Apocalypse 1

1Kɛse ɓo mɛtn taar nakgen k'jeel mɛtin̰ ey jaay Raa taaɗ mɛtin̰ Isa al‑Masi ki ɔɔ Isa ɔl kɔɗ naan̰ se ɓaa taaɗ mɛtin̰ ɓulin̰ Jan ki, taa Jan ɓaa taaɗ mɛtin̰ jee tɛɗn naabm Raage tu nakgen kɛn utu 'kaan naan ki se. 2Jan se aako utu kaamin̰a ɔɔ taaɗ mɛtin̰ paac jeege tu ɔɔ kɛse Taar Raa mala ɔɔ kɛse ɓo nakgen mɛt kɛn k'jeel mɛtin̰ ey jaay Isa al‑Masi mala taaɗin̰o mɛtin̰ se. 3Maak‑raapo debm kɛn dooy taar se jeege tu ɔɔ maak‑raapo jeege tun booy taar kɛn teeco taar Raa ki kɛn k'raaŋin̰o ara ɔɔ took do ki. Taa nakgen se kaaɗin̰ ɔɔpga gɔɔrɔ utu 'kaana. 4Kɛse maam Jan ɓo m'raaŋsen kitapm se naase eglizge tun maakŋ gɛgɛrge tun kaam cili kɛn taa naaŋ Azi kɛn kaam kalaŋ. Ɔn̰ Raa kɛn do dɔkin̰a, ɓɔrse, ɔɔ kɛn utu ɓaaɗo ɔɔ ute nirl Raagen cilin naan kaag don̰ ki se asen tɛɗn bɛɛn̰a ɔɔ asen kɛɗn tɔɔsin̰a. 5Ɔn̰ Isa al‑Masi debm saaɗn mɛt ki ɔɔ naan̰ ɓo debm duro deet deet daan yoge tu ɔɔ naan̰ ɓo Gaar gɛn gaarin̰gen do naaŋ ki se, ɔn̰ asen tɛɗn bɛɛn̰a ɔɔ asen kɛɗn tɔɔsin̰ kici. Isa se, naan̰ ɓo debm jejeki, ɔɔ ute moosin̰ se, naan̰ ɔɔɗjekiga dojege maakŋ kusin̰ ki. 6Naan̰ ɔljekiga maakŋ gaarin̰ ki ɔɔ tɛɗjekiga k'tɛɗkiga jee tɛɗn sɛrkɛ gɛn Bubin̰ Raa. Bin num ɔn̰ jeege paac an̰ nooko ɔɔ ɔn̰ tɔɔgŋ naan̰ se lɛ 'tiŋg gɛn daayum daayum. Amin! 7'Booyki! Isa utu aɗe ɓaa maakŋ gapar ki, ɔɔ jee tɔɔsin̰o do kaag ki ute jeege paac, naaɗe utu an̰ kaakŋ ute kaamɗe. Ɓii kɛn se, jeegen do naaŋ ki paac utu 'tɔɔyɔ ɔɔ 'keem nɔɔ. Taar se utu 'tɛɗn ɗeer ɗeer. Amin! 8Mɛljege Raa ɗeek ɔɔ: «Maam m'Alpa ɔɔ m'Omega ɔɔ maam m'Sidburku, maam kɛn do kupm mɛt ki, kɛn ɓɔrse ɔɔ kɛn utu aɗe ɓaa.» 9Kɛn ara maam gɛnaase Jan kɛn utu ɔɔɗ yɛɛɓin̰ ute naase. Ɔɔ maam kic m'ɔŋga bɛɗum maakŋ Gaar Raa ki te naase. Taa Isa se, maam kic m'utu m'aay kaamum te naase. Kɛn ɔl jaay k'j'ɔk k'ɓaam gɔtn kɛn maane ɔl gurugin̰ kɛn k'daŋin̰ Patmos se, taa taar Raa ɔɔ taa saaɗn Isa kɛn maam m'lee m'taaɗ se. 10Ɓii kalaŋ Nirl Salal bɔɔy dom ki ɔɔ gɔtn se maam booy mind nam taaɗ mɛtum ki makɔn̰ɔ aan gɔɔ pulu ɔɔ ɓii kɛn se ɓii dumas. 11Mind nam ese se taaɗum ɔɔ: «Nakŋ naai aakin̰ se 'raaŋin̰ maakŋ kitap ki ɔɔ ɔlin̰ eglizge tun maakŋ gɛgɛrge tun kaam cili jee kɛn: Ɛpɛz ki, Smirn ki, Pɛrgam ki, Tiatir ki, Sarde ki, Piladelpi ki ute jee Laodise ki kici.» 12Kɛn maam jaay m'booy mind nam se, m'tɛrl m'aak mɛtum ki. Num kɛn maam jaay m'tɛrl se, m'aak lɔɔmpɔn daabge cili. 13Maam m'aak nam aan gɔɔ Goon Debkilimi ɗaar ɗaar daan lɔɔmpge tun cili se; kalin̰ ron̰ ki se jɛrlɛ bini aan naagŋ jɛn̰ ki. Ɔɔ naan̰ dɔɔk kaaɗin̰ ute kɔl kɛn k'ɗaapin̰ ute daab; 14ɔɔ bɛɛkŋ don̰ se raap lak lak aan gɔɔ kuubu ɔɔ kaamin̰ se lɛ aal bilik bilik aan gɔɔ pooɗo. 15Ɔɔ jɛn̰ge se aan gɔɔ maal kɛn j'ɔlin̰o pooɗn jaay aac dɛŋ se, ɔɔ mindin̰ lɛ aan gɔɔ keem ool kɛn ɗoocga num eem uu se. 16Ɔɔ maakŋ ji daamin̰ ki se, naan̰ ɔk k‑dijge cili. Ɔɔ gɔrɗ‑jɛrlɛ kɛn taarin̰gen di taat ranan ranan se, teeco taarin̰ ki ɔɔ daan‑kaamin̰ se aan gɔɔ kaaɗn kɛn aanga katar ki num ɔs tɔk kaama kiric se. 17Kɛn maam jaay m'aakin̰ se, maam m'ooc mɛtn jɛn̰ ki aan gɔɔ debm ooyga kooyo. Num gaŋ naan̰ ɔnd ji daamin̰ dom ki ɔɔ ɗeekum ɔɔ: «Ɔn̰te 'ɓeere! Maam ɓo debm kɛn deet deete ɔɔ kɛn kaam mɔɔtn. 18Maam ɓo debm m'iŋg zɛɛrɛ. Maam se m'ooyoga kooyo naɓo m'duroga daan yoge tu ɔɔ ɓɔrse m'utu m'iŋg zɛɛrɛ gɛn daayum daayum. Maam se m'ɔk tɔɔgɔ do yo ki ɔɔ do ɓee yoge tu kici. 19'Booyo! Nakgen kɛn naai aakin̰ga kaaka ɔɔ kɛngen utu aɗe ɓaa naan ki se, 'raaŋin̰ maakŋ kitap ki. 20K‑dijgen cilin kɛn maam m'ɔkin̰ ji daamum ki ute lɔɔmpɔn daabgen cili kɛn naai aakin̰o jaay 'jeel mɛtin̰ ey se, 'booyo: k‑dijgen cili se taaɗ te kɔɗn Raagen cilin gɛn eglizgen maakŋ gɛgɛrge tun kɛn kaam cili se. Ɔɔ lɔɔmpɔn gɛn daabgen cili se lɛ, je taaɗn ute eglizgen maakŋ gɛgɛrge tun kaam cili se kici.»

will be added

X\