Philippiens 1

1Maktubm se maam Pɔl ɓo m'raaŋsesin̰a, maam m'ute Timote, naaje se jee tɛɗn naabm Isa al‑Masige, k'raaŋsen naase jee Raage tu kɛn iŋg dɔɔk ute Isa al‑Masi, magalsegen naanse ki ute jeegen lee tɛɗn naaba daanse ki kɛn maakŋ gɛgɛr kɛn Pilip ki. 2Ɔn̰ Bubjege Raa ute Mɛljege Isa al‑Masi asen tɛɗn bɛɛɗe ɔɔ asen kɛɗn lapia. 3Daayum kɛn maam jaay m'saap do naase ki se maam m'tɔɔm Raama. 4Daayum kɛn maam m'ɓaa m'tɔnd mɛtn Raa taa naase paac se, maam m'eemin̰ ute maak‑raapo, 5taa naase 'lee 'noogumki noog gɛn taaɗn Labar Jiga gɛn Isa al‑Masi se jeege tu ɔɔ naase 'tɛɛskiro kaaɗ kɛn naase utu 'took aalkiro kaal maakse do Isa al‑Masi ki, bini ɓɔrse kic utu lee 'tɛɗin̰ki tɛɗ rɔk. 6Ɗeere, maam m'jeel maakum ki Raa kɛn tɛɗ naabin̰ jiga daanse ki se, bini ɓii kɛn Isa al‑Masi ano ɓaa ro ki se, naan̰ utu an̰ tɛɗn kaasn tak. 7Kɛse ɓo nakŋ kɛn ɔlum maam m'saap dose ki taa naase se jee kɔɔn̰ maakumge ɔɔ naabjege se tɛɗga kalaŋ ɔɔ naabm se ɓo kɛn Raa ɛɗumo gɛn taaɗn Labarin̰ Jiga se jeege tu. Kɛn maam maakŋ daŋgay ki, lɔ naan jeege tun baate taar Raa se m'taaɗɗen Labar Jigan gɛn Isa al‑Masi ɔɔ kɛn m'ɓaa taaɗa se m'ɓeer eyo ɔɔ m'taaɗɗesin̰ ute tɔɔgum paac. 8Ɗeere, Raa se jeele naase paacki se, maam m'jese dɛn bɛɛ eyo ute maak‑je gɛn Isa al‑Masi se. 9Kɛse ɓo kɛn maam m'ɓaa keem Raa taa naase num, m'lee m'tɔnd mɛta m'ɔɔ Raa asen kɛɗn maak‑jea ɔɔ daayum naase aki kɔkŋ naapa ɔɔn̰ɔ. Ute naan̰ se jaay naɓo, naase aki jeel kɔkŋ Raa se jiga ɔɔ aki jeel kiŋg jiga naan Raa ki, 10taa naan̰ se jaay naase aki 'jeel bɛɛr kaakŋ kɔkŋ nakŋ kɛn jiga. Bin se naase aki tɛɗn jee salal ɔɔ jee ɔk taar ɗim roɗe ki eyo ɓii kɛn al‑Masi ano ɓaa ro ki se. 11Ute Isa al‑Masi se daayum naase aki lee tɛɗn nakgen ute ɗoobin̰a. Kɛn nakgen naase aki tɛɗn se jaay jeege aakga se, naaɗe 'tɔɔm Raa ɔɔ an̰ magala. 12Ɓɔrse gɛnaamge, maam m'je naase aki jeele nakgen jaay paacn̰ aan dom ki gɔtn ara se, ɔl jeege booyga Labar Jigan gɛn Isa al‑Masi se ɔɔ taar se wɔɔk ɓaaga ute naanin̰a. 13Taa asgargen lee bɔɔb ɓee magal Rɔmɛge ute jee kɛn iŋg gɔtn ese se ɔɔ ute jeegen iŋg gɔt kuuy paac se, ɓɔrse naaɗe jeele maam se j'ɔkum daŋgay ki se taa al‑Masi. 14Ɔɔ kɔkŋ maam j'ɔkum daŋgay ki se ɔl gɛnaage dɛna dɔɔkga maakɗe do Mɛljege tu ɔɔ naaɗe ɓeer eyo aay kaamɗe ɓaa te naanɗe gɛn taaɗn taar Raa jeege tu. 15Gaŋ maakɗe ki se jee mɛtin̰ge se lee taaɗ taar gɛn Isa al‑Masi jeege tu se, naaɗe aak naabum maam m'tɛɗ se ɓo, naaɗe nini rom ki, ɔɔ je jeege se aɗe ɓaa mɛtn naaɗe ki. Num gaŋ kɛngen mɛtin̰ge se taaɗin̰ te maak‑saapm jiga. 16Naaɗe se taaɗ Labar Jiga gɛn Isa al‑Masi se taa naaɗe jema. Taa naaɗe jeele maam j'ɔkum daŋgay