Philippiens 2

1Kiŋgsen 'dɔɔkki ute al‑Masi se, ɛɗsen kaay kaama ɗey la? Ɔɔ maakjen̰ dose ki se sɛlsen maakse ɗey la? Naase ute Nirl Salal se 'tum 'tɛɗkiga kalaŋ ɗey la? Naase tap ɓo iŋgki se 'jeki naapa ɔɔ 'tɛɗki bɛɛ ute naapa ɗey la? 2Kɛn bin num naase iŋg dɔɔkki taarse kalaŋ ɔɔ 'tɛɗumki maakum‑raap te maraadin̰a. 'Jeki naapa, iŋgki ute maakŋ kalaŋ ɔɔ ɔn̰ki maak‑saapse kic ɓo 'tɛɗn kalaŋ. 3Ɔn̰te 'niki ute naapa ɔɔ ɔn̰te 'magalki rosege taa jeege asen kaaka, num gaŋ ɔɔpki rosege baata ɔɔ aakki jee kuuy se aan gɔɔ naaɗe se magal cirse naase. 4Naŋa naŋa kic ɓo ɔn̰te kaakŋ do nakŋ naan̰ ki sum, num gaŋ n̰'kaakŋ do nakŋ jeege tun kuuy kici. 5Naase utu naapa se ɔn̰ki maak‑saap se tecn̰ aan gɔɔ gɛn Isa al‑Masi: 6Naan̰ kɛn Raa mala mala se, ute naan̰ se kic ɓo naan̰ tɔnd te mɛt eyo ɔɔ tɛɗ te ron̰ gɛn kaasn te Raa eyo. 7Gaŋ naan̰ ɔɔp ron̰ baata ɔɔ ɓaaɗo tɛɗ ron̰ aan gɔɔ debm tɛɗn naaba ɔɔ ɓaaɗo tɛɗ ron̰ debkilimi ɔɔ taaɗ jeege tu ɔɔ naan̰ se goon debkilim mala mala. 8Naan̰ ɔɔp ron̰ baata ɔɔ took taara bini ɔɔ ɔn̰ ron̰ k'tɔɔlin̰a, naan̰ se k'tup k'tɔɔlin̰ ro kaag ki. 9Taa naan̰ se ɓo Raa se durin̰oga daan yoge tu ɔɔ uun ɔndin̰ga raan do jeege tu paac ɔɔ ɛɗin̰ga ro kɛn cir ro jeege paac. 10Raa tɛɗin̰ bin se taa jeegen maakŋ raa ki, jeegen do naaŋ ki ɔɔ jeegen ooyga kooy se kic, paac, utu 'kɛrgŋ naan Isa ki. 11Ɔn̰ jeege paac ute taar naaŋɗege se nookŋ Raa Bubu ɔɔ ɗeekŋ ɔɔ: Isa al‑Masi se Mɛlɗe. 12Bin se, jee maak‑jemge, aan gɔɔ daayum naase lee 'tookki taar Raa se, aayki kaamse 'tɛɗki nakgen taaɗn jeege tu ɔɔ naase se ɔŋkiga kaaja, 'tɛɗki rosege baata ɔɔ 'ɓeerki Raa ki. Ɔn̰te 'tɛɗin̰ki kɛn maam m'utu sum, num kɛn maam gɔtɔ kic ɓo lee 'tɛɗ 'ɓaan̰ki ute naanin̰a. 13Taa Raa mala, naan̰ ɓo kɛn lee tɛɗ naabin̰a maakse ki, naan̰ ɛɗsen maak‑jea kɛn tɛɗsen naase aaskiga gɛn tɛɗn nakŋ kɛn naan̰ uuno doa do dɔkin̰a gɔɔ kɛn naan̰ maakin̰ jen ro ki. 14Nakŋ naase aki tɛɗn paac se ɔn̰te 'naajki ute naapa ɔɔ ɔn̰te 'mooyki naaŋ ki. 15Taa bin se ɓo naase aki tɛɗn jee ɔk taar ɗim roɗe ki eyo, jee salal, ɔɔ aki tɛɗn gaan Raagen ɔk tuju roɗe ki eyo daan jeege tun ɓɔrse baate Raa. Naaɗe se jee tɔɔj eyo ɔɔ tɛɗn nakŋ mɛt ki eyo. Daan naaɗe ki se ɓo, naase aki kiŋg wɔɔr gɔtɔ aan gɔɔ pooɗn kɛn lee ɓaa wɔɔr maakŋ gɔt kɛn ɔɔɗ se. 16Naase ɓo kɛn lee 'taaɗɗeki taar kɛn ɛɗ kaaja se: kɛn naase jaay lee 'tɛɗki naan̰ se num, ɓii kɛn