Matthieu 25

1Tɛr Isa aal naagŋ taara ɗeek ɔɔ: «Maakŋ Gaar Raa se, naan̰ tec aan gɔɔ gaan mɛndgen sik tɔs lɔɔmpɗege ɔɔ teec ɓaa dɔɔɗn gaabm ɓaa kɔkŋ mɛnda. 2Num maakŋ gaan mɛndge tun sik se, jee mii se mɛnd dɛrlge ɔɔ kɛngen kuuy mii se mɛnd mɛtɛkge. 3Mɛnd dɛrlge se, tɔs ɓaan te lɔɔmpɗege ɔk uubu maak ki, naɓo uun te zaaɗn uubm kuuy ey sum. 4Gaŋ mɛndgen mii mɛnd mɛtɛkge se tɔs ɓaan te lɔɔmpɗege ɔk uubu maak ki ɔɔ tɛr ɔk maakŋ nakge tun kuuy do ki. 5Aan gɔɔ gaabm mɛnda lɛ aan yɔkɔɗ ey ɗey se, gaan mɛndgen se bi ɓaa tɔɔlɗe ɔɔ naaɗe paac tooɗ bia. 6Kɛn aan daan ɓee se k'booy nam baag taaɗn makɔn̰ ɔɔ: 'Booyki! Gaabm mɛnda se, ɓɛrɛ, aanga. 'Teec ɓaa 'dɔɔɗin̰ki! 7Gɔtn se gaan mɛndgen sik se paac iin̰ duru ɔɔ tɔɔc tɔl tɔnd ɗaap lɔɔmpɗege. 8Num gaŋ mɛnd dɛrlge se tɔnd mɛtn mɛnd mɛtɛkge se ɔɔ: ‹Ɛɗjekiro uubsege se cɔkɔ, ey num lɔɔmpjege se uubin̰ ɓaa ɓaa naŋa.› 9Gaŋ mɛnd mɛtɛkge se tɛrlɗen ɔɔ: ‹A‑a, uubu se ajenki kɔŋ kaasn k'paacki eyo! Naase 'ɓaa 'dugkiro gɔtn jee zoge tu.› 10Kaaɗ kɛn mɛnd dɛrlge se iin̰ ɓaa gɛn dugŋ uubu se, gaŋ gaabm mɛnda se iin̰ aana. Ɔɔ naan̰ ɔŋ gaan mɛndgen mɛnd mɛtɛkge se iŋg aak kaak kaamin̰a. Naan̰ ɛnd ute naaɗe maakŋ ɓee mɛnd mɔrɔb ki se ɔɔ kɛn naaɗe jaay ɛnd se, kaam‑taara se k'gaasin̰a. 11Cɔkɔ se, mɛnd dɛrlge se aana ɔɔ baag tɔnd kaam taara ɗeek ɔɔ: Mɛlje, Mɛlje, ɔɔɗjen kaam taara! 12Gaŋ naan̰ tɛrlɗen ɔɔ: 'Booyki bɛɛ m'asen taaɗa: ɓɛrɛ, maam se m'jeelsen eyo.» 13Tɛr Isa taaɗɗen ɔɔ: «Taa naan̰ se ɓo, iŋgki zɛɛrɛ! Taa ɓii ute kaaɗn maam m'ano ɓaa se, naase 'jeelki eyo.» 14«Tɛr daala, kɛse tec aan gɔɔ debm ɓaa ɓaa mɛrtɛ jaay daŋ tus jee tɛɗn naabin̰ge ɔɔ ɔn̰ɗen maalin̰ paac se kaam jiɗe. 15Deb kalaŋ naan̰ ɛɗin̰ gɔkɔl daab magal magal mii, debm kuuy naan̰ ɛɗin̰ gɔkɔl daab magal magal dio, ɔɔ kɛn kuuy naan̰ ɛɗin̰ gɔkɔl daab magal kalaŋ. Naŋa kic ɓo naan̰ ɛɗin̰ kaam do ron̰ ron̰a, jaay ɓo naan̰ naar iin̰ ɓaa gɔtn mɛrtin̰ ki. 16Debm j'ɛɗin̰ gɔkɔl daab magal magal mii se, naan̰ naar ɓaa tɛɗin̰ oojo gɔkɔl daab magal magal kuuy mii do ki. 17Debm j'ɛɗin̰ gɔkɔl daab magal magal di se, naan̰ kic ɓaa tɛɗin̰ oojo gɔkɔl daab magal magal kuuy di do ki. 18Naɓo debm kɛn mɛlin̰ ɛɗin̰ gɔkɔl daab magal kalaŋ se, naan̰ ɓaa uɗ gɔɔ duubin̰ naaŋ ki, nam jeel gɔtin̰ eyo. 19«Gɔtn mɛrtin̰ ki se, mɛlɗe se ɓaa iŋgoga dɛn jaay ɔk tɛrl ɓaaɗo. Ɔɔ kɛn naan̰ jaay aan se, daŋ tɔnd mɛtɗe do gɔkɔl daabge tun magal magal kɛn naan̰ nigɗesin̰ se. 20Debm kɛn j'ɛɗin̰ gɔkɔl daab mii se iiko cɛɛn̰ ki ɔɔ ɗeekin̰ ɔɔ: ‹Mɛluma, naai ɛɗumo gɔkɔl daab mii ɔɔ maam m'tɛɗin̰ oojga kɛn kuuy mii do ki daala.