛɗn nakŋ maakse jea.

will be added

X\