Philippiens 3

1Ɔɔ ɓɔrse se gɛnaamge, iŋgki te maak‑raapo taa naase 'tɛɗkiga gɛn Mɛljege! Taar kɛn maam m'taaɗsen se kɛn maam m'taaɗn m'ɗɔɔlin̰ kic ɓo aal ɔɔɗum eyo, taa taargen se asen kɔŋ bɔɔbɔ. 2Ɔndki kɔndɔ ute jeegen aan gɔɔ bɛsge se, jee tɛɗn nakŋ kusin̰a ɔɔ jeegen kɛn ɔɔ jeege kɔjn̰ pɔndɔ jaay 'tɛɗn jee Raage se. 3Jeegen ɔjga pɔndɔ mala mala se kɛse naajegen k'lee k'j'eemki Raa ute Nirlin̰a ɔɔ naajege se k'jeki ɗoobm tɔɔm rojege eyo, num gaŋ naajege se k'tɔɔmki rojege ute Isa al‑Masi. 4Gɛn daa ro sum num, maam kic m'ɔk nakge dɛna gɛn tɔɔm roma. Kɛn nam kuuy jaay ɔɔ ɔk nakŋ kɛn naan̰ an tɔɔm ron̰ se, maam se m'ɔk nakŋ cir kɛn naan̰ an tɔɔm ron̰ se. 5Gɛn kɔjn̰ pɔndɔ lɛ j'ɔjum se m'ɔk ɓii marta sum ɔɔ maam m'kɔɗ Israɛl mala mala ɔɔ teeco taa ɓee Benjamin ki. Maam se m'kɔɗ Ɛbre kɛn mala mala. Do Ko Taar kɛn Raa ɛɗo Musa ki se lɛ maam kɔɗ Parizi. 6Maam se m'dɔɔko maakum gɛn dabar egliz ɔɔ do Ko Taar kɛn Raa ɛɗo Musa ki se lɛ, nam jaay 'kɔŋ nakŋ aak kus rom ki se, gɔtɔ. 7Nakgen do dɔkin̰ maam m'ɔŋin̰ m'ɔɔ bɛɛ se, ɓɔrse taa Isa al‑Masi se nakgen se paac ɔs aay eyo. 8Gaŋ nakgen se paac maam m'aakin̰ se ɔs aay eyo, ɗeere jeel kɛn maam m'jeel Mɛlum al‑Masi se ɓo ɔs aay cir paac paac. Gɔtn al‑Masi ki se nakgen maam m'aakin̰o m'ɔɔ bɛɛ se ɓɔrse ɔs aay ey sum. Taa nakgen se maam m'aakin̰o aan gɔɔ nakgen do danos ki, taa m'tɛɗn gɛn al‑Masi mala mala. 9Taa naan̰ se maam m'iŋg do Ko Taar kɛn Raa ɛɗo Musa ki se ɓo tɛɗum m'aak bɛɛ naan Raa ki eyo, gaŋ kaal maakŋ kɛn maam m'aal do al‑Masi ki se ɓo tɛɗum m'aakga bɛɛ naan Raa ki. Ute kaal maakŋ ese ɓo Raa tɛɗ jeege aak bɛɛ naanin̰ ki. 10Maam se m'je naka kalaŋ sum nakŋ maam m'je se m'jeel kɔkŋ Isa al‑Masi mala ɔɔ tɔɔgŋ kɛn durin̰ daan yoge tu ɔɔ m'dabar ute naan̰a, bini m'kooy aan gɔɔ kɛn naan̰ ooy se kici. 11Taa naan̰ se ɓo maam m'iŋg m'ɔnd dom ro ki taa ɓii kalaŋ maam m'utu m'dur daan yoge tu. 12Maam m'kɔŋ taaɗn m'ɔɔ gɔtn maam m'ɓaan m'ɓaa se m'aan te ey ɓɔrtɔ, ey lɛ m'kɔŋ taaɗn m'ɔɔ maam se m'tɛɗ te aak bɛɛ naan Raa ki ey ɓɔrtɔ. Gaŋ ɓɔrse kic maam m'utu m'aan̰ kaan̰ rɔk, gɛn kaan gɔtn Isa al‑Masi ki naan̰ kɛn tɛɗum m'tɛɗga gɛn naan̰ se. 13Gɔtɔ, gɛnaamge, maam m'aan̰ m'aan te gɔtn ese ey ɓɔrtɔ kɛn maakŋ maak‑saapum ki se gɔtn m'aan̰o paac se m'dirigin̰ga naata, kɛn m'uun kaamum jaay m'aak kɛn naan ki se. 14Maam m'aay kaamum m'aan̰ gɛn kaan gɔtn kaan ki, Raa daŋjeki raan se, bin ɓo naajege j'aki kɔŋ nakgen se te Isa al‑Masi. 15Naajegen paacn̰ kɛn k'tɛɗkiga jee Raage mala mala se, bɛɛki se, maak‑saapm naajege se 'tɛɗn aan gɔɔ kɛn ese. Kɛn maak‑saapse ɓo utu kuuy lɛ, Raa utu asen taaɗn maakse ki aki jeel mɛtin̰a. 16Naɓo ɓɔrse se k'ɓaaki te ɗoobjegen kɛn j'uunkiro tɛl se ute naanjege. 17Gɛnaamge, 'paacki, 'tɛɗki aan gɔɔ maama, uunki ɗoobm jee kɛn uun ɗoobm naaje se. 18Ey num daayum maam taaɗsenoga ɔɔ ɓɔrse kic maakŋ kaa‑maan ki se m'je m'asen taaɗn daala, taa jeege dɛna maakŋ nakɗe kɛn naaɗe lee tɛɗ se, naaɗe je taaɗn jeege tu ɔɔ naaɗe se je eyo kɛn k'taaɗ taa kooy Isa al‑Masi ro kaag ki se. 19Naaɗe se utu kutn roɗe, nakŋ naaɗe maakɗe je se ɓo tɛɗɗenga raaɗe ɔɔ nakŋ sɔkɔn̰gen naaɗe lee tɛɗ se maakɗe raap do ki sakan̰. Naaɗe iŋg gɛn saapm do nakge tun do duni ki sum. 20Gaŋ naajege se naaŋjege mala se maakŋ raa ki ɔɔ ɓɔrse do naaŋ ki ara se naajege j'iŋg j'aakki kaam Mɛl Kaajjege Isa al‑Masi. 21Naan̰ ɓo, ro naajege ɔk tɔɔg ey se naan̰ an̰ deelin̰ utu 'tecn̰ aan gɔɔ ro naan̰ aak bɛɛ kɛn durno daan yoge tu se, ute tɔɔgin̰ se naan̰ utu 'tɛɗn nakge paac 'tɛɗn kaam jin̰a.

will be added

X\