ki se taa Labar Jiga gɛn Isa al‑Masi kɛn maam m'lee taaɗ jeege tu se taar mɛt ki. 17Gaŋ je kɛn nini rom ki se, taaɗ taar gɛn al‑Masi jeege tu kic ɓo taaɗin̰ ute taar nia. Maak‑saapm naaɗe se maak‑saapm jig eyo. Kɛn naaɗe jaay tɛɗn bin se saap ɔɔ daan am ziiɗn dubar maam maakŋ daŋgay ki do ki. 18Gaŋ nakŋ naaɗe tɛɗ paac se ɔlum ɗim eyo! Kɛn naaɗe taaɗ taar gɛn Isa al‑Masi se kɛn nini ɓo rom ki lɔ taaɗin̰ ute maak‑saapm jiga, kɛn bɛɛ cir paac se, taar gɛn al‑Masi se k'taaɗin̰ga jeege tu. Taa naan̰ se maam maakum‑raapo ɔɔ daayum ɓɔrse kic maakum utu raap‑raap rɔk. 19Do taar tɔɔlin̰ ki se ute 'tɔnd mɛtn Raa kɛn naase 'tɔndki taa maama ɔɔ ute Nirl gɛn Isa al‑Masi kɛn lee noogum se, maam m'jeele maam m'utu m'kɔŋ kaaja. 20Taa naan̰ se ɓo maam m'iŋg m'aak kaama ɔɔ m'ɔnd dom ro ki, ɔɔ m'jeele m'kɔŋ kɛnd maakŋ sɔkɔn̰ ki eyo. Num gaŋ maam se kɛn ɓɔrse lɔ naan ki kic ɓo m'ɓeer ɗim ki eyo ɔɔ m'je jeege se kɛn maam ɓo m'utu zɛɛrɛ lɔ maam m'aki kooyo, do nakge tun 'deel do maam ki paac se, daayum naaɗe 'kaakŋ nookŋ al‑Masi. 21Taa maam se kɛn m'utu zɛɛrɛ lɛ m'iŋg gɛn al‑Masi. Kɛn m'ooyga lɛ kɛse ɓo m'ɓaa kɔŋ bɛɛn̰ cir paac. 22Kɛn maam jaay m'utu m'iŋg zɛɛrɛ gɛn tɛɗn naabm jiga se, kɛn maam m'aki kooyo, lɔ m'aki kiŋg lɛ, gɔtn se maam m'jeel bɛɛr kuun kaam kalaŋ eyo. 23Gɔtn se maak‑saapum ɓaa tɛɗga kaam dio: gɛn maam ki se m'je m'ɓaa kiŋg te al‑Masi. Kɛse ɓo nakŋ kɛn maam m'aakin̰ am tɛɗn jiga dɛn cir paac paac. 24Naɓo taa m'asen noogŋ naase se, kɛn bɛɛn̰ki se, maam m'kɔɔpm m'kiŋg ute naase se ɓo, jiga cir daala. 25Taa naan̰ se ɓo maam m'jeele maakum ki, maam se ɓɔrse kic m'utu m'kiŋg te naase paac. Taa m'asen noogo naase aki kɔkŋ taar Raa se tɔɔgɔ ɔɔ anki ɓaa ute naan se ute maak‑raapo. 26Taa naan̰ se ɓo ɓii kɛn jaay maam m'utu m'asen tɛrl ɓaa kɔŋ se, aan gɔɔ naase ute Isa al‑Masi kalaŋ ki se maakse raapm dɛn aak eyo taa maama. 27Kɛn bɛɛki se, iŋgki aan gɔɔ kɛn Labar Jiga gɛn al‑Masi k'dɛjseno ro ki. Taa naan̰ se ɓo kɛn m'asen ɓaa kaaka lɔ kɛn m'kɔŋ ɓaa eyo kic ɓo, maam m'booy labarse j'ɔɔ naase se utu iŋgki tɔɔgɔ ɔɔ 'dɔɔkki taarse kic kalaŋ ɔɔ aayki kaamse iŋgki ute maakŋ kalaŋ ɔɔ aalki maakse do Labar Jiga gɛn Isa al‑Masi kɛn k'lee k'dooy jeege se. 28Paac paac ɓo ɔn̰te 'ɓeerki jeege tun kɛn iŋg lee dabarse se. Kɛse se je taaɗn ɔɔ naaɗe se utu kutu ɔɔ naase lɛ utu aki kaaja, kɛse Raa mala ɓo tɛɗin̰a. 29Maam m'taaɗsen naan̰ ese se taa Raa se naan̰ tɛɗsenga bɛɛn̰a taa naase aki kaal maakse ɓo do al‑Masi ki sum eyo num aki dabar taa naan̰ kici. 30Ɗo kɛn naase lee 'ɗoki se kɛse ɓo kɛn naase aakumkiro maam ɗoɗo ɔɔ ɓɔrse kic 'jeelki maam m'utu m'ɗo ɗo rɔk.

will be added

X\