Matthieu 4

1Gɔtn se Nirl Raa tɔɔɗ ɓaan ute Isa do kɔɗ‑ɓaar ki, taa Bubm sitange an̰ ɓaa naama. 2Maakŋ ɓiige tun si‑sɔɔ se, nɔɔrɔ katara se Isa ɔs te ɗim eyo ɔɔ kɛn ɓii si‑sɔɔ jaay aas se, naan̰ ɓo tɔɔlin̰a. 3Bubm sitange, naan̰ debm naam jeege se, ɓaaɗo ɔŋ Isa ɗeekin̰ ɔɔ: «Kɛn naai 'Goon Raa ɗeer num, 'taaɗ koge tun se ai dɛl nakŋ kɔsɔ.» 4Isa tɛrlin̰ ɔɔ: «Taar se k'raaŋin̰ga raaŋ do dɔkin̰ kɛn ɔɔ: Kɛn tɛɗ debkilimi iŋg se kɔsɔ kalin̰ ki sum eyo, num ute taargen paacn̰ kɛn teeco taar Raa ki.» 5Tɛr Bubm sitange ɓaan ute Isa maakŋ gɛgɛr kɛn salal Jeruzalɛm ki, ɓaa uun ɔlin̰ do Ɓee Raa ki raan lɛŋ lɛŋ, 6ɔɔ ɗeekin̰ ɔɔ: «Kɛn naai 'Goon Raa ɗeer num, do ɓee ki ara se, iin̰ aal naaŋ ki. Taa taara se k'raaŋin̰ga raaŋ do dɔkin̰ kɛn ɔɔ: Raa 'kund 'kulu kɔɗin̰ge tu ɔɔ naaɗe ai caapm kɔkŋ jiɗege tu, taa jɛige se 'kɔŋ rɔɔkŋ ro ko kɛn gam eyo.» 7Isa tɛrlin̰ ɔɔ: «Taar se kic k'raaŋin̰ga raaŋ do dɔkin̰ kɛn ɔɔ: Ɓɛrɛ, naai se 'kɔŋ 'naam Mɛli Raa eyo.» 8Tɛr Bubm sitange tɔɔɗ ɓaansin̰ do ko kɛn jɛrlɛ ɔɔ taaɗin̰ taa naaŋ gaarin̰gen do naaŋ ki paac ute nakŋ kaakŋ bɛɛɗege. 9Gɔtn se naan̰ ɗeekin̰ ɔɔ: «Kɛn naai jaay 'ɓaaɗo ɛrgga naanum ki ɔɔ 'daanumga num, nakgen se paac maam m'aisin̰ kɛɗa.» 10Anum Isa tɛrlin̰ ɔɔ: «Iik naatn cɛɛm ki Bubm sitange! Taa taar se k'raaŋin̰ga raaŋ do dɔkin̰ kɛn ɔɔ: Mɛli Raa kalaŋ tak se ɓo naai 'kɛrgŋ naanin̰ ki ɔɔ an̰ 'tɛɗn naabin̰a.» 11Gɔtn se Bubm sitange iin̰ ɔn̰in̰a ɔɔ kɔɗn Raage ɓaaɗo aakin̰ don̰ ki. 12Jan‑Batist se k'j'ɔkin̰ga daŋgay ki ɔɔ kɛn Isa jaay booy ɔɔ Jan j'ɔkin̰ga daŋgay ki se, naan̰ iin̰ tɛrl ɓaa taa naaŋ Galile ki. 13Kɛn naan̰ aan sum se, ɔn̰ gɛgɛrin̰ Nazarɛt ɔɔ ɓaa tiŋg maakŋ gɛgɛr kɛn Kaparnayum ki kɛn taa baar ki, taa naaŋ Zabulon ki ute gɛn Nɛptali ki. 14Taa naan̰ se ɓo nakŋ kɛn debm taaɗ taar teeco taar Raa ki ron̰ Ezayi taaɗno do dɔkin̰ se, aanga ɗoobin̰ ki kɛn ɔɔ: 15Naase jee taa naaŋ Zabulon ki ute jee taa naaŋ Nɛptali ki kɛn sak kaam aak baar, naase ɓo jee kɛn iŋgki jɛŋ ool Jordan kaam naane kɛn taa naaŋ Galile kɛn jeen̰ge Yaudge ey se; 16naase jeegen kɛn iŋgki maakŋ gɔt kɛn ɔɔɗɔ utu aki kaakŋ gɔtɔ asen wɔɔr kɛlɛŋ! Naasen kɛn iŋgki taa naaŋ kɛn ɔɔɗɔ aan gɔɔ jee ooyga kooy se, gɔtn wɔɔr, ɓɛrɛ, aanga. 17Kaaɗ kɛn se sum ɓo Isa baag taaɗn taar Raa jeege tu ɔɔ: «'Tɛrlki maakse taa maakŋ Gaar Raa se ɔɔpga gɔɔrɔ!» 18Isa jaay aan taa naaŋ Galile ki se, naan̰ ɓaa lee taa baar ki ɔɔ gɔtn se naan̰ aak gɛnaage dio: deb kalaŋ ron̰ Simon kɛn k'daŋin̰ ute ro Piɛr kici ɔɔ gɛnaan̰ se ron̰ Andre, tund tund gɛndɗe maan. Naaɗe se jee toocn̰ kɛn̰jge. 19Naan̰ ɗeekɗen ɔɔ: «'Ɓaaɗo daanumki! Ɓɔrse maam m'asen tɛɗn naase jee ɓaa 'je jikilimge aɗe ɓaa ɗoobm Raa ki.» 20Naaɗe naar ɔn̰ gɛndɗege ɔɔ daanin̰a. 21Utu iik naan ki cɔkɔ se, naan̰ aak gɛnaage di kuuy, Jak te gɛnaan̰ Jan, gaan Zebedege, naaɗe ute bubɗe se iŋg kiŋg maakŋ markabɗe ki ɗaap ɗaap gɛndɗege ɔɔ gɔtn se Isa daŋɗe. 22Naaɗe naar iin̰ ɔn̰ bubɗe te markabɗe ɔɔ naaɗe daan Isa. 23Tɛr Isa lee dɔɔɗ taa naaŋ Galile se paac dooy jeege maakŋ ɓeeɗege tun Yaudge lee tusn maak ki gɛn keem Raa. Naan̰ taaɗɗen Labar Jiga gɛn maakŋ Gaar Raa ɔɔ jeegen ɔk kɔɔn̰ge paac ute jeegen kɛn kɔɔn̰ge tujɗenga tuju maakɗe ki se, naan̰ ɛɗɗen lapia. 24Gɔtn se nookin̰ eem dɔɔɗ taa naaŋ Siri se paac. Ɔɔ jeege ɓaano ute jee kɔɔn̰ge paac kɛn dɔɔl kɔɔn̰ɗege kaam kalaŋ eyo ɔɔ lee dabarɗe aan gɔɔ: jee ɔk kɔɔn̰ sitange, jee ɔk kɔɔn̰ puputu ɔɔ jee k'ruŋguyge, paac se, naan̰ ɛɗɗen lapia. 25Jeege dɔɔlɔ dɛna ɔk mɛtn Isa: naaɗe se iin̰o taa naaŋ Galile ki, jeegen iin̰o taa naaŋ kɛn k'daŋin̰ te ro Gɛgɛrgen Sik, kɛngen iin̰o maakŋ gɛgɛr kɛn Jeruzalɛm ki ute kɛngen taa naaŋ Jude ki ɔɔ jeegen iin̰o jɛŋ ool Jordan kɛn kaam kaaɗa tookŋo.

will be added

X\