Apocalypse 2

1Kɔɗn Raa kɛn lee bɔɔb eglizn maakŋ gɛgɛr kɛn Ɛpɛz ki se, 'raaŋin̰ maktub ɔɔ: 'Booyo! Debm kɛn ɔk k‑dijge cilin ji daamin̰ ki ɔɔ kɛn lee daan lɔɔmpge tun cilin gɛn daab se taaɗi ɔɔ: 2«Naabse kɛn naase 'tɛɗki paac ute kaay kaamse kɛn naase ɔkki maakŋ naabse ki se, maam m'jeele. Ɔɔ maam m'jeele naase se ɔŋki 'sɛrkŋ jee kusin̰ge eyo. Jee kɛn tɛɗ roɗe aan gɔɔ jee kaan̰ naabm Isage se, naase aak 'jeelɗeki naaɗe se jee kaan̰ naabm Isage eyo, naase ɔŋɗeki naaɗe se, jee taar‑kɔɔɓge. 3Anum naase se daayum aayki kaamse; naase se 'dabarkiga taa maama ɔɔ ɔlki te mɛtse cɛɛɓ ki eyo. 4Num maam se m'ɔk taara te naase gɛn taaɗa: maak‑je kɛn naase ɔkki do maam ki deet se, ɓɔrse aan gɔɔ kɛn do dɔkin̰ eyo. 5'Saapki tu! Ey num naase uunkiroga mɛtn naabse jiga naɓo naase aal oockiga. Bin num 'tɛrlki kiŋgse ɔɔ 'tɛrlki tɛɗn naabse aan gɔɔ kɛn naase 'lee tɛɗin̰kiro do dɔkin̰ se. Kɛn bin ey num, maam se m'utu m'asen kɔŋɔ ɔɔ kɛn naase jaay 'tɛrlki te kiŋgse ey se, lɔɔmpsen gɛn daab se, m'an̰ kuun ɗɛɛtn gɔt kuuy. 6Naɓo naase kic utu 'tɛɗki nakŋ jiga. Aan gɔɔ maam m'ɔɔɗ m'uun naabm jee Nikolait tɛɗ se, naase kic ɔɔɗ undɗeki bin kici. 7«Debm kɛn ɔk bi booyo num, 'booy taar kɛn Nirl Raa taaɗ eglizge tun gɔtɔ ɓaa se paac se: nakgen se jaay debm cirɗega num, maam m'an̰ kɛɗn koojn̰ kaagŋ kɛn ɛɗ kaaja kɛn maakŋ jinɛn Raa ki se.» 8Kɔɗn Raa kɛn lee bɔɔb eglizn maakŋ gɛgɛr kɛn Smirn ki se, 'raaŋin̰ maktub ɔɔ: 'Booyo! Debm deet deet ɔɔ kɛn kaam mɔɔtn, naan̰ kɛn ooyo ɔɔ duroga daan yoge tu se taaɗsen ɔɔ: 9«Maam se m'jeel dubarse ute daayse, naɓo naan Raa ki se, naase se jee maalge. Kɔɔɗn kɛn jee tɛɗ roɗe aan gɔɔ Yaudge lee ɔɔɗse se, maam m'utu m'booyo. Naaɗe se Yaudge eyo, num naaɗe se jee Ɓubm sitange. 10Naase se utu aki dabara naɓo ɔn̰te 'ɓeerki. 'Ɓooyo! Bubm sitange utu tɔkŋ jeesegen mɛtin̰ge aɗe kɔmb daŋgay ki taa asen naama ɔɔ naase aki dabara gɛn ɓii sik. Num aayki kaamse bini kɛn j'asen tɔɔl kic num ɔn̰ten tujki ɔrmse ɔɔ maam m'utu m'asen kɛɗn laatn tɔɔmɔ kɛn taaɗ ɔɔ naase se ɔŋkiga kaaja gɛn daayum. 11«Debm kɛn ɔk bi booyo num, 'booy taar kɛn Nirl Raa taaɗ eglizge tun gɔtn ɓaa se paac: debm jaay aasin̰ga ɔɔ ɔŋ cirga se, yo gɛn k‑dige se an̰ kɔŋ tɛɗn ɗim eyo.» 12Kɔɗn Raa kɛn lee bɔɔb eglizn maakŋ gɛgɛr kɛn Pɛrgam ki se, raaŋin̰ maktub ɔɔ: 'Ɓooyo! Debm kɛn ɔk gɔrɗ‑jɛrl taarin̰ge di paac taat ranan ranan se, taaɗsen ɔɔ: 13«Maakŋ gɛgɛr kɛn naase iŋgki se, maam m'jeelse. Ɓubm sitange utu iŋg gɔtn se ɔɔ gɔtse ki se, naan̰ gaarge. Num ute naan̰ se kic, naase utu 'dɔɔkki ute maama. Ey num maakŋ gɛgɛr kɛn se ɓo naaɗe tɔɔlo Antipas debm saaɗum kɛn tuj te ɔrmin̰ ey se. Ute naan̰ se kic ɓo naase ɔn̰ki te eyo, utu aalki kaal maakse dom ki tap, ey num Bubm sitange se utu iŋg gɔtse ki. 14«Num maam se m'ɔk taara te naase gɛn taaɗa: gɔtn naase ki se, naase ɔkki jeegen kɛn uun ɗoobm Balaam kɛn dɛj Gaar Balak jaay ɔl gaan Israɛlge tɛrl naaga Raa ki ɔso daa maraga do dɔkin̰a ɔɔ ɛɛso naapa. 