Matthieu 22

1Tɛr Isa baagɗen taaɗn ute kaal naagŋ taara daala ɔɔ: 2«Maakŋ Gaar Raa se tec aan gɔɔ gaar kɛn tɛɗ kɔsɔ dɛna ɓii kɔkŋ mɛnd goonin̰ ki. 3Naan̰ ɔl jee tɛɗn naabin̰ge taa aɗe ɓaa daŋ jeegen k'daŋɗeno gɔtn kɔkŋ mɛnd ki se, naɓo jee se baate ɓaaɗo. 4Tɛr naan̰ ɔl jee tɛɗn naabgen kuuy ɓaa ɗeek jeege tun k'daŋɗeno se ɔɔ: ‹Ɓɔrse kɔsɔ se bɛɛga, kɔs taarumge ute maalumgen teer se m'tɔɔlɗenga. Ɔɔ ɓɛrɛ, kɔsɔ se ooyga, 'ɓaakiro aki kɔsɔ!› 5Naɓo jee se taar se naaɗe an ɗim eyo ɔɔ wɔɔk ɓaa naabɗege tu. Deb kalaŋ ɓaa maakŋ‑gɔtin̰ ki ɔɔ kɛn kalaŋ ɓaa gɔtn tɛɗn zo nakin̰ge tu. 6Jeegen kuuy se kic iin̰ tɔk jee tɛɗn naabge se dabarɗe ɔɔ tɔɔlɗe naatn. 7Gɔtn se gaarge maakin̰ taarin̰a, ɔl asgarin̰ge gɛn ɓaa tɔɔl jeegen tɔɔlo jee tɛɗn naabin̰ge se ɔɔ tɔɔcn̰ gɛgɛrɗe se naatn. 8Gɔtn se naan̰ ɗeek jee tɛɗn naabin̰ge tu ɔɔ: ‹Kɔsɔ se ooyga, naɓo jeegen k'daŋɗeno se ɔŋ aasin̰ te gɛn kɔsn kɔsn ese se eyo. 9'Ɓaaki gɔtn jeege tun lee tusn daan ɗoobge tu se, jeegen paacn̰ naase ɔŋɗekiga ɓo 'daŋɗekiro aɗe ɓaa gɔtn kɔkŋ mɛnd ki se.› 10Jee tɛɗn naabge se ɓaa daan ɗoobge tu ɔɔ daŋ tuso jeegen naaɗe ɔŋɗeno paac se kaam kalaŋ, kɛn jee bɛɛ, kɛn jee bɛɛ eyo; ɔɔ ɓaanɗeno maakŋ ɓee kɛn jeege utu an kɔsn maak ki se ɔɔ maakŋ ɓee se jee kɛn k'daŋɗeno se ɓaaɗo ɗoocin̰ tal. 11Gɔtn se gaarge ɛnd maakŋ ɓee ki gɛn kaakŋ jeegen maak ki se, gaŋ aak deb kalaŋ se uuso kal tec gɛn jeegen ɓaaɗo gɔtn kɔkŋ mɛnd ki se eyo. 12Gɔtn se gaarge ɗeekin̰ ɔɔ: ‹Mɛɗuma, tɛɗ ɔɔ ɗi jaay naai ɛndo gɔtn ara? Naai lɛ ɔk kal tec aan gɔɔ jeegen ɓaaɗo gɔtn kɔkŋ mɛnd ki ey se.› Num gaabm se ɔk taar kɛn an̰ tɛrl eyo. 13Gɔtn se gaarge ɗeek jee tɛɗn naabin̰ge tu ɔɔ: ‹Gaabm se, 'dɔɔkin̰ki jin̰ge ute jɛn̰ge ɔɔ uun undin̰ki naatn maakŋ gɔt kɛn ɔɔɗɔ, ɔɔ gɔtn se ɓo gɔtn naan̰ an tɔɔyɔ ɔɔ an taan̰ naaŋin̰a.›» 14Tɛr Isa ɗeek ɔɔ: «Ɗeere, Raa se daŋga jeege dɛna, naɓo jeegen naan̰ bɛɛr tɔɔɗɗenga tɔɔɗ se baata.» 