› 21Mɛlin̰ ɗeekin̰ ɔɔ: ‹Kɛse jiga. Naai se debm tɛɗn naabm bɛɛ ɔɔ tuj ɔrmi ey se. Ute nakŋ maam m'ɛɗi cɔkɔ se kic, naai tuj te ɔrmi ey se; ɓɔrse maam m'ai kɛɗn nakge dɛna kaam ji. 'Ɓaaɗo 'tɛɗ maak‑raapo ute maama.› 22Debm kɛn j'ɛɗin̰ gɔkɔl daab di se kic iiko cɛɛn̰ ki ɔɔ ɗeekin̰ ɔɔ: ‹Mɛluma, naai ɛɗumo gɔkɔl daab dio ɔɔ maam m'tɛɗin̰ oojga kɛn kuuy di do ki daala.› 23Mɛlin̰ ɗeekin̰ ɔɔ: ‹Kɛse jiga! Naai se debm tɛɗn naabm bɛɛ ɔɔ tuj ɔrmi ey se. Ute nakŋ maam m'ɛɗi cɔkɔ se kic, naai tuj te ɔrmi ey se; ɓɔrse maam m'ai kɛɗn nakge dɛna kaam ji. 'Ɓaaɗo 'tɛɗ maak‑raapo ute maama.› 24Debm kɛn j'ɛɗin̰ gɔkɔl daab kalaŋ se, naan̰ kic iiko cɛɛn̰ ki ɔɔ ɗeekin̰ ɔɔ: ‹Mɛluma, maam m'jeele naai se debm aali ɔɔn̰ɔ. Maakŋ‑gɔtn naai ɔɔc te ey kic ɓo, naai ɔj naai ki ɔɔ gɔtn naai duub te ey kic ɓo, naai ɔjɔ. 25Bin num maam se ɓeere ɔkuma. Taa naan̰ se ɓo gɔkɔl daabi kɛn naai ɛɗumsin̰ se, maam m'ɓaa duubin̰o naaŋ ki ɔɔ ɓɔrse ara ɔk naki.› 26Gaŋ mɛlin̰ tɛrlin̰ ɔɔ: ‹Naai se debm tɛɗn naabm jig eyo ɔɔ debm kaar naaba! Naai 'jeelum maam se maakŋ‑gɔtn maam m'ɔɔc te ey kic ɓo, maam m'ɔjɔ ɔɔ gɔtn maam m'duub te ɗim ey kic lɛ, maam m'ɔj maam ki. 27Bɛɛki num, gɔkɔl daabum se, naai an̰o kɔmb maakŋ baŋki ki; ɔɔ kɔr maam m'aɗe tɛrl se, m'an̰ kɔŋin̰ am koojn̰ ziiɗn do ki. 28Gɔkɔl daabm jin̰ ki se, uunin̰ki ɔɔ ɛɗin̰ki deb kɛn ɔk gɔkɔl daabge sik se. 29Taa, debm kɛn ɔk se, j'an̰ kɛɗn do ki, taa nakin̰ an̰ ziiɗn tɛɗn dɛna. Num gaŋ debm ɔk ey se lɛ, kɛn naan̰ ɔk cɔkɔn se kic ɓo, j'an kuun naatn. 30Num debm tɛɗn naabm jaay tɔɔl sɛr ey se, ɔk undin̰ki naatn maakŋ gɔt kɛn ɔɔɗɔ. Ɔɔ gɔtn se ɓo gɔtn tɔɔyɔ ɔɔ gɔtn taan̰ naaŋa.