Matthieu 8

1Kɛn Isa bɔɔyo do kɔs ki se dɔɔl jeege dɛna ɔk mɛtin̰a. 2Gɔtn se gaaba kalaŋ ɔk kɔɔn̰ bikiɗi ɓaaɗo cɛɛ Isa ki, ɛrg naanin̰ ki tɔnd mɛtin̰ ɔɔ: «Mɛlje, kɛn naai 'je num, ɛɗum lapia taa rom se ɗaapm 'tooɗn kɔlɔn̰ kɔlɔn̰.» 3Isa ɔl jin̰ utin̰a ɔɔ ɗeekin̰ ɔɔ: «Yɛɛ, maam m'jea, ɔn̰ roi 'ɗaapm 'tooɗn kɔlɔn̰ kɔlɔn̰!» Gɔtn se sum ɓo, debm kɔɔn̰ bikiɗn se ɔŋ lapia ɔɔ ron̰ ɗaap tooɗ kɔlɔn̰ kɔlɔn̰. 4Tɛr Isa ɗeekin̰ ɔɔ: «Iin̰ 'ɓaao, naɓo ɔn̰te ɓaa taaɗn nam ki; num 'ɓaa 'taaɗ roi debm tɛɗn sɛrkɛ Raa ki se ɔɔ 'ɓaa ɛɗ sɛrkɛ Raa ki aan gɔɔ kɛn Musa taaɗin̰o maakŋ Kitap ki. Bin ɓo jeege paac 'jeele, naai se ɔŋga lapia.» 5Kɛn Isa jaay ɛnd kɛnd maakŋ gɛgɛr kɛn Kaparnayum ki se ɔɔ gɔtn se bubm asgarge kalaŋ ɓaaɗo ɔŋin̰a ɔɔ eemin̰ nɔɔ ɔɔ: 6«Mɛlje, maam se m'ɔk debm tɛɗn naabum kalaŋ se kɔɔn̰ɔ dɛna tooɗ tooɗ ɓeene. Kɔɔn̰in̰ se tɛrɛcin̰ k'ruŋguyu ɔɔ dabarin̰ dɛn aak eyo.» 7Gɔtn se Isa tɛrlin̰ ɔɔ: «Maam m'ɓaa ɓei ki ɔɔ m'an̰ ɓaa kɛɗn lapia.» 8Gɔtn se bubm asgar Rɔmɛge se ɗeekin̰ ɔɔ: «Mɛlje, ɓɛrɛ, maam se m'aas te debm naai 'ɓaa ɓeem ki eyo. Num gɔtn ɗaari ki se, naai 'taaɗ ute taari sum ɓo, debm tɛɗn naabum se 'kɔŋ lapia. 9Taa maam se, kic m'kaam ji deb kuuy, naɓo m'ɔk asgarge kaam ji maam kici. Ɔɔ kɛn maakɗe ki se jaay m'ɗeek deb kalaŋ ki m'ɔɔ: ‹'Ɓaa se› naan̰ iin̰ 'ɓaa. Ɔɔ m'ɗeek deb kuuy ki m'ɔɔ: ‹'Ɓaaɗo se› naan̰ iin̰ ɓaaɗo. Ɔɔ ɓulum ki se jaay, m'ɗeekin̰ m'ɔɔ: ‹'Tɛɗ nakŋ ese se› naan̰ iin̰ tɛɗin̰a.» 10Kɛn Isa jaay booy taar gaabm ese se, taara se ɔkin̰ taaɗ eyo. Naan̰ ɗeek jeege tun daanin̰ se ɔɔ: «Naase 'booyki bɛɛ m'asen taaɗa: maakŋ gaan Israɛlge tun ute dɛnɗe se kic ɓo, maam m'ɔŋ te nam jaay aal maakin̰ do Raa ki aan gɔɔ gaabm ara se eyo. 11Anum m'ɗeeksen m'ɔɔ: jeege dɛna utu aɗe kiin̰ ɓaa gɔtn kaam kaaɗa tookŋo, ɔɔ kaam kaaɗa toocn̰ ni, naaɗe aɗe ɓaa utu tusn 'kiŋg kɔsn ɓii laa ki ute maak‑raapo ute ɓugjege Abraam, Isaka ɔɔ Yakub maakŋ Gaar Raa ki tɛlɛ. 12Num gaangen gɛn maakŋ Gaar Raa tap ɓo, naaɗe se ɓo j'utu j'aɗen kɔɔɗɔ ɔɔ j'utu j'aɗen kɔmb naatn maakŋ gɔt kɛn ɔɔɗ dɔrɔɗ. Gɔtn se ɓo naaɗe ɓaa keeme ɔɔ taan̰ naaŋɗege.» 