15Gɔtn se Parizige ɓaa tus dɔɔk taarɗe gɛn goom kɔkŋ Isa do taarin̰ ki. 16Naaɗe ɔl maakŋ jeege tun mɛtn Parizige tu ute jee Ɛrɔdge kandum se gɔtn Isa ki ɔɔ naaɗe ɓaa ɗeekin̰ ɔɔ: «Debm dooy jeege, naaje k'jeele naai se taaɗ taar mɛt ki. Ɔɔ ɗoobm Raa se naai 'dooy jeege ute kɛn mɛt ki ɔɔ naai lɛ taar jeegen kuuy se naai 'tɛɗn naaba ro ki eyo. 17Maak‑saapm naai ki num, taaɗjen tu Sezar se j'ɔk ɗoobm j'an̰ kɔgŋ miiri lɔɓu gɔtɔ?» 18Num gaŋ Isa se jeel saapɗen jig ey se ɗeekɗen ɔɔ: «Naase se jeegen 'tɛɗki rose aan gɔɔ jee taaɗ taar mɛt ki se. Gɛn ɗi naase oomumki bin se? 19'Taaɗumki tu tamman gɛn kɔgŋ miiri se, m'an̰ kaaka.» Gɔtn se naaɗe uun taaɗin̰ tamma kalaŋ. 20Naan̰ tɔnd mɛtɗe ɔɔ: «Kaam‑nirl doa te ro kɛn k'raaŋin̰ ro ki se tap ɓo gɛn naŋa?» 21Naaɗe tɛrlin̰ ɔɔ: «Gɛn Sezar.» Gɔtn se Isa ɗeekɗen ɔɔ: «Kɛn bin num, nakŋ gɛn Gaar Sezar se ɛɗin̰ki nakin̰a ɔɔ gɛn Raa lɛ ɛɗin̰ki nakin̰ kici.» 22Kɛn naaɗe jaay booy taar Isa taaɗ se, taar se ɔkɗen taaɗ eyo. Gɔtn se Isa se naaɗe ɔn̰in̰a ɔɔ iin̰ ɓaa. 23Ɓii kɛn se sum ɓo, jeegen k'daŋɗe Sadusege kɛn taaɗ ɔɔ jeege ooyga num dur ey sum se ɓaaɗo ɔŋ Isa ɔɔ tɔnd mɛtin̰ ɔɔ: 24«Debm dooy jeege, Musa se taaɗjenga taaɗ maakŋ Kitap ki ɔɔ: kɛn deba jaay ɔk mɛnda ɔɔ ooy ɔn̰ te goon ey se, ɔn̰ gɛnaan̰ kɔkŋ mɛndin̰a ɔɔ koojn̰ mɛtjili gɛnaan̰ kɛn ooy se. 25Gaŋ maakjege tu se gɛnaage cili kon̰ɗe kalaŋ. Debm deet deet se ɔk mɛnda naɓo ooy ooj te goon eyo, ɔɔ mɛnda se ɔɔp gɛnaan̰ gɔɔsin̰ ki. 26Gɔɔsin̰ kic ɓaaɗo ɔk mɛnd se ɔɔ naan̰ kic ooy ooj te goon eyo. Tɛr debm gɛn k‑mɔtɔge tu se kic ɓo ɓaaɗo ɔk mɛnd se ɔɔ naan̰ ooyo ooj te goon eyo; bini aan do deb kɛn gɛn k‑cilige tu. 27Kɛn naaɗen cili se jaay ooy paac se, kaam mɔɔtn se mɛnda se kic ɓaaɗo ooyo. 28Bin num ɓii kɛn jaay jeegen ooyga kooy aɗe dur daan yoge tu se, maakŋ gɛnaage tun cili se, mɛnd se tap ɓo 'tɛɗn mɛnd naŋa? Taa naaɗe paac lɛ tɔk naamin̰ga naam mɛnd se.» 29Isa tɛrlɗen ɔɔ: «Naase