Matthieu 18

1Kaaɗ kɛn se jee mɛtn Isa ki ɓaaɗo ɔŋin̰a ɔɔ tɔnd mɛtin̰ ɔɔ: «Naŋa ɓo 'tɛɗn magal cir jeege paac maakŋ Gaar Raa ki?» 2Isa daŋo goon cɔkɔ ɓaaɗo ɗaar daanɗe ki, 3ɔɔ ɗeekɗen ɔɔ: «'Booyki bɛɛ m'asen taaɗa: kɛn naase 'tɛrlki te maakse te eyo ɔɔ 'tɛɗki te rose aan gɔɔ gɛn gaangen sɛɛm ey se, naase aki kɔŋ kɛnd maakŋ Gaar Raa ki eyo. 4Taa naan̰ se ɓo debm jaay ɔɔp ron̰ baat aan gɔɔ goon cɔkɔn ese se, naan̰ ɓo debm 'tɛɗn magal cir jeege paac maakŋ Gaar Raa ki. 5Taa maam jaay, debm ɔkga goon cɔkɔ jiga aan gɔɔ goon ese se, kɛse aan gɔɔ naan̰ ɔkum maam mala.» 6«Gaŋ maakŋ gaange tun sɛɛm kɛn aalga kaal maakɗe dom ki se jaay, nam ɔlga deb kalaŋ maakŋ kusin̰ ki se, debm kɛn ɔlin̰ se ɔn̰ bɛɛki num, j'uuno ko tootn magala ɔɔ k'dɔɔkin̰ mindin̰ ki ɔɔ j'uun j'undin̰ maakŋ baar kɛn jɛrlɛ. 7Jeegen do duni ki se utu aɗen tɛɗn ɔɔn̰ aak eyo taa nakgen kɛn utu kɔl jeege maakŋ kusin̰ ki se utu 'tɛɗn dɛn aak eyo. Ɗeere, nakgen bin se utu tap, naɓo ɔɔn̰ɔ deb kɛn 'kɔl jeege maakŋ kusin̰ ki se. 8Kɛn jii ey lɛ jɛi jaay ɓo ai kɔl maakŋ kusin̰ ki num, gaaŋ siɗen dɔkɔ. Kɛn ɔɔpi jii kalaŋ ey lɛ jɛi kalaŋ jaay kɔŋ kaaja se, bɛɛ cir kɛn 'kiŋg te jige dio ey lɛ jɛige dio ɔɔ ɓaa maakŋ pooɗ kɛn gɛn daayum. 9Kɛn kaami jaay ɓo ai kɔli maakŋ kusin̰ ki num, kaami se ɔɔɗ und naata. Kɛn ɔɔpi kaami kalaŋ jaay kɔŋ kaajn̰ gɛn daayum se, bɛɛ cir kɛn 'kiŋg te kaamige dio ɔɔ ɓaa maakŋ pooɗ kɛn gɛn daayum.» 10«Ɔndki kɔndɔ gaan sɛɛmgen ese se, nam kalaŋ kic ɓo ɔn̰te aakin̰ki aan gɔɔ nakŋ cɛrɛ! Anum 'booyki m'asen taaɗa: kɔɗɗegen iŋg cɛɛ Bubum ki maakŋ raa ki se, daayum utu aakɗen doɗe ki. 11[Taa maam Goon Deba m'ɓaaɗo se taa kaajn̰ jeegen iigga kiigi.] 12«Naase tap ɓo 'saapin̰ki ɔɔki ɗi? Kɛn deba jaay ɔk baatge kaaru ɔɔ maakɗe ki se kɛn kalaŋ iigga num, baatgen sik‑jɛrnaŋ‑kaar‑jɛrnaŋ kuuy se naan̰ aɗe kɔn̰ maakŋ ko ki taa 'ɓaa je kɛn kalaŋ iig kiig se ey la? 13'Booyki bɛɛ m'asen taaɗa: kɛn naan̰ jaay je ɔŋin̰ga se, naan̰ maakin̰ raapm dɛna do baat kɛn se cir do kɛnge tun si‑jɛrnaŋ‑kaar‑jɛrnaŋ kɛn iig te ey se. 14Taa naan̰ se ɓo Bubsen maakŋ raa ki kic num, je ɔɔ maakŋ gaange tun sɛɛm se, nam kalaŋ tap ɓo kut eyo.» 15«Kɛn gɛnaai jaay tɛɗiga kusin̰a num, 'ɓaa ɔŋin̰ kali ki ɔɔ 'mooyin̰a. Kɛn naan̰ jaay booy uunga taari num, kɛse naai 'ɗaapin̰ga. 16Kɛn naan̰ jaay baate booy kuun taari se, ɔk 'tɛrl 'ɓaa ɔŋo deb kalaŋ ey lɛ jeege dio taa naan jeege tun dio ey lɛ mɔtɔ se ɓo, ai tɛɗn saaɗige ɔɔ ute naaɗe se ɓo, naase aki naŋ taarse. 