13Tɛr Isa ɗeek bubm asgar Rɔmɛge tu se ɔɔ: «Ɔk 'tɛrl 'ɓaa ɓei ki. Ute kaal maaki naai aal dom ki paac se, nakŋ naai 'tɔnd mɛta ro ki se 'kɔŋ tɛɗa.» Ɔɔ kaaɗ kɛn se sum ɓo, debm tɛɗn naabin̰ se ɔŋ lapia. 14Tɛr Isa iin̰ ɓaa ɓee Piɛr ki. Kɛn naan̰ jaay aan sum se, ɔŋ moom Piɛr mɛnda se kɔɔn̰ɔ tooɗ tooɗ daŋal ki ɔɔ naan̰ ron̰ ɔŋ kɛɗɛk. 15Gɔtn se naan̰ ɔl jin̰ utin̰a ɔɔ ron̰ ɔŋg kɛɗɛk se tɛrɛc urlu ɔɔ gɔtn se naan̰ iin̰ ɗaara ɔɔ baag tɛɗn kɔsɔ Isa ki. 16Kɛn kaaɗa ooc jaay gɔtɔ tɛɗ ilim se, jeege ɓaano ute jee kɔɔn̰ sitange se dɛna gɔtn Isa ki. Ute taarin̰ se sum ɓo, naan̰ tuur sitange naatn ro jeege tu ɔɔ jee kɔɔn̰ge se paac naan̰ ɛɗɗen lapia kici. 17Nakŋ Isa tɛɗ se aanga ɗoobin̰ ki aan gɔɔ taar kɛn debm taaɗ taar teeco taar Raa ki ron̰ Ezayi taaɗno do dɔkin̰ kɛn ɔɔ: Kɔɔn̰jegen tujjeki rojege se, naan̰ uunin̰ga paac don̰ ki. 18Kɛn Isa jaay aak jee dɛnge ɔl gurugin̰ se, gɔtn se naan̰ ɗeek jeege tun mɛtin̰ ki ɔɔ k'gaaŋ k'ɓaaki jɛŋ baar kɛn kaam naane. 19Gaŋ maakŋ jee jeel taaɗn tɔɔkŋ mɛtn Ko Taar Raage se, deb kalaŋ iiko cɛɛn̰ ki ɗeekin̰ ɔɔ: «Debm dooy jeege, gɔtn naai 'ɓaa gay gay kic ɓo, maam m'ai daana.» 20Isa tɛrlin̰ ɔɔ: «'Booyo! K‑bukumbɔɔge kic ɓo ɔk ɓee tooɗɗege, ɔɔ yeelge kic lɛ ɔk kujɗege. Num gaŋ maam Goon Deba se m'ɔk gɔtn maam m'an kɔl dom eyo.» 21Maakŋ jeege tun mɛtin̰ ki se, deb kalaŋ kuuy se ɗeekin̰ ɔɔ: «Mɛlje, ɔn̰um m'aɗe ɓaa duubm bubum jaayo.» 22Gaŋ Isa tɛrlin̰ ɔɔ: «Ɔn̰ jeegen aan gɔɔ ooyga kooy naan Raa ki se 'duubm naapa, num naai se, 'ɓaaɗo 'daanuma.» 