Philémon 1

1Maktubm se maam Pɔl ɓo m'raaŋi maam kɛn j'ɔkum daŋgay ki taa Isa al‑Masi. Pilemon maam te gɛnaaje Timote se k'tɛɗi tɔɔsɛ. Naai kɛn mɛɗn doje ɔɔ debm tɛɗn naabm Isa al‑Masi gɔɔ naaje. 2Naaje k'tɛɗ tɔɔsɛ gɛnaaje kɛn mɛnda Apia ɔɔ k'tɛɗ tɔɔsɛ Arsip ki kɛn tɛɗ naaba ute naaje tɛlɛ aan gɔɔ asgar cɛɛje ki gɛn kuɗn bɔɔrɔ. Ɔɔ k'tɛɗ tɔɔsɛ egliz kɛn lee tus ɓei ki se kici. 3Ɔn̰ Bubjege Raa ɔɔ Mɛljege Isa al‑Masi asen tɛɗn bɛɛɗe ɔɔ asen kɛɗn lapia. 4M'tɔɔm Raa ɔɔ daayum kɛn maam jaay m'ɓaa keem Raa se m'saap do naai ki, 5taa maam booy jeegen lee ɔɔs maan gɛn kaal maaki kɛn naai aal do Mɛljege tu Isa al‑Masi ki ɔɔ ute maak‑jei kɛn naai ɔk do jee Raage tu paac se. 6Maam m'tɔnd mɛtn Raa ɔn̰ kaal maakŋ kɛn tumjeki kalaŋ se 'tɛɗn tɔɔgɔ, kɛse ɓo kɛn taaɗn jeege tu bɛɛ kɛn naaje j'ɔkki ute Isa al‑Masi. 7Gɛnaama, maak‑jei kɛn naai ɔk do jee Raage tu se raapumga maakuma ɔɔ ɛɗumga kaay kaama, taa maak‑jei do jee Raage tu se sɛlɗenga maakɗe dɛn aak eyo. 8Taa ɗi naai 'jeele ey num kɛn m'dɔɔk ute Isa al‑Masi se maam m'ɔk ɗoobm kɛn m'ai taaɗn naabm kɛn naai 'tɛɗa, naɓo maam m'je tɛɗn naan̰ se eyo. 9Taa naaje k'je naapa se ɓo kɛn maam m'je tɔnd mɛti se. Kɛse ɓo maam Pɔl kɛn gaab‑gɔɔl j'ɔkum daŋgay ki taa Isa al‑Masi, 10maam m'tɔnd mɛti gɛn Onezim kɛn maam tɛɗin̰ tɛɗga aan gɔɔ goonum mala maakŋ daŋgay ki ara. 11Do dɔkin̰ se naan̰ debm ɔŋ noogi te eyo, gaŋ ɓɔrse se naan̰ tɛɗga debm kɛn ajenki kɔŋ noogo maam m'utu naai se. 12Ɓɔrse maam tɛrl m'ɔli Onezim gɔti ki, naan̰ kɛn tɛɗga debm kɔɔn̰ maakuma. 13Ey num m'je m'an̰ gaasin̰ ute maam maakŋ daŋgay ki kɛn j'ɔkum taa Labar Jigan gɛn Isa al‑Masi. Bɛɛki num, naai ɓo am noogo gaŋ maam m'ɔkin̰ga naan̰ ɓo gɔɔ naai ki. 14Naɓo ɓɔrse maam m'je m'an̰ gaasin̰ ey se, taa maam m'tɔnd te mɛti ey ɓɔrtɔ. Taa maam m'je naabm naai am tɛɗ se ute taa tɔɔg eyo, num ute maak‑jei mala. 15Kaaɗn naane Onezim aan̰ ɔn̰io gɛn ɓii kandum se, taa naan̰ jaay ɔk tɛrl ɓaa ɔŋiga num ɓaa tiŋg te naai gɛn daayum. 16Ɔɔ ɓɔrse se naan̰ aan gɔɔ ɓul ey sum, gaŋ ɓɔrse naan̰ tɛɗga bɛɛ cir ɓulu taa naan̰ tɛɗga gɛnaa kɛn ɔɔn̰ maaka. Maam se m'jen̰a naɓo naai se an̰ je dɛn cir daala; taa naan̰ kic debkilimi ɔɔ tɛɗga gɛnaa ɗoobm Isa al‑Masi ki. 17Kɛn naai jaay aakum aan gɔɔ gɛnaai ɗoobm Isa al‑Masi ki num, Onezim se ɔkin̰ aan gɔɔ kɛn naai ɔkum maam mala. 18Kɛn naan̰ jaay tujiga ɗim lɔ ai kɔgŋ ɗim kic ɓo, ɔn̰ maam ɓo m'aisin̰ kɔgɔ. 19Taargen m'utu m'ai taaɗn ara se, maam mala ɓo m'raaŋisin̰ ute jima: maam m'aisin̰ kɔgɔ. Num gaŋ ɔn̰te tɛɗi dirigi taa Mɛljege se naai kic maam m'ɔk sɛɛ doi ki. Sɛɛ maam m'taaɗn se naai mala. 20Kɛn bin num gɛnaama, taa Mɛljege naaje k'tɛɗkiga kalaŋ se naabm se 'tɛɗumsin̰a, aan gɔɔ naaje te Isa al‑Masi k'tɛɗkiga kalaŋ se 'raapum maakuma. 21Nakŋ maam m'raaŋi se m'jeelin̰ maakum ki naai se an̰ kɔŋ tɛɗa. Ɔɔ m'jeele nakŋ maam m'tɔnd mɛti se naai an̰ kɔŋ tɛɗn cir naan̰ se. 22'Ɗaapum gɔtn m'an ɓaa tooɗo gɔti ki kici. Taa keem Raa kɛn naase 'lee eemki se, maam m'ɔnd dom do ki. Taa ɓii kalaŋ m'utu m'asen ɓaa kɔŋɔ. 23Epapras kɛn j'ɔkin̰ daŋgay ki ute maam taa Isa al‑Masi se 'tɛɗi tɔɔsɛ. 24Ɔɔ Mark, Aristark, Demas, Luk naaɗen kɛn tɛɗ naaba ute maam kalaŋ se kic tɛɗi tɔɔsɛ. 25Ɔn̰ Mɛljege Isa al‑Masi asen tɛɗn bɛɛn̰a.

will be added

X\