›» 31Isa ɗeek daala ɔɔ: «Ɓii kɛn maam m'Goon Deba m'aɗe bɔɔy maakŋ gaarum ki ute kɔɗumge paac se, maam m'utu m'kiŋg do kaag do gaarum ki. 32Jee do naaŋ ki paac tus naanum ki ɔɔ maam m'aɗen nigŋ aan gɔɔ debm gaam nigŋ baatin̰ge ute bɛn̰in̰ge se. 33Baatge se, maam m'aɗen kɔl do ji daamum ki ɔɔ bɛn̰ge se lɛ, do ji jeelum ki. 34Gɔtn se maam gaarge m'ɗeekŋ jeege tun do ji daamum ki m'ɔɔ: ‹'Ɓaakiro, naasen kɛn Bubum tɛɗsenga tɛɗn bɛɛn̰ se; ɛndki maakŋ gaarin̰ kɛn naan̰ ɗaapsesin̰ga ɗaap do dɔkin̰a, kaaɗ kɛn naan̰ utu aalo kaal do naaŋa se. 35Taa maam ɓo tɔɔlumo ɔɔ naase ɛɗumkiroga kɔsɔ; maane tɔɔlumo ɔɔ naase ɛɗumkiroga m'aayga; m'iŋgoga mɛrtɛ gɔtse ki ɔɔ naase ɔkumkiroga jiga. 36Kɛn maam mɛt‑beere, naase ɛɗumkiroga kal kuusu. Kɛn maam m'kɔɔn̰o naase 'ɓaa aakumkiroga. Kɛn maam j'ɔkum daŋgay ki, naase 'ɓaa aakumkiroga.› 37«Gaŋ jeegen tɛɗo nakŋ ute ɗoobin̰ se utu an̰ tɛrl ɔɔ: ‹Mɛlje, nuŋ ki jaay naaje k'j'aakio naai ɓo tɔɔlio jaay k'j'ɛɗio kɔsɔ se? Ey lɛ kɛn maane tɔɔlio jaay k'j'ɛɗio maan kaaye se? 38Naai iŋgo mɛrtɛ gɔtje ki nuŋ ki jaay naaje k'j'ɔkkio jiga se? Ey lɛ nuŋ ki jaay naaje k'j'aakio naai 'mɛt‑beere jaay naaje k'j'ɛɗio kal tuusu se? 39Nuŋ ki jaay naai ooco kɔɔn̰ɔ ey lɛ maakŋ daŋgay ki, jaay naaje k'ɓaaɗo k'j'aakkiga se?› 40Gɔtn se gaarge aɗen tɛrl ɔɔ: ‹'Booyki bɛɛ m'asen taaɗa: maakŋ gɛnaamge tun se debm baat aan gɔɔ ɗi kic jaay, naase 'tɛɗin̰kiroga bɛɛ se, kɛse gɔɔ 'tɛɗin̰kiro maam ki.› 41«Tɛr gaarge utu ɗeekŋ jeege tun do ji jeelin̰ ki se ɔɔ: ‹Iikki naatn cɛɛm ki dɔkɔ, naasen jee Raa naamsenga naam se! 'Ɓaaki maakŋ pooɗ kɛn gɛn daayum kɛn Raa tɛɗin̰ gɛn Ɓubm sitange ute kɔɗin̰ge. 42Taa maam ɓo tɔɔlumo ɔɔ naase ɛɗumkiro te kɔs eyo; maane tɔɔlumo ɔɔ naase ɛɗumkiro te maan kaay eyo. 43Maam m'iŋgo mɛrtɛ gɔtse ki ɔɔ naase dɔɔɗ ɔkumkiro te eyo. Maam mɛt‑beere ɔsumo kic ɓo, naase ɛɗumkiro te kal kuus eyo; kɛn m'ooco kɔɔn̰ɔ ɔɔ j'ɔkumo daŋgay kic ɓo, naase 'ɓaa aakumkiro te eyo.› 44«Gaŋ jee do ji jeelin̰ ki utu an̰ tɛrl ɔɔ: ‹Mɛlje, nuŋ ki jaay kɛn naaje k'j'aaki naai ɓo tɔɔlio, ey lɛ maane tɔɔlio, kɛn mɛrtɛ, kɛn mɛt‑beere, kɔɔn̰ɔ ey lɛ maakŋ daŋgay ki, jaay naaje k'ɓaaɗo k'naaki te ey se?› 45Gɔtn se naan̰ utu aɗen tɛrl ɔɔ: ‹'Booyki bɛɛ m'asen taaɗa: maakŋ gaange tun sɛɛm se, debm baat aan gɔɔ ɗi kic jaay naase 'tɛɗin̰kiro te bɛɛ ey se, kɛse gɔɔ naase 'tɛɗumkiro te maam ki eyo.› 46Jee do ji jeelin̰ ki se utu ɓaa tiŋg maakŋ dubar ki gɛn daayum, ɔɔ jeegen kɛn tɛɗ nakgen ute ɗoobin̰ se lɛ, kɔŋ kaajn̰ gɛn daayum.»

will be added

X\