23Gɔtn se Isa ook maakŋ markab ki ɔɔ jee mɛtin̰ ki ɓaa ute naan̰a. 24Gɔtn se sum ɓo kuulu dɔɔbɔ ɔɔ ɔl makɔn̰ɔ do baar ki. Kuulu se tɛɗ maane aal walak walak ɔɔ iin̰ ɓaa ɓaa ɗoocn̰ markaba. Num naan̰ kɛn se, Isa tooɗ tooɗ bia. 25Jee mɛtin̰ ki iiko cɛɛn̰ ki tɔnd durin̰a ɔɔ ɗeekin̰ ɔɔ: «Mɛlje, naakje! Ey num ɓɛrɛ, naajege j'aki kutu.» 26Isa ɗeekɗen ɔɔ: «Gɛn ɗi jaay naase 'ɓeerki bin se? Naase se aalki te maakse paac do Raa ki eyo.» Gɔtn se naan̰ iin̰ ɗaara, aac kaama kuul ki ute maane ki ɔɔ naan̰ kɛn se, gɔtɔ ɓaa tooɗ dil. 27Kɛn naaɗe jaay aak nakŋ ese se, paac ɔkɗen taaɗ eyo ɔɔ ɗeek ɔɔ: «Aakki tu nakage! Kɛse tap ɓo naŋa bini kɛn taaɗ kuulu ute maane ki kic ɓo tookin̰ taarin̰ se?» 28Kɛn Isa jaay aan jɛŋ baar kɛn kaam naane, taa naaŋ jee Gadarge tu se, gɔtn se gaabge dio ɔk kɔɔn̰ sitange teeco maakŋ iiɓge tun Yaudge tɛɗin̰o gɛn tɔl taal yoɗege se, ɓaaɗo dɔɔɗin̰a. Gaabgen di se naaɗe kusin̰a ɔɔ gɔtn naaɗe iŋg se nam ɔŋ aal te ɗoobm se eyo. 29Kɛn naaɗe jaay aakin̰ se, gɔtn se naaɗe baag tɔɔɗn tɔɔyɔ ɔɔ: «Goon Raa, naai 'je ɗi roje ki? Kɛn kaaɗn Raa ɔndin̰ se aas te ey ɓɔrt sum ɓo, naai 'ɓaaɗo 'je ajen dabar la?» 30Naanɗe ki dɔk cɔkɔ se ɔk dɔɔl kin̰zirge dɛna k'gaamɗe gaama. 31Sitange se eem nɔɔ mɛtn Isa ki, ɗeekin̰ ɔɔ: «Kɛn ajen tuur num, ɔlje naaje k'ɓaa kɛnd maakŋ dɔɔl kin̰zirge tu se.» 32Isa ɗeekɗen ɔɔ: «'Teec 'ɓaaki.» Gɔtn se sitange se teeco ro gaabge tun di se ɔɔ ɓaa ɛnd maakŋ kin̰zirge tu. Naan̰ kɛn se sum ɓo dɔɔl kin̰zirgen te dɛnɗe se dɔɔb rus ɔɔ naar aan̰o girdi girdi bɔɔy ɓaa si maakŋ baar ki ɔɔ naaɗe ooy ut kap. 33Kɛn jee gaam kin̰zirge jaay aak nakŋ tɛɗ se, naaɗe dɔɔb aan̰ ɓaa maakŋ gɛgɛr ki ɔɔ ɓaa taaɗ mɛtn taar nakgen deel se paac jeege tu nakŋ aan do gaabge tun di kɛn ɔk kɔɔn̰ sitange se. 34Gɔtn se jee maakŋ gɛgɛr ki se paac teec ɓaaɗo ɔŋ Isa. Kɛn naaɗe ɓaaɗo ɔŋin̰ sum se, naaɗe sɛlin̰ mɛtin̰a ɔɔ ɗeekin̰ ɔɔ: «Naai se iin̰ 'teec ɔn̰jen naaŋje!»

will be added

X\