Philippiens 4

1Bin ɓo gɛnaa maak‑jemgen ɗoobm al‑Masi ki, maam se m'je m'asen m'ɓaa kaakŋ ute kaamuma. Taa naase se ɓo jee 'tɛɗumki jaay maakum‑raapo ɔɔ maam m'tɔɔm rom ute naase. Bin se gɛnaamge, ute Mɛljege se 'ɗaarki tɔɔgɔ! 2Maam dɛj Ebodi ute Syntis kɛn taarɗe ɓaa ey se, m'ɔɔ j'aay kaamɗe j'ɔk taarɗe kalaŋ taa naaɗe 'tɛɗga kalaŋ te Mɛljege se. 3Naai debum kɛn k'tɛɗn naaba kalaŋ ɔɔ debm mɛc se, maam m'tɔnd mɛti mɛndgen se 'ɓaa noogɗe. Taa naaɗe kic ɗoɗoga gɛn taaɗn Labar Jiga gɛn Isa al‑Masi ute maama ɔɔ ute Klema ɔɔ jeegen kuuy kɛn k'tɛɗo naaba kalaŋ. Jee se ɓo kɛn roɗe k'raaŋin̰ga raaŋ maakŋ Kitapm Kaaj ki. 4Aan gɔɔ 'tɛɗkiga kalaŋ ute Mɛljege se daayum iŋgki ute maak‑raapo! Taar se m'asesin̰ taaɗn ɗɔɔl daala, iŋgki ute maak‑raapo! 5Ɔn̰ki jeege paac asen jeele naase se jee bɛɛ. Taa Mɛljege se ɔɔpga gɔɔrɔ utu 'ɓaaɗo. 6Ɔn̰te 'kuunki nirlse do ɗim ki, gaŋ daayum nakŋ kɛn jaay aan dose ki se 'tɔndki mɛtn Raa taa nakgen naase 'jeki. Kɛn naase jaay 'ɓaaki ɓaa tɔnd mɛtn Raa num, 'tɔɔmin̰ki ute maakse. 7Ɔɔ tɔɔsn gɛn Raa kɛn cir maak‑saapm naajege se, ute Isa al‑Masi se asen bɔɔbɔ ɔɔ maakse 'tooɗn kaam kalaŋ. 8Gɛnaamge, kɛn ɔɔp m'asen taaɗ se ɔn̰ nakŋ kɛn mɛt ki, kɛn jeege jeelin̰ aak bɛɛ, kɛn te ɗoobin̰a, kɛn salal, kɛn jeege aak jen̰a, kɛn jeege dɔŋin̰a, kɛn ɔŋin̰ aak jiga ɔɔ kɛn jeege aakin̰ kic ɓo tɔɔmin̰ se, kɛse ɓo nakgen naase aki saapm do ki. 9Taar kɛn naase 'booykiro maam m'dooyseno ute nakgen naase aakkiro gɔtn maam ki, kɛn maam tɛɗɗeno se, naase kic 'lee 'tɛɗin̰ki bin kici. Ɔɔ Raa debm kɛn ɛɗ lapi se utu kiŋg te naase. 10Maam se maakum‑raapo aak eyo ɔɔ m'tɔɔm Mɛljege taa naase 'tɛrl saapkiga do maam ki daala. M'jeele naase se daayum 'saapki dom ki, naɓo naase ɔŋki te ɗoobm kɛn amki noog eyo. 11Kɛn ɔlum jaay m'taaɗ bin se taa m'ɔk ɗim ey ɓo m'taaɗ eyo, taa maam se lɛ m'deelga deel roma nakŋ maam m'ɔk se ɓo aas kiŋgum sum. 12Kɛn maakŋ daay ki lɔ maakŋ dɛrɛŋ ki kic ɓo, maam se m'deelga rom ro ki. Kɛn m'ɔk nakŋ kɔsɔ kɛn m'ɔk eyo, kɛn maakŋ dɛrɛŋ ki lɔ maakŋ ɓo ki, maam se kɛn aanum ɗi ɗi kic lɛ, daayum m'tookŋ do naan̰ kɛn ese. 13Maam se m'aasin̰ do nakge tun ɓaa se paac ute Debm kɛn lee tɔɔgum maakum se. 14Gaŋ naase se 'tɛɗkiga bɛɛ kɛn naase jaay 'ɓaaɗo 'noogumki do nakge tun ɔɔn̰ aan dom ki se. 15Gɛnaamgen Pilip ki, naase mala 'jeelki kaaɗ kɛn deet deet jaay m'taaɗseno Labar Jiga gɛn Isa al‑Masi se ɔɔ kɛn jaay m'iin̰ m'ɔn̰o Masedoan sum se, maakŋ eglizge tu se, eglizn naase kalin̰ ki sum ɓo 'ɓaamoga ute nakŋ noogo. Ey num eglizn kuuy se ɔŋ ɔlum te ne ɗim eyo. 16Kɛn maam jaay m'utu Tɛsalonik ki se, naan̰ kɛn se naase ɔl ɗɔɔlumkiroga ɗɔɔlɔ nakŋ kɛn am kaasn kiŋguma. 17Kɛn ɔlum jaay m'taaɗ bin se, m'je je ɗim ɓo gɔtse ki eyo. Nakŋ maam m'je se bɛɛ kɛn naase 'tɛɗkiro se 'ziiɗn ɓaa ute naanin̰a. 18Maam taaɗsen nakŋ naase jaay ɔlumkiro paac se, maam m'ɔŋin̰ga nakgen se aasum cir ciri. Aan gɔɔ Epaprodit ɛɗumsin̰ga nakŋ naase ɔlumkiro se, ɓɔrse maam m'ɔk nakge dɛna ute maraadin̰a nakgen se tec aan gɔɔ sɛrkŋ jiga ɔɔ oot nijimi kɛn j'ɛɗ Raa ki jaay tɔɔlin̰ se. 19Ute Isa al‑Masi se, Mɛlum Raa se nakŋ jaay naase ɔkki ey paac se naan̰ asesin̰ kɛɗa, taa naan̰ se ɗim tap ɓo daayin̰ eyo maakŋ gaarin̰ ki. 20Daayum Raa kɛn Bubjege se k'lee k'tɔɔmin̰ki. Amin. 21Jee Raagen naase 'tɛɗkiga kalaŋ ute Isa al‑Masi se, 'tɛɗɗeki tɔɔsɛ ɔɔ gɛnaagen ɗoobm al‑Masi ki kɛn utu te maam gɔtn ara se, tɛɗsen tɔɔsɛ kici. 22Jee Raagen gɔtn ara paac se tɛɗsen tɔɔsɛ ɔɔ kɛn tɛɗsen tɔɔsɛ tap tap se jee maakŋ ɓee Gaar magal Rɔm ki. 23Ɔn̰ Mɛljege Isa al‑Masi asen tɛɗn bɛɛn̰a.

will be added

X\