Matthieu 19

1Kɛn Isa taaɗ naŋ taarin̰ se, naan̰ iin̰ ɔn̰ Galile ɔɔ ɓaa taa naaŋ Jude ki, kaam aak jɛŋ ool k'daŋin̰ Jordan kɛn kaam naane. 2Dɔɔl jeege dɛna ɔk mɛtin̰a ɔɔ gɔtn se naan̰ ɛɗɗen lapia. 3Parizige mɛtin̰ge se ɓaaɗo ɔŋ Isa je ɗoobm an̰ goom kɔk se, naaɗe tɔnd mɛtin̰ ɔɔ: «Deba se, do taar ɗim kɛn gay kic ɓo, naan̰ ɔk ɗoobo kɛn 'piir mɛndin̰ la?» 4Isa tɛrlɗen ɔɔ: «Naase 'dooyin̰ki te ey la, taar k'raaŋin̰o maakŋ Kitap ki se? Do kupm mɛt ki se, Raa Mɛl Kaala aalo gaaba ute mɛnda, 5ɔɔ ɗeek ɔɔ: Taa naan̰ se ɓo gaaba teecn̰ kɔn̰ kon̰ te bubin̰a, ɓaa tum te mɛndin̰a, ɔɔ naaɗen di se tum tɛɗga daa ro kalaŋ. 6Bin se naaɗe se tɛɗga aan gɔɔ jee di eyo, num aan gɔɔ deb kalaŋ sum. Nakŋ jaay Raa dɔɔkin̰ga dɔɔk se, debkilimi ɔn̰te tuutin̰a!» 7Parizige tɔnd mɛtin̰ ɔɔ: «Gɛn ɗi jaay Musa ɗeek ɔɔ gaaba raaŋ maktubm gɛn piiri, kɛɗn mɛndin̰ ki jaay an̰ piir se?» 8Isa tɛrlɗen ɔɔ: «Kɛse taa do‑mɔŋgse ɓo, Musa ɔɔɗsen ɗoobm piir mɛndsege. Ey num do kupm mɛt ki se bin eyo. 9'Booyki m'asen taaɗa: nam jaay 'piir mɛndin̰ se, kɛn mɛndin̰ ɛɛs kɛɛs gaabge jaayo, ɔɔ kɛn naan̰ jaay ɔkga mɛnd kuuy se, naan̰ se aan gɔɔ debm ɛɛs mɛnd nam.» 10Jee mɛtn Isa ki ɗeekin̰ ɔɔ: «Kɛn daan gaaba ute mɛnda jaay kiŋgɗe bin num, naan̰ se kɛn debm ɔk te mɛnda ey kic num bɛɛ kaca!» 11Isa tɛrlɗen ɔɔ: «Jeege paac se kɔŋ booy kɔkŋ taar se eyo. Jeegen an̰ booy kɔk se, jeegen kɛn Raa ɛɗɗenga jeele gɛn booy kɔkŋ mɛtn taar se jaayo. 12Ɗeere, ɗoobm jaay gaasn gaabge gɛn tɔkŋ mɛndge se dɛna: jee mɛtin̰ge se j'oojɗe ɓo roɗe gɔtɔ, jee mɛtin̰ge se lɛ jikilimge ɓo tɛɗɗe roɗe tɛɗ gɔtɔ, ɔɔ kɛngen mɛtin̰ge se taa taar Raa ɓo naaɗe baate tɔkŋ mɛndge. Debm kɔŋ booy kɔkŋ taar se num, ɔn̰in̰ an̰ booy kɔkɔ!» 13Gɔtn se jeege ɓaano ute gaangen sɛɛmɛ gɔtn Isa ki taa naan̰ aɗen tɔnd jin̰ doɗe ki ɔɔ tɔnd mɛtn Raa taa naaɗe, naɓo jee mɛtin̰ ki uunɗe kaamɗe naatn. 