Apocalypse 4

1Kɛn nakgen se jaay deel se, tɛr maam m'aak maakŋ raa ki se, taa ɗoobo ɔɔɗ waŋ. Gɔtn se m'booy mind nam kɛn taaɗumo deet deet makɔn̰ aan gɔɔ pulu se ɗeekum ɔɔ: «Ooko, 'ɓaaɗo raan ara ɔɔ maam m'utu m'ai taaɗn mɛtn nakgen sɔm utu 'kaan se.» 2Gaŋ gɔtn se sum ɓo, Nirl Salal naar bɔɔy dom ki ɔɔ m'aak kaag do maakŋ raa ki ɔɔ nam iŋg kiŋg do ki. 3Nam kɛn iŋg do ki se, daan kaamin̰ ɔmb birin̰ birin̰ aan gɔɔ kogen kɛn te roɗe, kɛn k'daŋin̰ jasp ute sardoin ɔmb birin̰ birin̰ se. Ɔɔ kaag do se, wɔɔjn̰ maakŋ raa ɔl gurugin̰a. Ɔɔ wɔɔj maakŋ raa se aak bɛɛ ɔmb birin̰ birin̰ ɔɔ zɛɛr mɛt ki ciɗiɗ aan gɔɔ ko kɛn k'daŋin̰ emorid. 4Kaag do se, kaag doge kuuy sik‑di‑kaar‑sɔɔ se ɔl gurugin̰ ɔɔ magalge sik‑di‑kaar‑sɔɔ tiŋg do kaag doge tun se. Kalɗegen roɗe ki se raap lak lak ɔɔ laatn gaarin̰gen k'tɛɗin̰ ute daab se doɗe ki tak tak. 5Maam m'aak mɛtn kaag do ki se maane aal wusuk wusuk m'booy mind jeege ute raa kɛn taat tirin̰ tirin̰ se gɔtn ese kici. Naan kaag do ki se m'aak jɛl pooɗge cili ɔk kɔkɔ. Jɛl pooɗgen cili se, kɛse je taaɗ ute nirl Raagen cili. 6Ɔɔ tɛr naan kaag do ki se naka kalaŋ tooɗ aan gɔɔ baar maan tooɗ yɛl yɛl se. Tɛr ne‑ɗimge sɔɔ gurug aal kaag do se, ɔɔ nakgen se naagɗe ɔɔ maakɗe paac ɔk kaama. 7Ne‑ɗimgen se, kɛn deet se tec tupiyu, gɛn k‑dige se tec goon maraŋa, gɛn k‑mɔtɔge se daan‑kaamin̰ tec aan gɔɔ gɛn debkilimi ɔɔ gɛn k‑sɔɔge se tec aan gɔɔ doobm kɛn tiin̰ tiin̰ raan se. 8Ne‑ɗimgen sɔɔ se, naŋa naŋa kic ɔk taa bɛɛkŋ kɛy mɛcɛ mɛcɛ ɔɔ taa bɛɛkŋ kɛyɗege se, maakin̰ ɔɔ naagin̰ ɔk kaamge. Ne‑ɗimgen se tɔɔm Raa nɔɔrɔ katara ɔn̰ eyo ɔɔ: «Mɛlje, naai ɓo debm salal cir paac, naai ɓo Raa Sidburku kɛn do dɔkin̰a, kɛn ɓɔrse ɔɔ kɛn utu ɓaaɗo se.» 9Raa kɛn iŋg do kaag do ki ɔɔ tiŋg zɛɛrɛ daayum daayum se, ne‑ɗimgen se jaay eemin̰a, nookin̰a ɔɔ tɔɔmin̰ se, 10magalgen sik‑di‑kaar‑sɔɔ se ɓaaɗo ɛrg naan nam kɛn iŋg do kaag do ki se ɔɔ eemin̰ naan̰ kɛn tiŋg daayum daayum zɛɛrɛ se. Naaɗe tɔɔɗ naatn ute laatn gaarin̰ge doɗe ki ɔɔ ɔmbin̰ naan kaag do ki se ɔɔ taaɗ ɔɔ: 11«Mɛlje Raa, tɔɔgɔ se iin̰o gɔtn naai ki, naai kali ki sum ɓo kɛn jeege ai tɔɔmɔ ɔɔ ai nooko, taa nakge paac se, naai ɓo Debm Kaalɗe, ɔɔ naai aalɗe ɔɔ ɓɔrse utu se kic ɓo te maak‑je naai.»

will be added

X\