Apocalypse 13

1Tɛr maam m'aak daa‑gaaba kalaŋ teeco maakŋ baar ki. Naan̰ ɔk kaajge sik ɔɔ don̰ge cili ɔɔ do kaaja kalaŋ se, ɔk laatn gaarin̰ge tak tak. Ɔɔ daan don̰ge tu se, ɔk rogen kɛn naaj Raa. 2Daa‑gaabm kɛn maam m'aakin̰ se tec aan gɔɔ mɛrɛŋɛ, naɓo jɛn̰ge se aan gɔɔ jɛ duuyu ɔɔ ɔk kɔɔkge aan gɔɔ gɛn tupiyu ɔɔ taarin̰ kic gɔɔ gɛn tupiyu. Daa‑gaabm se k‑lamaga ɛɗin̰ tɔɔgin̰a ɔɔ ɔndin̰ do kaag don̰ ki ɔɔ ɛɗin̰ magala. 3Daan don̰ kalaŋ k'awarin̰ se, ey num dun̰ se ɓaan̰ ɓaa tɔɔlɔ, naɓo dun̰ se ɓaa urlu. Ɔɔ kɛn jee do naaŋ ki paac jaay aakin̰ se, nakŋ se tap ɓo ɔkɗen taaɗ eyo ɔɔ naaɗe baagin̰ daana. 4Taa k‑lamaga ɛɗga gaara daa‑gaab ki se, jeege paac ɛrg naan k‑lamaga ki se. Ɔɔ naaɗe tɔɔm daa‑gaabm se kici ɔɔ ɗeek ɔɔ: «Daa‑gaabm se tap ɓo naŋa aas te naan̰a ɔɔ naŋa kɔŋ ɗaar naanin̰ ki?» 5Daa‑gaabm se, j'undin̰ kulu gɛn taaɗn taargen deel doa ɔɔ gɛn naajn̰ Raa. Naan̰ j'ɛɗin̰ tɔɔgɔ gɛn laapa sik‑sɔɔ‑kaar‑dio (42). 6Naan̰ ɛɛp taarin̰ naaj Raa, naaj ro Raa, naaj Ɓee Raa kɛn maakŋ raa ki ute jee kɛn maakŋ raa ki. 7J'undin̰ kulu gɛn tɛɗn bɔɔrɔ ute jee Raage ɔɔ aɗe ciri. Ɔɔ jee do naaŋ ki paac te mɛtjilɗege, taa ɓeeɗege, taa naaŋɗege ɔɔ te taar naaŋɗege, j'ɛɗin̰sin̰ kaam jin̰a. 8Jee do naaŋ ki paac utu 'kɛrgŋ naanin̰ ki, num jee 'kɛrg ey se, jee kɛn roɗe k'raaŋɗenoga raaŋ maakŋ Kitapm Kaajn̰ gɛn Goon Baatn Raa ki do dɔkin̰ kɛn Raa utu aalo kaal dunia. Ɔɔ Goon Baat se ɓo kɛn ɔn̰ ron̰ k'tɔɔlin̰o sɛrkɛ se. 9Debm kɛn ɔk bi gɛn booy taar se num, booyin̰ taar se jiga. 10Debm kɛn Raa taaɗ ɔɔ j'utu j'an̰ kɔkŋ ɓulu lɛ, j'utu j'an̰ kɔkɔ ɔɔ kɛn ɔɔ j'utu j'an̰ tɔɔl ute gɔrɗ‑jɛrlɛ lɛ, j'utu j'an̰ tɔɔl kici. Bin num, jee Raage j'aay kaamɗe j'aal maakɗe do Raa ki. 11Tɛr m'aak daa‑gaabm kuuy teeco maakŋ naaŋ ki. Naan̰ ɔk kaajge dio tec aan gɔɔ gɛn goon baata, naɓo kɛn naan̰ taaɗ se tec aan gɔɔ k‑lamaga. 12Daa‑gaabm deet deet se, ɔlin̰ tɛɗ nakgen deel doa naanin̰ ki. Naan̰ ɔl jeegen do naaŋ ki paac ɛrg naan daa‑gaab kɛn deet deet kɛn k'awarin̰ ɓaa ɓaa kooyo jaay dun̰ urlo se. 13Naan̰ tɛɗ nakgen magal deel doa naan jeege tun do naaŋ ki paac bini bɔɔyo pooɗo raan naanɗe ki. 14Naan̰ j'undin̰ kulu gɛn tɛɗn nakgen deel doa naan daa‑gaab kɛn deet deet se, ɔɔ ute naan̰ se naan̰ dɛrl jeegen do naaŋ ki ɔɔ ɗeekɗen ɔɔ k'tɛɗ naka tec aan gɔɔ daa‑gaabm kɛn deet deetn k'awarin̰o ute gɔrɗ‑jɛrlɛ jaay ooyo te ey se. 15Daa‑gaabm kɛn teeco maakŋ naaŋ ki se, j'ɛɗin̰ tɔɔgɔ gɛn kɔl ko maakŋ nak kɛn naan̰ tɛɗin̰ tec aan daa‑gaabm deet deet se, ɔɔ nakŋ se, baag taaɗa aan gɔɔ debkilimi ɔɔ taa jeegen paacn̰ kɛn baate kɛrgŋ naan daa‑gaab kɛn deet deet se, naan̰ ɔl k'tɔk k'tɔɔlɗe naata. 16Jee j'aalɗen maak ki ute jee j'aalɗen maak ki eyo, jee maalge ute jee daayge, ɓulge ute jeegen ɓulge eyo, paac naan̰ ɔl k'tɔndɗe nakŋ kaakŋ jeele ji daamɗege tu ey lɛ do naanɗege tu. 17Debm jaay ɔk nakŋ kaakŋ jeele ron̰ ki ey se, k'dugŋ nakin̰ eyo ɔɔ naan̰ kic lɛ kɔŋ dugŋ nakŋ nam eyo. Nakŋ kaakŋ jeel ese se ɓo, naan̰ ro daa‑gaabm ese ɔɔ mɛɗn ese se kɛn tum ute numirin̰ kici. 18Ɔn̰ jeege booy jeel kɔkŋ mɛtn taar ese se jiga. Debm mɛtɛk se, ɔn̰ dooy jeel mɛtn taar numir ro daa‑gaab kɛn ese se ɔɔ numir ese se ɓo tum te ro debkilim se. Numir se jaay k'mɛɗin̰ se kaar‑mɛcɛ‑ute‑sik‑mɛcɛ‑kaar‑mɛcɛ (666).

will be added

X\