Apocalypse 22

1Tɛr kɔɗn Raa taaɗum oolo kɛn ɔk maan kɛn ɛɗ kaaja. Ool se iin̰o gɔtn kaag do Raa ki ute gɛn Goon Baatn Raa ki. Ɔɔ ool se maanin̰ tooɗ yɛl yɛl. 2Ool se ɔɔy teec daan bɔɔr kɛn maakŋ gɛgɛr ki. Ɔɔ kaagŋ kɛn ɛɗ kaaja jeege tu se ɗaar jɛŋin̰ge tu. Kaagŋ se maakŋ baar ki se naan̰ ooj ɗɔɔl mɛt sik‑kaar‑dio. Ɔɔ maakŋ laap ki tak ɓo naan̰ oojo. Ɔɔ kambin̰ se ɓo kɛn lee ɛɗ lapia mɛtjil jikilimge tu paac. 3Maakŋ gɛgɛr kɛn ese se, nakgen k'naamɗega naam se tɛɗn gɔtɔ. Kaag do Raa ute gɛn Goon Baatn Raa se 'tɛɗn gɔtn ese ɔɔ jee tɛɗn naabm Raage se utu an̰ lee keeme. 4Naaɗe utu kaakŋ daan kaamin̰a ɔɔ ro Raa se j'utu j'aɗesin̰ raaŋ do naanɗege tu. 5Gɔtn naane se, nɔɔrɔ gɔtɔ. Kaaɗa ute lɔɔmpɔ se, nam tap ɓo je ey sum, taa Mɛljege Raa mala utu aɗen wɔɔr gɔtɔ. Ɔɔ naaɗe se utu 'kɔsn gaara ute naan̰ gɛn daayum daayum. 6Tɛr kɔɗn Raa taaɗum ɔɔ: «Ɗeer ɗeer, taar se taar mɛt ki. Mɛljege Raa kɛn ɛɗo Nirlin̰ jeege tun taaɗ taar teeco taarin̰ ki se, naan̰ debm ɔlo kɔɗin̰ gɛn taaɗn nakgen ɔɔpga baat utu kaan se jee tɛɗn naabin̰ge tu.» 7Isa ɗeek ɔɔ: «'Booyki! Ɓɛrɛ, maam m'ɔɔpga gɔɔrɔ m'utu m'aɗe ɓaa. Maak‑raapo deb kɛn booy uun taar kɛn k'taaɗin̰ maakŋ kitap kɛn ese se, taa taar se teeco taar Raa ki.» 8Debm kɛn booyo ɔɔ aako nakgen deel paacn̰ ese se, kɛse maam Jan. Kɛn maam jaay m'booyo ɔɔ m'aako aas se, maam m'ooc mɛtn jɛ kɔɗn Raa kɛn taaɗum nakgen deel ese se, m'je m'an̰ keeme. 9Naɓo naan̰ taaɗum ɔɔ: «Ɔn̰ɔ! Ɔn̰te 'kɛrgŋ naanum ki. Maam kic m'debm tɛɗn naaba aan gɔɔ naai ɔɔ aan gɔɔ gɛnaaigen jee taaɗ taar teeco taar Raa ki ute jee kɛn booy uun taar kɛn k'raaŋin̰ maakŋ kitap kɛn ese se. Anum naai se, eem Raa kalin̰ ki sum!» 10Tɛr naan̰ ɗeekum ɔɔ: «Taargen kɛn maakŋ kitap kɛn ese se, teeco taar Raa ki; ɔn̰te 'kɔyin̰a, taa kaaɗn kɛn Raa an tɛɗn nakgen se ɔɔpga gɔɔrɔ. 11Bin se, debm kɛn jaay tɛɗ naka te ɗoobin̰ ey se, n̰'tɛɗ n̰'ɓaan sak sak ɔɔ debm tɛɗn nakgen jig ey se kic lɛ, n̰'tɛɗn n̰'ɓaa sak sak. Num debm tɛɗ naka ute ɗoobin̰a, n̰'tɛɗ n̰'ɓaa te naanin̰a ɔɔ debm kɛn salal se, n̰'tɛɗn salal n̰'ɓaa te naanin̰ kici.» 12Isa ɗeek ɔɔ: «'Booyki! Ɓɛrɛ, ɔɔpga gɔɔrɔ maam m'utu m'aɗe ɓaa. Ɔɔ kɛn maam m'aɗe ɓaa se, m'ano ɓaa ute nakŋ kɛn naŋa naŋa kic ɓo utu m'an̰ kɛɗn bɛɗin̰ do nakgen tun naan̰ tɛɗo. 13Maam se m'Alpa ɔɔ m'Omega, maam ɓo m'debm m'deete ɔɔ debm kaam mɔɔtn. Ɔɔ maam ɓo m'kupm mɛta ɔɔ m'taar tɔɔlin̰a.» 14«Maak‑raapo jeege tun lee tug kalɗege. Ute naan̰ se naaɗe ɔk ɗoobo gɛn kɔsn koojn̰ kaagŋ kɛn ɛɗ kaaja maakŋ gɛgɛr kɛn ese se ɔɔ kɔŋ kɛnd te taa ɗoobo. 15Num gaŋ jee tɛɗn nakŋ sɔkɔn̰ge, jee ooj roɗege, jee kɛɛsn mɛndge ute gaabge, jee tɔɔl jeege, jee maragge ɔɔ jee lee tɛɗ taar‑kɔɔɓge se, naaɗe se paac 'kɔɔpm naatn.» 16«Maam m'Isa m'ɔlo kɔɗum taa 'ɓaa tɛɗn saaɗum naan eglizge tun gɔtn ɓaa se paac. Maam se, m'teeco mɛtjil gɛn Gaar Daud ki ɔɔ maam ɓo Bɛbɛlɛ.» 17Gɔtn se Nirl Raa ute mɛnd Goon Baatn Raa ɗeek ɔɔ: «'Ɓaaɗo!» Ɔɔ debm kɛn booyga taar se kic ɓo n̰'ɗeek n̰'ɔɔ: «N̰'ɓaaɗo! Debm kɛn maan tɔɔlin̰a ɔɔ je kaay maan kɛn ɛɗ kaaja se, n̰'ɓaaɗo n̰'kaay cɛrɛ.» 18Jee paacn̰ kɛn booy taar Raa kɛn k'raaŋin̰ maakŋ kitap kɛn teeco taar Raa ki ese se, maam Jan m'ɗeeksen m'ɔɔ: debm jaay ziiɗ taara do taar kɛn se num, Raa kic utu an̰ ziiɗn dubar kɛn k'raaŋin̰ maakŋ kitap ki se do ki. 19Ɔɔ taar Raa kɛn k'raaŋin̰ maakŋ kitap kɛn teeco taar Raa ki ese se jaay, debm ɔɔɗn naatn ute kɛn kalaŋ se, naan̰ se 'kɔŋ kɔsn koojn̰ kaagŋ kɛn ɛɗ kaaja se eyo ɔɔ 'kɔŋ kɛnd maakŋ gɛgɛr kɛn salal se ey kici. 20Tɛr Isan kɛn taaɗ nakgen ara se taaɗ ɔɔ: «Ɗeere, maam se ɔɔpga gɔɔrɔ m'utu m'ɓaaɗo.» Amin! Mɛljege Isa, 'ɓaaɗo! 21Ɔn̰ Mɛljege Isa asen tɛɗn bɛɛn̰ naase ki paac.

will be added

X\