se, ɓɛrɛ, iigkiga, taa taar Raa se lɛ 'jeelki eyo ɔɔ tɔɔgŋ Raa kic lɛ naase ɔndki te mɛtin̰ eyo. 30Taa ɓii kɛn jaay jeegen ooyga kooy aɗe dur daan yoge tu se, gaabge te mɛndge se 'tɔkŋ naap ey sum. Num naaɗe se tecn̰ aan gɔɔ kɔɗn Raagen maakŋ raa ki. 31Gɛn jeegen ooyga kooy jaay utu dur daan yoge tu se, taar Raa taaɗsen maakŋ Kitapin̰ ki se, naase 'dooyin̰ki te ey la kɛn ɔɔ: 32Maam se m'Raa gɛn Abraam m'gɛn Isaka ɔɔ m'gɛn Yakub. Raa se, naan̰ Raa jeegen ooyga kooy eyo, num naan̰ se, Raa jee zɛɛrɛ.» 33Kɛn jee dɛnge jaay booy taar kɛn Isa dooyɗe se, taar se tap ɓo ɔkɗen taaɗ eyo. 34Kɛn Parizige jaay booy ɔɔ Sadusege ɔŋ aasin̰ te ro Isa ki ey se, naaɗe daŋ tus naapa. 35Maakɗe ki se, deb kalaŋ se debm jeel taaɗn tɔɔkŋ mɛtn Ko Taar Raa, je ɗoobm an goom kɔkŋ Isa se, ɓaaɗo tɔnd mɛtin̰ ɔɔ: 36«Debm dooy jeege, maakŋ Ko Taar kɛn Raa ɛɗo Musa ki se taar gɛn tɛɗa kɛn cirɗe paac se, kɛn gay?» 37Isa tɛrlin̰ ɔɔ: « Mɛli Raa se, 'jen̰ ute maaki paac ute roi paac ɔɔ ute saapi paac. 38Kɛse ɓo taar deet deetn gɛn tɛɗa kɛn cirɗe paac paac. 39Tɛr kɛn mɛtin̰ ki tecin̰ tec se kɛn ɔɔ: 'Je naapi aan gɔɔ ro naai mala. 40Maakŋ Ko Taar Raa ki ute taargen jee taaɗ taar teeco taar Raa ki taaɗo paac se, don̰ ɓo ɔɔs do taarge tun di ese sum.» 41Aan gɔɔ Parizige lɛ tusga ɗey se, Isa tɔnd mɛtɗe ɔɔ: 42«Gɛn naase ki num, al‑Masi se tap ɓo naŋa? Naan̰ tap ɓo goon naŋa?» Naaɗe tɛrlin̰ ɔɔ: «Naan̰ se mɛtjil Daud.» 43Isa ɗeekɗen ɔɔ: «Num tɛɗ ɔɔ ɗi jaay Nirl Raa ɔl Daud daŋin̰ ɔɔ: Mɛluma? Ɔɔ naan̰ mala taaɗga taaɗ maakŋ Kitap ki ɔɔ: 44Mɛljege Raa taaɗo Mɛlum ki ɔɔ: 'Ɓaaɗo iŋg do ji daamum ki bini jee taamooyige se m'aɗen tɛɗn naai utu 'kiŋg doɗe ki. 45Kɛn Daud jaay daŋ al‑Masi ɔɔ Mɛluma, anum tɛɗ ɔɔ ɗi jaay Mɛlin̰ 'tɛɗn goon Daud se?» 46Maakɗe ki se, nam jaay an̰ tɛrl taara kalaŋ Isa ki kic ɓo gɔtɔ ɔɔ naan̰ kɛn se mɔɔtn nam tɔnd te mɛtin̰ do taar ɗim kɛn kuuy ey sum.

will be added

X\