Romains 12

1Gɛnaamge, 'booyki m'asen taaɗa: aan gɔɔ Raa tɛɗjekiro bɛɛ se, bin se daayum ɛɗki rose paac Raa ki, ɔɔ kiŋgse se ɔn̰in̰ki sɛrkɛ Raa ki. Kɛse ɓo sɛrkŋ salal kɛn tɔɔl Raa ki. Anum Raa se je ɔɔ j'an̰ keeme ute ɗoobm se. 2Ɔn̰te gɛn tɛɗki aan gɔɔ gɛn jee duni kɛn ɓɔrse lee tɛɗ se. Num gaŋ ɔn̰ki Raa asen 'tɛrl maakse ute saapm kuuy kɛn naan̰ asen kɛɗ se. Ute naan̰ se jaay ɓo, naase aki jeel nakŋ Raa maakin̰ jen ro ki. Ɔɔ nakŋ Raa maakin̰ jen se, kɛse nakŋ jiga, nakŋ tɔɔlin̰ naan̰ ki ɔɔ nakŋ mɛc. 3Ute bɛɛ kɛn Raa tɛɗum se, maam m'taaɗsen paac m'ɔɔ: maakŋ kiŋgse ki se ɔn̰te 'kuunki magala; iŋgki ute gɔtn kiŋgse se sum aan gɔɔ kɛn naŋa naŋa kic ɓo Raa ɛɗin̰ga naabin̰ naabin̰ do kaal maakin̰ ki se. 4'Jeelki, debkilimi se ɔk ro kalaŋ sum, naɓo ron̰ se, tɔp kaam dɛna, ɔɔ naŋa kic ute naabin̰ naabin̰a. 5Ɔɔ naajege kic k'dɛnki, naɓo taa naajege k'dɔɔkkiga ute al‑Masi se, k'tum k'tɛɗkiga daa ro kalaŋ ɔɔ naajege kic k'tum k'tɛɗkiga kalaŋ bini. 6Naajege se Raa ɛɗjekiga naaba, naɓo naŋa naŋa kic ɓo ute naabin̰ naabin̰a. Naŋa kic ɓo tɛɗn naaba ute bɛɛ kɛn Raa tɛɗin̰. Taa naan̰ se ɓo, debm kɛn taaɗ taar teeco taar Raa ki se, ɔn̰ taargen naan̰ taaɗ se aɗe teecn̰ taar Raa ki te ɗoobm kɛn Raa taaɗn ro ki se. 7Debm jaay Raa ɛɗin̰ga naabm gɛn noogŋ jeege se, n̰'aay kaamin̰ n̰'noog jeege ɔɔ debm kɛn Raa ɛɗin̰ga naabm gɛn dooy jeege lɛ, n̰'aay kaamin̰a n̰'dooy jeege. 8Kɛn debm jaay naabin̰ gɛn kɛɗn kaay kaam jeege tu se, n̰'aay kaamin̰ n̰'ɛɗ kaay kaama jeege tu. Ɔɔ debm kɛn ɛɗ naka jeege tu se lɛ, n̰'ɛɗ naka jeege tu ute maakŋ kalaŋ. Ɔɔ debm kɛn Raa jaay ɛɗin̰ga naabm gɛn tɔɔɗn jeege se, naabin̰ se n̰'tɛɗin̰ ute ɗoobin̰a. Ɔɔ debm kɛn Raa jaay tɛɗin̰ga debm kaakŋ taar‑daay jeege se, naabin̰ se, n̰'tɛɗin̰ ute maak‑raapo. 9'Jeki jeege ute maakŋ kalaŋ. Ɔɔɗki dose naatn ro kusin̰ ki. 'Tɛɗn bɛɛ se, ɔkin̰ki tɔɔgɔ. 10'Jeki naapa aan gɔɔ gɛnaagen je naapa se ɔɔ ɔkki naapa ɔɔn̰ɔ. 11Ɔn̰te 'tɛɗki jee kaar‑naabge, naɓo aayki kaamse, 'tɛɗki jee tɛɗn naabge. Ɔɔ Mɛljege se, 'tɛɗin̰ki naabin̰ ute maakŋ kalaŋ. 12Aan gɔɔ naase ɔndkiga dose do Raa ki se, ɔn̰ki maakse 'raapo. Kɛn nakŋ ɔɔn̰ aanga dose ki lɛ, ɔkki maakse tɔɔgɔ ɔɔ aayki kaamse, eemki Raa. 13Gɛnaasegen ɗoobm al‑Masi kɛn ɔk ɗim ey se, aakɗeki doɗe ki. Ɔɔ jee paacn̰ kɛn ɓaa gɔtse ki se ɔkɗeki jiga. 14Jee kɛn lee dabarse se, ɔn̰te 'naamɗeki naɓo 'tɔndki mɛtn Raa aɗen tɛɗn bɛɛ. 15'Tɛɗki maak‑raapo ute jee kɛn maakŋ maak‑raap ki, ɔɔ eemki ute jee kɛn maakŋ kaa‑maan ki. 16Iŋgki bɛɛ ute naapa. Ɔn̰te 'magalki rose. Ɔɔ kɛn j'ɛɗsenga naabm baat gɔɔ ɗi kic ɓo, 'tɛɗin̰ki. Ɔn̰te 'tɛɗki rose aan gɔɔ jee jeel nakge. 17Debm tɛɗsenga kusin̰a se, ɔn̰te 'tɛrlin̰sin̰ki. Ɔɔ aayki kaamse, 'tɛɗki bɛɛ jeege tu paac. 18Kɛn naai jaay ɔk ɗoobo num, aay kaami iŋg ute lapia ute jeege paac. 19Gɛnaa maak‑jemge, kɛn nam jaay tɛɗsenga kusin̰a se, ɔn̰te kɔgki sɛɛse, num ɔn̰ki Raa ɓo 'bɔɔy maak‑taarin̰ doɗe ki. Taa maakŋ Kitap ki se, Mɛljege Raa taaɗga taaɗ ɔɔ: Taar‑don̰ ɔn̰umsin̰ki maam ki ɔɔ maam ɓo m'asen kɔgŋ sɛɛse. 20Bin num Kitap taaɗ ɔɔ: Kɛn debm taamooyi jaay ɓo tɔɔlin̰ se, ɛɗin̰ kɔsɔ; ɔɔ kɛn maane ɓo tɔɔlin̰ lɛ, ɛɗin̰ 'kaaye. Bin se, naai an̰ kɔl maakŋ sɔkɔn̰ ki. 21Ɔn̰te kɔn̰ki kusin̰ se asen ciri, num naase ɓo 'cirin̰ki ute bɛɛ kɛn naase aki tɛɗa.

will be added

X\