15Ɔɔ tɛr gɔtn naase ki se, naase ɔkki jeegen took uun taar kɛn jee Nikolaitge lee dooy jeege se kici. 16Ɓɛrɛ, naase se 'tɛrlki kiŋgse! Ey num ɔɔpga gɔɔrɔ maam m'utu m'ɓaaɗo ɔɔ m'utu m'aɗen kooco ute gɔrɗ‑jɛrl kɛn 'teecn̰ taarum ki se. 17«Debm kɛn ɔk bi booyo num, 'booy taar Nirl Raa taaɗ eglizge tun gɔtn ɓaa se paac: debm aasin̰ga do nakge tun se num, maam m'an̰ kɛɗn kɔsn k'daŋin̰ maan kɛn Raa ɔyin̰o kɔy se. Ɔɔ tɛr m'an̰ kɛɗn ko raap raapo. Ɔɔ ko kɛn ese se, k'raaŋga raaŋ ro kiji ro ki. Ɔɔ debm j'an̰ kɛɗn ko se sum ɓo 'jeel ro se, ey num nam kuuy se kɔŋ jeel eyo.» 18Kɔɗn Raa kɛn lee bɔɔb eglizn maakŋ gɛgɛr kɛn Tiatir ki se, raaŋin̰ maktub ɔɔ: 'Ɓooyo! Goon Raa kɛn kaamin̰ aan gɔɔ pooɗn ɔk kɔkɔ ɔɔ jɛn̰ge aan gɔɔ maal zɛɛr kɛn j'ɔɔɗin̰o pooɗn aac dɛŋ se, taaɗsen ɔɔ: 19«Nakŋ naase 'tɛɗki paac se maam m'jeele. Maam m'jeel maak‑je kɛn naase ɔkki do jeege tu, ɔɔ ɓɔrse kic naase utu aal kaal maakse dom ki rɔk. Maam m'jeel naabsen kɛn lee 'tɛɗki ute kaay kaam kɛn naase ɔkki se. Ɔɔ m'jeele naabsegen naase 'tɛɗki kaam mɔɔtn se dɛn cir kɛn deete. 20«Num maam se, m'ɔk taara te naase: Jezabɛl mɛnd tɛɗ ron̰ aan gɔɔ mɛnd taaɗ taar teeco taar Raa ki se, naase ɔn̰in̰ki naan̰ lee dɛrl jee tɛɗn naabumge ɔɔ dɛjɗe ɔɔ k'tɛrl naaga Raa ki ɔɔ ɔlɗe naaɗe se ɔs daa maraga. 21Maam m'ɔn̰ ɓiia, m'ɔɔ bin sum ɓo, naan̰ 'tɛrl kiŋgin̰a ɔɔ kɔn̰ kɛɛsn gaabin̰a. Num gaŋ naan̰ baate kɔn̰ɔ. 22'Booyki! Ɓɔrse maam m'an̰ kaalin̰ do daŋal ki, naan̰ dabar makɔn̰ɔ. Ɔɔ gaabgen ɛɛsin̰ naan̰ se jaay tɛrl te kiŋgɗe ey num, naaɗe kic m'utu m'aɗen dabar bin kici. 23Maam m'an̰ tɔɔl te gɛnin̰ge se naatn. Bin ɓo eglizge paac 'jeele, maam se m'jeel m'naŋ taar kɛn maakŋ jikilimge tu. Ɔɔ naŋa naŋa kic ɓo, maakse ki se, maam m'an̰ dabara do nakge tun naan̰ tɛɗa. 24Num naasen, jee ɔɔp maakŋ Tiatir kɛn ɔlsen maak ki ey se, taar jee se lee dooy jeege se, naase lɛ 'took uunki te eyo, naase lɛ 'jeki te jeel taar maakŋ Ɓubm sitange tu aan gɔɔ gɛn naaɗen lee saapin̰ se eyo. Taa naan̰ se maam m'asen kɔŋ kɔnd ɗim kuuy dose ki ey sum. 25Naɓo nakŋ kɛn naase 'booyin̰kiga jaay aalkiga maakse do ki se, ɔkin̰ki tɔɔgɔ bini maam m'aɗe ɓaa maak ki. 26«Nakgen se jaay debm cirɗega ɔɔ iŋgga do naabum ki bini naŋin̰ga tak se, maam m'aɗen tɔnd naaɗe ɓo 'tiŋg do mɛtjil jikilimge tun do naaŋ ki paac. 27Ɔɔ jee ɓaa se paac naaɗe aɗen lee tɔnd ute sirɗn k'ɗaapin̰ ute maala. Ute naan̰ se, naaɗe aɗe lee tɔnd tɔɔkŋ aan gɔɔ kɛn k'lee k'tɔnd k'tɔɔk dugul nɛn̰jge se. 28Aan gɔɔ Bubum ɛɗum tɔɔgɔ do jeege tu se, maam kic m'ɛɗɗen naaɗe ki bin kici. Ɔɔ tɛr maam m'utu m'aɗen kɛɗn Bɛbɛl gɛn do mɛtbeeki se kici. 29«Debm kɛn ɔk bi booyo num, booy taar kɛn Nirl Raa taaɗ eglizge tun gɔtn ɓaa se paac.»

will be added

X\