Apocalypse 15

1Tɛr maam m'aak maakŋ raa ki nakŋ‑kɔɔɓm kuuy magala ɔɔ deel doa. Maam m'aak kɔɗn Raage cili ɔk dubargen cili jiɗege tu kɛn utu aɗe ɓaa kaam mɔɔtn se. Ute nakgen se ɓo Raa naŋ maak‑taarin̰a. 2Tɛr maam m'aak naka tooɗ yɛl yɛl aan gɔɔ baar maane ɔɔ ɔk pooɗo ɓuluk ɓuluk maak ki. Do baar kɛn tooɗ yɛl yɛl ese se maam m'aak jeege ɗaar ɗaara do ki ɔɔ jeegen se ɓo kɛn ciro daa‑gaabm ute nakŋ kɛn k'cɔɔcin̰ tecin̰ tece ɔɔ ute numirin̰ se. Ɔɔ naaɗe se, Raa ɛɗɗen nakgen tec kurundge se jiɗege tu. 3Naaɗe aar kaa gɛn Musa, debm tɛɗn naabm Raa ɔɔ kaa gɛn Goon Baatn Raa. Naaɗe aar ɔɔ: «Mɛljege Raa Sidburku, nakŋ naai 'tɛɗ se, deel doa ɔɔ aak bɛɛ aak eyo. Gaar do naaŋa paac, ɗoobm naai se, ɗoobm kɛn daan ki ɔɔ kɛn mɛt ki. 4Mɛlje, debm jaay ai ɓeer naai ki eyo ɔɔ ai nookŋ roi ey se tap ɓo, naŋa? Taa naai kali ki sum ɓo debm salal. Mɛtjil jee do naaŋ ki paac se utu 'kɛrgŋ naani ki. Nakŋ naai 'tɛɗin̰o ute ɗoobin̰ se naaɗe 'kaakŋ jeele.» 5Kɛn nakgen se jaay deel se, maam m'aak Ɓee Raa kɛn maakŋ raa ki se ɔɔɗ waŋ ɔɔ m'aak kɔrɔr Raa se maak ki. 6Maam m'aak kɔɗn Raagen cili kɛn teeco maakŋ Ɓee Raa ki ɔɔ kɔɗn Raage se, tuuso kalgen salal aak bɛɛ ɔmb mɛt ki birin̰ birin̰ se. Kaaɗɗege se naaɗe dɔɔkin̰ ute kɔl k'ɗaapin̰ ute daab ɔɔ naaɗe se ɓo utu ano ɓaa ute dubargen cili se. 7Tɛr maakŋ ne‑ɗimge tun sɔɔ se, deb kalaŋ nig kɔɗn Raage tun cili se, kɔɔpm gɛn daab tak tak. Ɔɔ maakŋ kɔɔpge tun se, ɗooc ute maak‑taar Raa kɛn tiŋg gɛn daayum daayum. 8Ɔɔ maakŋ Ɓee Raa se paac ɗooc ute saa ɔɔ saa se taaɗ ɔɔ tɔɔgŋ Raa kɛn wɔɔr gɔtɔ kɛlɛŋ se utu gɔtn se. Nam tap ɓo ɔŋ ɛnd maak ki eyo, bini dubargen cilin kɛn kɔɗn Raagen cili ɓaanɗeno se, deel jaayo.

will be added

X\