Romains 10

1Gɛnaamge, maam se m'je ute maakum paac taasum Yaudge se kic 'kɔŋ kaaja. Taa naan̰ se ɓo, maam m'eem Raa taa naaɗe. 2Ɗeere, maam m'jeele naaɗe se dɔk maakɗe do Raa ki, naɓo Raa se naaɗe jeel ɔkin̰ te mala mala eyo. 3Ɔɔ naaɗe jeɗo te ɗoobm kɛn Raa tɛɗn jeege aak bɛɛ naanin̰ ki se eyo. Num naaɗe malin̰ge ɓo je ɗoobm kɛn aɗen 'tɛɗn aak bɛɛ naan Raa ki. Taa naan̰ se ɓo, ɗoobm kɛn Raa tɛɗ jeege aak bɛɛ naanin̰ ki se, naaɗe baate tookŋ do ki. 4Taa tɔɔgŋ gɛn Ko Taar kɛn Raa ɛɗo Musa ki ɔk do jeege tu se, al‑Masi 'ɗaarin̰ga taa jee paacn̰ kɛn aalga maakɗe do al‑Masi ki se, tɛɗga aak bɛɛ naan Raa ki. 5'Booyki taar kɛn Musa raaŋ do dɔkin̰ maakŋ Ko Taar kɛn Raa ɛɗin̰o se, naan̰ ɔɔ taargen Ko Taar Raa taaɗ ɔɔ gɛn tɛɗa se: Debm kɛn tɛɗ aasin̰ ute ɗoobin̰ paac jaay ɓo 'kɔŋ kaaja. 6Num ɗoobm kɛn ɔl jeege aal maakɗe do Raa ki jaay tɛɗn aak bɛɛ naanin̰ ki se, Kitap taaɗ ɔɔ: Ɔn̰te taaɗn ute maaki ɔɔ: «Naŋa jaay 'kookŋ maakŋ raa ki» kɛse je ɗeekŋ ɔɔ: naŋa aɗe daŋ al‑Masi aɗe bɔɔy do naaŋ ki se. 7Tɛr ɔn̰te taaɗn ɔɔ: naŋa jaay bɔɔy ɓaa maakŋ ɓee yoge tu, kɛse je ɗeekŋ ɔɔ: naŋa aɗe daŋ al‑Masi aɗe teecn̰ daan yoge tu. 8Num maakŋ Kitap ki taaɗ ɔɔ: Taar Raa se, naan̰ gɔɔr ute naai; naan̰ utu maaki ki ɔɔ taari ki. Taar Raa ese ɓo naaje k'lee k'taaɗin̰ jeege tu j'ɔɔ j'aal maakɗe do Raa ki. 9Kɛn naai jaay 'took ute maaki ɔɔ 'jeel Raa se duroga Isa daan yoge tu, ɔɔ 'taaɗ naan jeege tu ɔɔ Isa se naan̰ ɓo Mɛli se, kɛse naai 'kɔŋ kaaja. 10Taa kɛn naajege jaay j'aalkiga maakjege do Isa ki se, k'tɛɗkiga aak bɛɛ naan Raa ki. Ɔɔ kɛn k'taaɗki naan jeege tu j'ɔɔki: naan̰ ɓo Mɛljege se, j'aki kɔŋ kaaja. 11Aan gɔɔ taar kɛn Kitap taaɗ ɔɔ: Debm jaay aalga maakin̰ do naan̰ ki se, sɔkɔn̰ an̰ tɔɔl eyo. 12Anum Yaudge ute Yaudge ey paac se naaɗe ɔŋga kaaja ute ɗoobm kalaŋ sum, taa naaɗe paac se Mɛlɗe ɓo kɛn kalaŋ ese sum. Naan̰ tɛɗ bɛɛ jeege tun paacn̰ kɛn lee eemin̰a. 13Taa naan̰ se ɓo Kitap taaɗ ɔɔ: Debm jaay eem ro Mɛljege se, Mɛljege an̰ kaaja. 14Kɛn bin num jeege jaay utu aal te maakɗe don̰ ki ey ɓɔrt se, naaɗe an̰ keem ɔɔ ɗi? Naaɗe kaal maakɗe don̰ ki ɔɔ ɗi? Ɔɔ kɛn nam jaay ɓaaɗo taaɗɗe te taarin̰ ey se, ute ɗoobm gay jaay naaɗe 'booy ron̰ se? 15Ɔɔ kɛn j'ɔl te jee taaɗn Taar Raa gɔtɗe ki ey se, naŋa jaay aɗe ɓaa taaɗn taar se? Taa naan̰ se ɓo, Kitap taaɗ ɔɔ: Aakki! Jee kɛn ɓaano ute Labar Jiga se, jeege maakɗe raap doɗe ki dɛn aak eyo. 16Anum Labar Jigan ese, jee mɛtin̰ge sum ɓo took aal maakɗe do ki. Taa naan̰ se ɓo, debm taaɗ taar teeco taar Raa ki ron̰ Ezayi taaɗ maakŋ Kitap ki ɔɔ: Mɛlje, taar kɛn naaje k'taaɗ jeege tu se, naŋa ɓo took uunga? 17Anum 'booyki: debm jaay took aal maakin̰ do taar kɛn ese se, booy k'taaɗin̰ga taar se jaayo. Ɔɔ taar kɛn naan̰ booyin̰ ese se, iin̰o gɔtn al‑Masi ki. 18Anum m'tɔnd mɛtse tu: taar se, Yaudge booyin̰ te ey la? Gɔtɔ! Taar se naaɗe booyin̰ga aan gɔɔ kɛn Kitap taaɗ ɔɔ: Jeege ɓaa taaɗga taar Raa se jeege tu gɔtn ɓaa se paac, ɔɔ taar se jee do naaŋ ki paac booyin̰ga. 19Tɛr m'tɔnd mɛtse daala: mɛtn taar se tap ɓo, gaan Israɛlge booy ɔkin̰ te ey la? Ɗeere, naaɗe booy ɔkin̰ga naɓo baate tookŋ do ki. Taar se Musa ɓo uuno mɛtin̰ deete ɔɔ taaɗɗeno taar kɛn Raa ɔɔ: Naase jeemge se, m'asen tɛɗn aki ni ro jeege tun rɛn̰ rɛn̰. Ɔɔ m'asen tɛɗn naase maakse asen taar do jeege tun jeel ɗim eyo. 20Tɛr debm taaɗ taar teeco taar Raa ki ron̰ Ezayi se, aay kaamin̰ bini taaɗɗen daala ɔɔ: Maam Raa se, jee kɛn jem ey se ɓo, ɔŋumga. Ɔɔ jee kɛn je te ɗoobum ey se ɓo, maam m'taaɗɗen roma. 21Gaŋ ute gaan Israɛlge se Raa taaɗ ɔɔ: Ɓii‑raa maam m'ɔl jim m'daŋ gaan Israɛlge m'ɔɔ aɗe ɓaa gɔtum ki naɓo naaɗe se, jee naajn̰ taarge ɔɔ baate tookŋ Taaruma.

will be added

X\