Apocalypse 3

1Kɔɗn Raa kɛn lee bɔɔb eglizn maakŋ gɛgɛr kɛn Sarde ki se, raaŋin̰ maktub ɔɔ: 'Ɓooyo! Debm ɔk Nirl Raagen cili ute k‑dijgen cili se taaɗsen ɔɔ: «Maam m'jeel naabse kɛn naase 'lee 'tɛɗki se. Nookse eem aan gɔɔ jee utu zɛɛrɛ; num gaŋ naase se jeegen ooyga kooyo. 2Iin̰ki raan! Naabsegen mɛtin̰gen ɓaa ɓaa tuju se ɔkɗeki jiga taa naan Raam ki se, naabm naase 'tɛɗki se maam m'ɔŋin̰ paac ɓo aac eyo. 3'Saapki do taar kɛn 'booyin̰kiro se ɔɔ kɛn k'dooyseno jaay naase 'took aalkiro maakse do ki. Bin se 'bɔɔbin̰ki jiga ɔɔ 'tɛrlki maakse. Num kɛn naase jaay iŋgki zɛɛrɛ ey num, maam m'aɗe ɓaa aan gɔɔ debm ɓoogo kaaɗ kɛn naai 'jeel eyo ɔɔ m'ai kɔki do jii ki. 4Ey num Sarde ki se, jeesegen mɛtin̰ge se, kalɗege se naaɗe ɔŋ ilimin̰ te eyo. Naaɗe se ɓo jeegen tuso kalɗegen raap raap se ɔɔ naaɗe lee ute maama taa naaɗe an̰ kɔŋ kaasin̰a. 5«Bin num 'booyki: nakgen se paac jaay debm cirɗenga num, j'an̰ tusn kalgen raap raapo. Ɔɔ ron̰ maakŋ Kitapm Kaaj ki se lɛ, m'an̰ kɔŋ tɔɔl eyo, num naan Bubum ki ɔɔ naan kɔɗin̰ge tu se, maam m'taaɗn m'ɔɔ: naan̰ se debm maama. 6«Debm kɛn ɔk bi booyo num, 'booy taar kɛn Nirl Raa taaɗ eglizge tun gɔtn ɓaa se paac.» 7Kɔɗn Raa kɛn lee bɔɔb eglizn maakŋ gɛgɛr kɛn Piladelpi ki se, raaŋin̰ maktub ɔɔ: 'Booyo! Debm salal ɔɔ debm kɛn lee te kɛn mɛt ki, naan̰ ɓo debm kɛn ɔk lɛkɛrlɛ gɛn taa ɓee Daud, kɛn naan̰ jaay ɔɔɗga taa ɗoobo se, nam kuuy tap ɓo ɔŋ ɗɛkɛlin̰ eyo. Ɔɔ kɛn naan̰ ɗɛkɛlin̰ga lɛ, nam kuuy ɔk ɗoobm kɛn an̰ kɔɔɗ eyo, taaɗsen ɔɔ: 8«Naabm kɛn naase 'tɛɗki paac se, maam m'jeele. Aakki! Maam m'ɔɔɗiga taa ɗoobo naanse ki, nam tap ɓo an̰ kɔŋ gaas eyo. Ey num naase se 'tɔɔgse kic ɓo baata. Ute naan̰ se kic ɓo, naase 'took uunki taaruma ɔɔ ɔŋ 'baatum te eyo. 9'Booyki! Jee Ɓubm sitangen tɛɗ roɗe ɔɔ naaɗe Yaudge se, ɓɛrɛ, naaɗe se jee taar‑kɔɔɓge ɔɔ naaɗe se maam m'ɛɗisin̰ga kaam jise. 