Apocalypse 12

1Ɔɔ maam m'aak nakŋ deel doa teeco maakŋ raa ki: nakŋ maam m'aak se, mɛnda uuso kal gɛn kaaɗa ɔɔ iŋg tɔɓ jɛn̰ge do laap ki, ɔɔ ɔk laata don̰ ki gɛn k‑dijge sik‑kaar‑dio. 2Mɛnd se mɛndkaama, iŋg diig daay ɗɛs ɗɛs ɓaa ɓaa koojo. 3Tɛr maam m'aak nakŋ deel doa kuuy maakŋ raa ki daala: nakŋ‑kɔɔɓm maam m'aak se k‑lamaga magala. Naan̰ aac aan gɔɔ pooɗo ɔɔ ɔk daan don̰ge cili ɔɔ kaajin̰ge sik. Ɔɔ daan don̰gen cili se, ɔk laatn gɛn gaarin̰ge cili kici. 4K‑dijge jaay k'gaaŋɗe kaam mɔtɔ se ɔɔ kɛn kaam kalaŋ se, naan̰ tɔɔɗ siɗeno paac naaŋ ki te yɛlin̰a. Gɔtn se k‑lamaga se ɓaa ɗaar naan mɛnd kɛn ɓaa ɓaa koojo se, taa kɛn mɛnd se jaay oojga num, goonin̰ se naan̰ utu an̰ kɔsn naatn. 5Mɛnd se ooj goono ɔɔ goonin̰ se gaaba. Goon se utu tɔɔɗn jeege paac ute sirɗn maala. Anum goon se, j'uun k'ɓaansin̰ naan Raa ki ɔɔ naan kaag don̰ ki. 6Gɔtn se mɛnda se aan̰ ɓaa do kɔɗ‑ɓaar ki ɔɔ gɔtn se ɓo gɔt kɛn Raa ɗaapin̰sin̰ga ɗaapa taa an̰ ɓaa kulin̰ gɛn ɓii dupu‑te‑kaar‑di‑te‑si‑mɛcɛ (1,260). 7Tɛr maam m'aak bɔɔrɔ iin̰ maakŋ raa ki. Magal kɔɗn Raa k'daŋin̰ Mikaɛl te kɔɗin̰ge baag tɛɗn bɔɔrɔ te k‑lamaga ɔɔ k‑lamaga kic ɓo te kɔɗin̰ge, 8naɓo k‑lamaga se naaɗe ɓaa cirin̰a. Taa naan̰ se ɓo k‑lamaga ute kɔɗin̰ge se ɔŋ te gɔtn ɗaar maakŋ raa ki eyo. 9Gɔtn se k‑lamagŋ ese se k'tuurin̰o maakŋ raa ki, naan̰ se ɓo wɔɔjn̰ kɛn te do dɔkin̰ kɛn k'daŋin̰ Iblis ɔɔ Bubm sitange kici, naan̰ ɓo debm kɛn lee dɛrl jee do naaŋ ki ute magalin̰a. Naan̰ ute kɔɗin̰ge se paac k'tuur k'j'ɔlɗeno do naaŋ ki. 10Tɛr m'booy mind nam taaɗ makɔn̰ɔ maakŋ raa ki ɔɔ: «Ɓɔrse, kaaɗn kɛn Raaje taaɗn tɔɔgin̰a, kuun gaarin̰a ɔɔ kaajn̰ jeege se, aanga. Ɓɔrse, naan̰ ɛɗga tɔɔgɔ al‑Masiin̰ ki. Anum debm kɛn lee tɔkŋ mind gɛnaajege naan Raa ki se k'tuurin̰oga naatn, ey num naan̰ ɓo debm kɛn lee tɔkɗe mindɗe nɔɔrɔ katara naan Raa ki. 11Gaŋ gɛnaajege se tɔɔg cirin̰ga ute ɗoobm moosn gɛn Goon Baatn Raa ɔɔ ute Taar Raa kɛn naaɗe lee taaɗ jeege tu; naaɗe took ɔn̰ roɗe taa j'aɗen tɔɔlɔ. 12Taa naan̰ se ɓo naase jeegen iŋgki maakŋ raa ki se 'tɛɗki maak‑raapo! Num asen kɔɔn̰ naase jeegen kɛn do naaŋ ki ute kɛngen do baar ki, taa Bubm sitange te maak‑taarin̰ se, ɓɛrɛ, bɔɔy ɔŋsenga, taa naan̰ jeele kaaɗin̰ se ɔɔpga baata.» 13Kɛn k‑lamaga jaay aak k'tuur k'j'ɔlin̰o do naaŋ ki se, gɔtn se naan̰ baag tuur mɛnd kɛn ooj goon gaaba se. 14Gaŋ mɛnd se j'ɛɗin̰ taa bɛɛkŋ kɛyɛ magal magal aan gɔɔ gɛn doobo taa an kiin̰ ɓaa do kɔɗ‑ɓaar ki dɔk ute k‑lamaga se ɔɔ gɔtn naane se ɓo, gɔt kɛn k'ɗaapin̰sin̰ taa j'an̰ ɓaa kul gɛn ɓaara mɔtɔ te laapa mɛcɛ se. 15Gɔtn se k‑lamagŋ kɛn ɔko mɛtn mɛnda se, ɔɔɗ ɔlo maan maakin̰ ki aan gɔɔ ool ɗoocoga ɗooc se taa an̰ gɔɔbm tɔɔlɔ. 16Num gaŋ naaŋa ɓaaɗo naakŋ mɛnd se ɔɔ naaŋ se ɛɛp taarin̰a ɔɔ aay te maan kɛn k‑lamaga ɔɔɗ ɔlin̰o se. 17Num k‑lamaga ute maak‑taarin̰ se, ɔk tɛrl ɓaaɗo gɛn tɛɗn bɔɔrɔ mɛtjil mɛnd kɛn ɔɔp se. Naaɗe se ɓo jee kɛn tɛɗn nakŋ Raa ɔɔ k'tɛɗa, jee ɔk taar Isan kɛn mɛt ki se. 18Anum, gɔtn se, k‑lamaga ɓaa ɗaar do kɛɛs kɛn taa baar ki.

will be added

X\