1 Kɛn ɓii sebit jaay deel se, ɓii dumas ki tanɔɔrin̰ nɔɔrin̰ se, Mari kɛn iin̰o Magdala ki ute Mari kɛn kuuy se, naaɗe ɓaa gɛn kaakŋ taa ɓaaɗa. 2 Gɔtn ese sum ɓo naaŋa naar te makɔn̰ɔ ɔɔ kɔɗn Mɛljege bɔɔyo maakŋ raa ki ɓaaɗo dircil ko taa ɓaaɗ ki se ɔɔ iŋg do ki. 3 Naan̰ se ron̰ wɔɔr gɔtɔ aan gɔɔ maan aal wusuk wusuk ɔɔ kalin̰ kic ɓo raap lak lak aan gɔɔ kuubu. 4 Anum asgargen ɗaar bɔɔb do ɓaaɗa gɔtn ese se, kɛn naaɗe aakin̰ se, ɓeere ɔkɗe se, roɗe ook marga jɛg jɛg ɔɔ si naaŋ ki aan gɔɔ jee ooyga kooyo. 5 Gaŋ kɔɗn Raa se ɗeek mɛndge tu se ɔɔ: «Naase se, ɔn̰ten 'ɓeerki. Maam m'jeele naase 'jeki je Isan kɛn k'tup k'tɔɔlin̰ ro kaag ki se. 6 Ɓɛrɛ, gɔtn ara se naan̰ gɔtɔ! Naan̰ se duroga daan yoge tu aan gɔɔ kɛn naan̰ mala taaɗo. 'Ɓaaɗo aakki gɔtn kɛn j'ɔl j'aalsin̰a. 7 'Naar 'ɓaa 'taaɗki jeege tun mɛtin̰ ki ɔɔki: naan̰ se duroga daan yoge tu ɔɔ ɔndga naana asen ɓaa booy taa naaŋ Galile ki. Gɔtn naane se ɓo naase an̰ki 'ɓaa kaaka.» Kɛse ɓo taar m'taaɗseno. 8 Ey num mɛndge ɓeere ɔkɗega, naɓo maakɗe raap aak eyo. Naaɗe iin̰ taa ɓaaɗ ki naar aan̰ ɓaa taaɗ labar se jeege tun mɛtn Isa ki. 9 Kɛn naaɗe jaay ɓaa ɓaa se, naaɗe aak Isa naar teeco piris naanɗe ki, ɗeekɗen ɔɔ: «'Tɔɔsɛ ki.» Gɔtn se, naaɗe iiko cɛɛn̰ ki, baam ɔk jɛn̰a ɔɔ ɛrg naanin̰ ki. 10 Gɔtn se, Isa taaɗɗen ɔɔ: «Ɔn̰te 'ɓeerki! 'Ɓaa 'taaɗki gɛnaamge tu k'ɓaa taa naaŋ Galile ki. Gɔtn naane ɓo, naaɗe utu am kaakŋ te kaamɗe.» 11 Kaaɗ kɛn mɛndgen ese iin̰o taa ɓaaɗ ki jaay ɔk tɛrlo tɛrlɛ aan te ey sum ɓo, gaŋ asgargen jee bɔɔbm do ɓaaɗa se, mɛtin̰ge ɓaa maakŋ gɛgɛr ki, ɔɔ ɓaa taaɗ magal jee tɛɗn sɛrkɛ Raage tu nakgen deel paac se. 12 Kɛn magal jee tɛɗn sɛrkɛ Raage tu jaay booy taar se, daŋ tuso magal taa ɓee Yaudge. Naaɗe dɔɔk taarɗe kalaŋ, uun gurs dɛna ɔɔ ɛɗ asgarge tu, 13 dɛjɗe ɔɔ: «'Ɓaa 'taaɗki ɔɔki num: ‹Nɔɔr kaamje ɔk bi sum ɓo, jee mɛtin̰ ki ɓaaɗo ɓoog ɔɔɗ uun ɓaansin̰ga.› 14 Ɔɔ kɛn taar se jaay oocga bi magal Rɔmɛge tu kic ɓo, naaje j'an̰ kurl maakin̰a ɔɔ taar ɗim tap ɓo 'koocn̰ dose ki eyo.» 15 Gɔtn se asgarge took uun gurs ɔɔ ɓaa taaɗ jeege tu aan gɔɔ taar k'dɛjɗeno se. Anum taar se Yaudge paac ɓaa booyin̰a ɔɔ ɓɔrse kic ɓo taar se j'utu k'lee k'taaɗin̰ taaɗa. 16 Anum jee mɛtn Isa kɛn sik‑kaar‑kalaŋ se, naaɗe iin̰ ɓaa taa naaŋ kɛn Galile ɔɔ ɓaa ook do ko kɛn Isa taaɗɗen ɔɔ k'ɓaa do ki se. 17 Kɛn naaɗe jaay aan do ko ki se, gɔtn se naaɗe aak Isa ɔɔ ɛrg naanin̰ ki. Naɓo maakɗe ki se, jee mɛtin̰ge maakɗe naaja. 18 Gɔtn se, Isa iiko cɛɛɗe ki ɔɔ ɗeekɗen ɔɔ: «Raa ɛɗumga tɔɔgɔ do nakge tu paac kɛn maakŋ raa ki ɔɔ kɛn do naaŋ ki. 19 'Ɓaa 'taaɗki mɛtjil jeege tun do naaŋ ki se paac ɔɔ 'tɛɗɗeki naaɗe tɛɗn jee mɛtum ki. 'Batizɗeki ute ro Bubu, Goono, te Nirl Salal. 20 'Dooyɗeki naaɗe tookŋ kuun taar kɛn maam m'dooyseno paac se ɔɔ kiŋg do ki. Maam se, daayum m'utu te naase, bini ɓii kɛn dunia an naŋ ro ki.»
