Apocalypse 10

1Tɛr maam m'aak kɔɗn Raa kuuy tɔɔgɔ bɔɔyo maakŋ raa ki. Ɔɔ naan̰ uuso kal gapara ɔɔ teelo don̰ ute wɔɔjn̰ maakŋ raa; ɔɔ daan‑kaamin̰ aan gɔɔ kaaɗa ɔɔ jɛn̰ge magal aan gɔɔ duliyu ɔɔ tec pooɗo. 2Naan̰ ɔk kitapm baata k'paatin̰ga paat se jin̰ ki. Ɔɔ jɛ daamin̰ se, naan̰ ɔɓin̰ do baar ki ɔɔ jɛ jeelin̰ se lɛ, naan̰ ɔɓin̰ naaŋ ki. 3Gɔtn se naan̰ ɔɔɗ ɔɔy makɔn̰ aan gɔɔ tupiyu. Kɛn naan̰ jaay ɔɔɗ ɔɔy se, maam m'booy raa taat tiirin̰ tiirin̰ gɔtɔ kaam cili. 4Ɔɔ kɛn Raa jaay taat aas se, maam m'je m'raaŋ mɛtn taarin̰a, naɓo m'booy mind nam maakŋ raa ki taaɗum ɔɔ: «Mɛtn taar kɛn Raa taatn gɔtɔ kaam cili se, ɔkin̰ maaki ki, ɔn̰te 'raaŋin̰a.» 5Tɛr kɔɗn Raa kɛn jaay maam m'aakin̰o ɔɓo jɛn̰ kalaŋ do baar ki ɔɔ kɛn kalaŋ do naaŋ ki se, uun ji daamin̰ raan. 6Gɔtn se naan̰ naam taarin̰a ute ro debm kɛn tiŋg daayum daayum se, naan̰ ɓo debm kɛn aalo maakŋ raa ute nakgen maak ki paac, do naaŋ ute nakgen do ki paac ɔɔ baar ute nakgen maak ki paac. Naan̰ taaɗ ɔɔ: «Naan ki se, j'aɗen kɔn̰ gɔt ey sum. 7Taa do dɔkin̰ se, Raa taaɗɗega jee kaan̰ naabin̰ge tun taaɗ taar teeco taarin̰ ki kaaɗ kɛn naan̰ utu tɛɗn nakŋ kɛn naan̰ uuno do ro ki jaay jeege jeel mɛtin̰ ey se. Kɛn kɔɗn Raa k‑cilige jaay tuuyga pulin̰ num, Raa utu 'tɛɗn nakŋ se 'kaan ɗoobin̰ ki.» 8Tɛr mind nam kɛn maam m'booyin̰o taaɗum maakŋ raa ki se, taaɗum kuuy daala ɔɔ: «'Ɓaa gɔtn kɔɗn Raa kɛn ɔɓ jɛn̰ kalaŋ do baar ki ɔɔ kɛn kalaŋ do naaŋ ki se, ɔko kitapm kɛn k'paatin̰ga paatn kɛn naan̰ ɔkin̰ jin̰ ki se.» 9Gɔtn se, maam m'ɓaa m'ɔŋin̰a ɔɔ m'tɔnd mɛtin̰ m'ɔɔ ɛɗumo kitapm baatn kɛn jii ki se. Naan̰ ɗeekum ɔɔ: «Ɔk ɔsin̰ paac! Kɛn naai jaay utu ɔsin̰ kɔs se, ai nijim taari ki aan gɔɔ teeje, naɓo kɛn naan̰ bɔɔyga maaki ki se, ai kaacn̰ kaaɗi.» 10Kɛn maam m'ɔko kitapm baatn ji kɔɗn Raa ki jaay m'ɔsin̰ se, m'naamin̰ taarum ki se, nijim aan gɔɔ teeje. Num kɛn naan̰ jaay bɔɔy aan maakum ki sum se, m'naamin̰ aacum kaaɗuma. 11Tɛr k'taaɗum j'ɔɔ: «Jeegen te dɛnɗe, ute mɛtjilɗege, ute taar naaŋɗege ɔɔ ute gaarɗege se, 'ɓaa taaɗɗen taar teeco taar Raa ki se kuuy daala.»

will be added

X\