Apocalypse 7

1Kɛn nakgen se jaay deel se, mɛtn naaŋ kɛn kaam sɔɔ se, maam m'aak gɔtɔ ɓo kɔɗn Raa ɗaar ro ki tak tak. Naaɗe gaas kuul iin̰o gɔtɔ kaam sɔɔ taa kɔl do naaŋ ki eyo, do maane ki eyo ɔɔ ro kaagge tu eyo. 2Ɔɔ gɔtn se, maam m'aak kɔɗn Raa kuuy iin̰o kaam kaaɗa tookŋo. Ɔɔ kɔɗn Raa se, ɔk nakŋ Raa zɛɛrɛ kɛn k'tɔnd naan jeege tu gɛn kaakŋ jeelɗe se. Kɔɗn Raagen kaam sɔɔ kɛn j'undɗen kulu gɛn tujn̰ do naaŋa ute maane se, naan̰ daŋ taaɗɗen makɔn̰ɔ ɔɔ: 3«Ɔn̰ki! Ɔn̰ten 'tɛɗki nakŋ kusin̰ do naaŋ ki, do maane ki ute kaagge tu se bini naaje k'tɔnd kaasn nakŋ kaakŋ jeele naan jee tɛɗn naabm Raage tu se jaayo.» 4Gɔtn se maam m'booy k'mɛɗ jee kɛn k'tɔndɗega tɔnd nakŋ kaakŋ jeel naanɗe ki se; naaɗe aas dupu‑kaar‑te‑sik‑sɔɔ‑kaar‑sɔɔ (144,000) ɔɔ jee se paac teeco taa ɓee gaan Israɛlge tu. 5Taa ɓee Juda se, dupu‑sik‑kaar‑dio (12,000); gɛn Ruben naaɗe dupu‑sik‑kaar‑dio (12,000); gɛn Gad naaɗe dupu‑sik‑kaar‑dio (12,000); 6gɛn Asɛr naaɗe dupu‑sik‑kaar‑dio (12,000); gɛn Nɛptali naaɗe dupu‑sik‑kaar‑dio (12,000); gɛn Manase naaɗe dupu‑sik‑kaar‑dio (12,000); 7gɛn Simɛon naaɗe dupu‑sik‑kaar‑dio (12,000); gɛn Lɛbi naaɗe dupu‑sik‑kaar‑dio (12,000); gɛn Isakar naaɗe dupu‑sik‑kaar‑dio (12,000); 8gɛn Zabulon naaɗe dupu‑sik‑kaar‑dio (12,000); gɛn Yusup naaɗe dupu‑sik‑kaar‑dio (12,000); gɛn Benjamin kic naaɗe dupu‑sik‑kaar‑dio (12,000). Jeegen se paac ɔk nakŋ kaakŋ jeele naanɗege tu. 9Kɛn nakgen se jaay deel se, maam m'aak mɛtjil jeege dɛn ŋasaŋ ŋasaŋ, ɔɔ jee se j'aɗen kɔŋ mɛɗ eyo. Jeege paac ute mɛtjilɗege taa ɓeeɗege, taar naaŋɗege ɔɔ taa naaŋɗege ɔɔ tuso kalgen jɛrlɛ ɔɔ raap raapo, ɔko doomo jiɗege tu ɔɔ ɗaar naan kaag do Raa ki ute gɛn Goon Baatn Raa ki. 10Naaɗe taaɗ makɔn̰ ɔɔ: «'Booyki! Raajegen iŋg do kaag do ki ute Goon Baata se, naaɗe ɓo kɛn aaj jeege.» 11Ɔɔ kɔɗn Raagen paacn̰ gurug ɔl kaag do daan ki ute magalge ɔɔ ne‑ɗimgen sɔɔ se, ɛrg und naanɗe naaŋ ki naan kaag do Raa ki ɔɔ naaɗe tɔɔm Raa, 12ɔɔ took ɔɔ: «Amin! Ɗeere, Raa naajege se ɔk tɔɔgɔ, jeel‑taara, tɔɔg cir nakge paac. K'tɔɔmin̰ki, k'den̰ki, k'nookin̰ki ɔɔ k'magalin̰ki gɛn daayum daayum. Amin!» 13Anum maakŋ magalge tu se, deb kalaŋ tɔnd mɛtum ɔɔ: «Jee te kalɗege raap raap se tap ɓo, naŋge? Ɔɔ naaɗe se iin̰o gay?» 14Maam m'tɛrlin̰ m'ɔɔ: «Bubm naka, jee se naai ɓo 'jeelɗe.» Naan̰ tɛrlum ɔɔ: «Jee se ɓo, dubar kɛn deel do, aano doɗe ki. Naaɗe se ɓo jee kɛn tugo kalɗege ute moosn Goon Baatn Raa jaay kalɗege tɛɗ raap lak lak se. 15Taa naan̰ se ɓo, naaɗe ɗaar naan kaag do Raa ki ɔɔ tɛɗin̰ naaba ɔɔ tɔɔmin̰ nɔɔrɔ katara maakŋ Ɓeen̰ kɛn jeege lee eemin̰ se. Ɔɔ debm kɛn iŋg do kaag do kɛn ese se aɗen bɔɔbɔ. 16Ɔɔ naaɗe se mɔɔtn ɓo ute maane se aɗen tɔɔl ey sum; ɔɔ kaaɗa ute gɔtɔ ɔŋg ɗiwil ɗiwil se kic naaɗe naam eyo. 17Taa Goon Baatn Raa iŋg daan kaag do ki se aɗen tɛɗn Mɛl gaamɗe ɔɔ aɗen tɔɔɗn kɔl gɔtn maan kɛn tɔɔɗ ɔɔy kɔl kɔl ɔɔ ɛɗ kaaja se. Ɔɔ Raa se lɛ utu aɗen kɔtn kaa‑maanɗe.»

will be added

X\