14Gaŋ Isa ɗeekɗen ɔɔ: «Ɔn̰ɗeki gaangen sɛɛm se aɗe ɓaa gɔtum ki, ɔn̰te 'gaasɗeki, taa maakŋ Gaar Raa se gɛn jeegen tec aan gɔɔ gaangen sɛɛm se.» 15Kɛn naan̰ jaay tɔnd jin̰ doɗege tu aas se, naan̰ iin̰ ɔn̰ gɔtn se, ɔɔ ɓaa. 16Gaŋ gaaba kalaŋ ɓaaɗo ɔŋ Isa ɔɔ ɗeekin̰ ɔɔ: «Debm dooy jeege, bɛɛ maam m'tɛɗ jaay am kɛɗn kaajn̰ gɛn daayum se, kɛn gay?» 17Isa tɛrlin̰ ɔɔ: «Gɛn ɗi 'tɔnd mɛtum ro nak kɛn bɛɛ se? Kɛn bɛɛ se, Raa kalin̰ ki sum. Kɛn naai jaay 'je 'kɔŋ kaajn̰ gɛn daayum num, 'tɛɗn nakŋ kɛn Raa taaɗ ɔɔ gɛn tɛɗa se.» 18Gaaba se ɗeekin̰ ɔɔ: «Kɛn gayo?» Isa tɛrlin̰ ɔɔ: « Ɔn̰te 'tɔɔl nam, ɔn̰te 'kɛɛsn mɛnd nam, ɔn̰te 'kɛɛsn gaabm nam, ɔn̰te 'ɓoogo, ɔn̰te 'tɔkŋ taar‑kɔɔɓɔ do nam ki, 19'sook koi ki te bubi ki ɔɔ 'je naapi aan gɔɔ ro naai mala.» 20Gaaba se tɛrlin̰ ɔɔ: «Nakgen se maam m'lee m'tɛɗin̰o tɛɗ paac tap, anum ɔɔpum kɛn gay daala?» 21Isa ɗeekin̰ ɔɔ: «Kɛn naai jaay je tɛɗn debm bɛɛ mala mala naan Raa ki num, maali naai ɔk paac se, 'ɓaa 'dugin̰ naatn ɔɔ gursin̰ se 'nigin̰ jee daayge tu. Kɛn tɛɗin̰ga bin se, ai tooɗn kɔrbɔtɔ maakŋ raa ki. Ɔɔ naai lɛ, 'ɓaaɗo 'daanuma.» 22Kɛn goon kɔɗɔ se jaay booy taar kɛn Isa taaɗin̰ se, ɔk tɛrl ɓaa ɓaa se maakin̰ tuj kasak kasak, taa naan̰ debm nak dɛna. 23Isa ɗeek jeege tun mɛtin̰ ki ɔɔ: «'Booyki bɛɛ m'asen taaɗa: debm nak dɛna se kɛndin̰ kɔɔn̰ɔ maakŋ Gaar Raa ki. 24M'ɗeek m'ɗɔɔlsen daala: kɛn gin̰ji jaay deel ute ɓee luppara se ɔɔn̰ɔ; naɓo debm nak dɛna jaay 'kɛnd maakŋ Gaar Raa ki se, ɔɔn̰ cir naan̰ se daala!» 25Kɛn jee mɛtin̰ ki jaay booy taar se, ɔkɗen taaɗ eyo ɗeek ɔɔ: «Kɛn bin num naŋa jaay 'kɔŋ kaaja?» 26Isa uun kaamin̰ aakɗe ɔɔ ɗeekɗen ɔɔ: «Gɛn jikilimge tu sum num nakŋ se ɔɔn̰ɔ, num Raa ki se, ne ɗim ɔɔn̰in̰ gɔtɔ.» 27Gɔtn se Piɛr ɗeek Isa ki ɔɔ: «'Booyo, naaje se k'j'ɔn̰oga nakge paac taa j'ai daan naai, num naaje tap ɓo j'kɔŋ ɗi?» 28Isa tɛrlɗen ɔɔ: «'Booyki bɛɛ m'asen taaɗa: kaaɗ kɛn Raa utu tɛɗn nakge paac 'tɛɗn kiji se, maam Goon Deba m'utu m'kiŋg do kaag do kɛn iin̰o gɔtn Raa ki ɔɔ naasen sik‑kaar‑di kɛn lee daanumkiro se, utu aki kiŋg do kaag do kɛn sik‑kaar‑dio gɛn kɔjn̰ bɔɔrɔ do taa ɓee gaan Israɛlge tun sik‑kaar‑di se. 29Ɔɔ debm jaay ɔn̰o ɓeen̰ge, gɛnaan̰gen gaabge ute kɛngen mɛndge, bubin̰a, kon̰a, gɛnin̰ge ey lɛ maakŋ‑gɔtin̰ge taa maam se, nakgen se paac se naan̰ utu aɗen kɔŋ dɛn cir kɛn naan̰ ɔn̰o, ɔɔ 'kɔŋ kaajn̰ gɛn daayum. 30Num maakŋ jeege tun ɓɔrse naan ki se, dɛnin̰ utu kɔɔpm mɔɔtn. Ɔɔ maakŋ jeege tun ɓɔrse mɔɔtn se, dɛnin̰ utu tɛɗn jee naan ki.»

will be added

X\