al‑Masi aɗe tɛrl se am tɛɗn jiga aak eyo, bin se ɓo taa nakŋ maam m'tiŋg m'lee m'dabar m'tɛɗ se 'tɛɗn nakŋ cɛr eyo. 17Kɛn maam ɓo m'kɔn̰ rom sɛrkɛ taa m'tɛɗn kaasn sɛrkŋ kɛn naase lee 'tɛɗki Raa ki se, maam maakum‑raapo. Sɛrkŋ ese se ɓo m'je taaɗn te kaal maaksen do Isa al‑Masi ki jaay ɔlse naase 'tɛɗin̰ki naaba se. Taa naan̰ se ɓo maam maakum‑raapo ute naase paac. 18Ɔɔ naase kic 'tɛɗki maak‑raapo do naapse kɛn naase 'tɛɗki ɔɔ 'tɛɗki maak‑raapo ute maam kici! 19Tɛɗga num ute Mɛljege Isa se, maam m'saapm m'utu m'asen kɔl Timote gɔtse ki taa amo ɓaa te labarse ɔɔ kɛn jaay m'ɔŋga labarse se, am kɛɗn kaay kaama. 20Naan̰ ey se maam m'ɔk nam kuuy eyo kɛn 'kiŋg te maam jaay 'saapm taa naase ɔɔ saapm do nakge tun an dose ki se. 21Taa jeegen kuuy paac se saap do naabm naaɗe ki kalɗe ki salal ɔɔ naaɗe se ɔlɗen te naabm gɛn Isa al‑Masi eyo. 22Num nakŋ Timote tɛɗ se, naase kic 'jeelin̰ki. Naan̰ se debm mɛc ɔɔ tuj ɔrmin̰ eyo ɔɔ naan̰ se tɛɗ naaba ute maama aan gɔɔ goon kɛn lee noog bubin̰a gɛn taaɗn Labar Jiga gɛn Isa al‑Masi jeege tu. 23Kɛn maam m'aak m'ɔkga nakgen utu kaan dom ki se jaay ɓo, kaaɗ kɛn se maam m'saapm m'ɔɔ m'utu m'asesin̰ kɔlɔ. 24Maam m'jeele ute Mɛljege Isa se tɛɗga sum ɓo, naan̰ utu am kɔn̰um maam kic m'utu m'asen ɓaa kaaka. 25Kɛn bɛɛki se, maam je m'asen kɔl Epaprodit. Naan̰ se gɛnaajege ɔɔ tɛɗn naaba ute maam tɛlɛ ɔɔ naan̰ se aan gɔɔ asgar cɛɛm ki gɛn kuɗn bɔɔrɔ. Naase ɔlin̰kiro gɔtum ki se naan̰ ɓaamo ute nakŋ kɛn am noogo kɛn am kaasn kiŋguma. 26Taa maakin̰ ki se naan̰ je asen ɓaa kaakŋ naase paac ute kaamin̰a. Ey num naan̰ se maakin̰a ɗaar eyo kɛn naan̰ jaay booy ɔɔ naase 'booykiga kaaɗ kɛn naan̰ oocno kɔɔn̰ɔ se. 27Ey num kɛn naan̰ ooco kɔɔn̰ɔ se ɔɔpɔ cɔkɔ sum ɓo 'kooyo, gaŋ Raa se tɛɗin̰ga bɛɛn̰a ɔɔ ɛɗin̰ga lapia. Raa se tɛɗ bɛɛn̰ naan̰ ki sum eyo, num gaŋ tɛɗumga maam ki kici taa m'kiŋg ɓo maakŋ maak‑tuj ki kalin̰ ki sum eyo. 28Maam naar m'je m'asesin̰ kɔlɔ taa kɛn naan̰ jaay aan ɔŋsega ɔɔ naase jaay aakin̰kiga te kaamse se, bin se asen kɛɗn maak‑raapo ɔɔ maam kic ɓo maakum 'tooɗn kaam kalaŋ. 29Kɛn naan̰ jaay aan ɔŋsega se dɔɔɗ ɔkin̰ki ute maak‑raapo taa naan̰ se gɛnaajege ɗoobm Mɛljege tu. Jee aan gɔɔ naan̰ se ɔkɗeki ɔɔn̰ɔ. 30Taa naabm Isa al‑Masi se, ɔɔpga cɔkɔ sum ɓo naan̰ aɗe kooyo. Ey num naan̰ aɗe 'kutn kon̰a ɔɔ naan̰ ɓaaɗo se taa am tɛɗn naaba gɔɔ naase ki.

will be added

X\