'Booyki. Maam m'utu m'aɗeno tɔɔɗn ɓaa gɔtse ki ɔɔ naaɗe utu 'kɛrgŋ mɛtn jɛse ki ɔɔ asen jeel naase se maam m'jese. 10Aan gɔɔ naase aayki kaamse 'bɔɔbkiga taarum se, maam kic m'utu m'asen bɔɔbɔ kaaɗ kɛn dubara aɗe ɓaa do jeege tun do naaŋ ki jaay utu aɗe naam se. 11Ɓɛrɛ, maam se ɔɔpga gɔɔrɔ m'aɗe ɓaa. Bin num taar Raa kɛn naase 'booyin̰ki se, ɔkin̰ki tɔɔgɔ taa laatn tɔɔm k'j'ɛɗɗesin̰ se, nam tap ɓo an̰ 'kɔŋ kuun eyo. 12«Nakgen se jaay debm cirɗega num, maam m'an̰ tɛɗin̰ aan gɔɔ duliyu maakŋ Ɓee Raam ki ɔɔ nam tap ɓo an̰ kɔŋ kɔɔɗ eyo. Ɔɔ maam m'an̰ raaŋ ro Raama ɔɔ ro gɛgɛr Jeruzalɛm kiji kɛn gɛgɛr Raam se ron̰ ki ɔɔ gɛgɛr se Raa bɔɔyin̰o maakŋ raa ki. Ɔɔ tɛr m'an̰ raaŋ rom kiji ron̰ ki kici. 13«Debm kɛn ɔk bi booyo num, 'booy taar gɛn Nirl Raa taaɗ eglizge tun gɔtn ɓaa se paac.» 14Kɔɗn Raa kɛn lee bɔɔb eglizn maakŋ gɛgɛr kɛn Laodise ki se, raaŋin̰ maktub ɔɔ: 'Booyo! Debm saaɗn kɛn tuj ɔrmin̰ eyo ɔɔ lee te mɛt ki kɛn k'daŋin̰ Amin, ɔɔ ute ɗoobm naan̰ se ɓo Raa aalo nakge paac se, naan̰ taaɗsen ɔɔ: 15«Naabsen kɛn naase 'tɛɗki paac se, maam m'jeele: naase lɛ urlki eyo ɔɔ ɔŋgki eyo. Maam je naase 'tɛɗki ɔŋgo ey lɛ urlu. 16Taa naase lɛ uurlki eyo ɔɔ ɔŋgki kɛɗɛk ey se, num aan gɔɔ naase ɔŋgki zom sum se, maam m'asen tɔɔɗn tɔl naatn. 17Taa naasen 'taaɗki ɔɔki: maam se m'ɔk maala ɔɔ m'tɛɗga debm maal gɔtin̰ gɔtɔ ɔɔ ɗim tap ɓo daayum eyo. Gaŋ naase 'jeelki eyo ey num naase ɓo jee kɔɔɗn yɛɛɓgen jeege aakse kic ɛɛjsen dose ki. Naase se jee daayge, 'kaam‑tɔɔkki ɔɔ 'mɛt‑beerki. 18'Booyki m'asen dɛjɛ: 'ɓaakiro gɔtum ki, 'dugki daabm k'j'ɔɔyin̰ga kɔɔy pooɗn taa aki tɛɗn jee maalge. 'Ɓaakiro 'dugki kalgen raap raapo taa asen kɔy mɛt‑beerse. Ɔɔ 'ɓaakiro 'dugki dawa kaama ɔɔ 'tɔmbki kaamse ki taa kaamsege 'tɔɔɗn taaka. 19'Booyki! Debm kɛn maam m'jen̰ se, maam m'mooyin̰a ɔɔ m'dɛjin̰a. Ɓɔrse se, 'tɛrlki kiŋgse ɔɔ ɔkumki ɔɔn̰ɔ. 20'Booyki! Maam se m'ɗaar taa ɗoob ki ɔɔ m'tɔnd kaam taara. Ɔɔ nam jaay booyga minduma ɔɔ ɔɔɗumga kaam taara se, maam m'kɛnd ɓeen̰ ki ɔɔ m'ɓaa kiŋg kɔsn te naan̰a. 21«Nakgen se jaay debm cirɗega num, maam m'an̰ kuun kɔnd do kaag dom ki ɔɔ naan̰ kiŋg te maama aan gɔɔ kɛn maam m'cir nakgen se jaay ɓɔrse m'iŋg do kaag do ki te Bubum kic se. 22«Debm kɛn ɔk bi booyo num, 'booy taar kɛn Nirl Raa taaɗ eglizge tun gɔtn ɓaa se paac.»

will be added

X\