Apocalypse 5

1Tɛr maam m'aak nam kɛn iŋg do kaag do ki se, ɔk kitap k'teelin̰ga teele do ji daamin̰ ki, ɔɔ kitapm se ɔk raaŋa naagin̰ ki ɔɔ maakin̰ ki. Kitapm se k'teen̰in̰ga teen̰e ute tiiɓm teeje gɔtɔ kaam cili. 2Ɔɔ maam m'aak kɔɗn Raa kalaŋ se, ɔk tɔɔgɔ ɔɔ naan̰ taaɗ makɔn̰ ɔɔ: «Naŋa jaay ɔk ɗoobo an̰ kaasn gɛn tɔɔɗn tiiɓm teejn̰ gɔtɔ kaam cili jaay 'kɔɔɗn kaakŋ kitapm se?» 3Naɓo maakŋ raa ki, do naaŋ ki, ɔɔ mɛtn naaŋ ki, nam jaay an̰ kaasn gɛn kɔɔɗn kaakŋ kitapm se tap ɓo, gɔtɔ. 4Gɔtn se maam m'baag keem makɔn̰ɔ taa nam jaay ɔk ɗoobo gɛn kɔɔɗn kaakŋ kitapm se gɔtɔ. 5Tɛr maakŋ magalge tu se, deb kalaŋ taaɗum ɔɔ: «Ɔn̰ten keeme. 'Booyo! Tupiy teeco taa ɓee Juda ki se; naan̰ se teeco mɛtjil Gaar Daud ki. Naan̰ ɓo debm kɛn cir nakge paac kɛn utu 'tɔɔɗn tiiɓm teejn̰ k'teen̰in̰ gɔtɔ kaam cili se ɔɔ kɔɔɗn kaakŋ kitapm se.» 6Tɛr maam m'aak kaag do kɛn ne‑ɗimgen sɔɔ ute magalgen sik‑di‑kaar‑sɔɔ gurug ɔlin̰ daan ki se ɔɔ maam m'aak Goon Baatn Raa k'tɔɔlin̰o se ɗaar ɗaar daan ki. Naan̰ ɔk kaajge cili ɔɔ kaamge kic cili ɔɔ kaamgen cili se je taaɗn ute Nirl Raagen cili kɛn naan̰ ɔlɗeno do naaŋ ki paac. 7Goon Baata se ɓaa ɔŋ nam kɛn iŋg do kaag do ki se, ɔɔ ɔko kitapm kɛn ji daamin̰ ki se. 8Kɛn naan̰ jaay ɔko kitap sum se, ne‑ɗimgen sɔɔ ute magalgen sik‑di‑kaar‑sɔɔ se ɛrg naan Goon Baat ki. Ɔɔ naŋa naŋa kic ɔk nakŋ tec kurundu ute bɛjɛŋgen gɛn daab ɔɔ ɗooc ute nakgen oot nijimi. Kɛse je taaɗn ute keem jee Raage. 9Gɔtn se naaɗe aar kaa kɛn kiji ɔɔ maakŋ kaaɗe ki se, naaɗe taaɗ ɔɔ: «Ɗeere, naai kali ki sum ɓo aas gɛn kaakŋ kɔkŋ kitapm se, ɔɔ gɛn tɔɔɗn tiiɓm teejn̰ ro ki se. Taa naai se k'tɔɔlioga ɔɔ ute moosi se, naan Raa ki naai 'dugga do jeege ute mɛtjilɗege paac ute taar naaŋɗege ute taa ɓeeɗege ɔɔ ute taa naaŋɗege. 10Naai 'tɛɗɗenga tɛɗga jee naaige ɔɔ naai 'kɔsn gaara doɗe ki ɔɔ naai 'tɛɗɗenga tɛɗga jee tɛɗn sɛrkɛ Raajege tu. Ɔɔ naaɗe se utu kɔsn gaara tɛlɛ ute naai do jeege tun do naaŋ ki.» 11Ne‑ɗimgen sɔɔ ute magalgen sik‑di‑kaar‑sɔɔ kɛn gurug ɔl kaag do daan ki se, maam m'aaka ɔɔ m'booy kɔɗn Raage dupu kando kando ɔɔ dɛn ŋasaŋ ŋasaŋ ɓaaɗo gurug ɔlɗe naaɗe se daan ki. 12Naaɗe aar kaa makɔn̰ɔ ɔɔ maakŋ kaaɗe ki se, naaɗe taaɗ ɔɔ: «Goon Baatn k'tɔɔlin̰o se ɓo, aas debm kɛn Raa an̰ kɛɗn tɔɔgɔ, nakge paac kaam jin̰a, jeel‑taara, tɔɔg cir nakge paac. Ɔn̰ jeege paac an̰ nooko an̰ tɔɔmɔ ɔɔ an̰ magala.» 13Tɛr nakgen Raa aalo paac se, kɛngen maakŋ raa ki, do naaŋ ki, mɛtn naaŋ ki, ɔɔ kɛngen maakŋ maane ki ute nakgen ɓaa se paac m'booyɗe aar kaa ɔɔ maakŋ kaaɗe ki se, naaɗe taaɗ ɔɔ: «Nam iŋg do kaag do ki ute Goon Baata se, taa tɔɔgɔ se iin̰o gɔtn naaɗe ki ute naan̰ se k'tɔɔmɗeki, k'magalɗeki ɔɔ k'nookɗeki, gɛn daayum daayum.» 14Gɔtn se ne‑ɗimgen sɔɔ se took ɔɔ: «Amin.» Ɔɔ magalge se ɓaaɗo ɛrgɛ ɔɔ eemin̰a.

will be added

X\