17Kɛn jee se jaay naan̰ baate booyɗe taarɗe kic num, 'ɓaa 'taaɗn mɛtn taar se egliz ki. Ɔɔ kɛn jee egliz ki ɓaa ɔŋin̰ jaay naan̰ baate booy kuun taarɗe daal num, naai aakin̰ aan gɔɔ debm jeel Raa mal eyo ey lɛ aan gɔɔ debm tɔkŋ miiri. 18'Booyki bɛɛ m'asen taaɗa: nakŋ paacn̰ jaay naase 'dɔɔkin̰kiga do naaŋ ki se, maakŋ raa kic ɓo Raa an̰ dɔɔkɔ. Ɔɔ nakŋ paacn̰ jaay naase 'tuutin̰ga do naaŋ ki ara ki se, maakŋ raa ki kic ɓo Raa an̰ tuutu. 19«'Booyki m'asen taaɗn daala: do naaŋ ki ara jaay jeege dio maakse ki taarɗe kalaŋ ɔɔ tɔnd mɛtn ɗim se, nakŋ naaɗe je se, Bubum kɛn maakŋ raa ki aɗesin̰ kɛɗa. 20Ɗeere, taa gɔtn jaay jeege dio ey lɛ mɔtɔ jaay tus ute ro maam se, maam m'utu daanɗe ki.» 21Gaŋ Piɛr ɓaaɗo ɔŋ Isa ɔɔ tɔnd mɛtin̰ ɔɔ: «Mɛluma, kɛn gɛnaam jaay tɛɗumga kusin̰a num, m'an̰ tɛɗn kalɗɛ mɛt kando? Bin num m'an̰ tɛɗn ɗɔɔl cili ne?» 22Isa tɛrlin̰ ɔɔ: «Maam m'ɗeeki m'ɔɔ: ɗɔɔl cili sum eyo, num sik‑cili‑cili mɛt cili.» 23«Taa naan̰ se ɓo 'booyki m'ɔɔ: maakŋ Gaar Raa se tec aan gɔɔ gaar kɛn tus jee tɛɗn naabin̰ge taa kaakŋ sɛɛn̰ do jeege tu. 24Kɛn naan̰ utu baag baag kaakŋ gursin̰ sum ɓo, j'ɔk k'ɓaano ute gaaba kalaŋ kɛn an̰ kɔgŋ gurs dupu‑kaar kando kando. 25Aan gɔɔ gaabm se ɔk ɗim naan̰ an kɔgŋ sɛɛn̰ gɔtɔ ɗey se, gaarge ɗeek ɔɔ: ‹'Ɓaa 'dugin̰ki naan̰a, mɛndin̰a, gɛnin̰ge ɔɔ nakŋ naan̰ ɔk paac se, k'dugin̰a ɔɔ gursin̰ se k'ɓaaɗo k'j'ɔgum sɛɛma.› 26Gɔtn se gaabm ese se ɓaaɗo ooc mɛtn jɛn̰ ki ɔɔ ɛrg naan mɛlin̰ ki ɔɔ ɗeekin̰ ɔɔ: ‹Aay kaami, uɗum bia, sɛɛi se paac m'utu m'aisin̰ kɔgɔ!› 27Gɔtn se mɛlin̰ ɛɛjin̰ don̰ ki, ɔɔ tɔɔl te sɛɛn̰ se naata ɔɔ ɔn̰in̰ iin̰ ɓaa. 28Kɛn gaabm ese jaay teec ɓaa ɓaa se, ɓaa dɔɔɗ ute mɛɗin̰ kalaŋ kɛn naaɗe tɛɗ naaba kalaŋ. Debm se ɔkoga kɔkŋ sɛɛn̰ tamma kaaru. Gɔtn se naan̰ ɔkin̰ bɔrlin̰ ki ai karat ɔɔ ɗeekin̰ ɔɔ: ‹Ɔgumo sɛɛma!› 29Gɔtn se mɛɗin̰ se ooc mɛtn jɛn̰ ki ɔɔ eemin̰ nɔɔ mɛtin̰ ki ɔɔ: ‹Aay kaami, uɗum bia, sɛɛi se maam m'utu m'aisin̰ kɔgɔ!› 30Gaabm se baate, ɔk mɛɗin̰ se ɓaa ɔlin̰ daŋgay ki kɔr naan̰ an̰ kɔgŋ naŋ sɛɛn̰ se. 31Mɛɗɗegen k'tɛɗ naaba kalaŋ jaay aak nakŋ kɛn gaabm ese tɛɗ se, naaɗe paac maakɗe tuju ɔɔ ɓaa taaɗ taar se mɛlɗe ki. 32Gɔtn se mɛlɗe se ɔl k'daŋo gaabm ese se ɔɔ ɗeekin̰ ɔɔ: ‹Naai se debm jig eyo! Ey num naai eemum nɔɔ sum ɓo sɛɛige se, maam m'tɔɔlin̰sin̰o naatn. 33Aan gɔɔ maam m'ɛɛji doi ki se, naai kic ɛɛj do mɛɗi ki ey la!› 34Kɛn mɛlin̰ jaay maakin̰ tuj se, gaabm se naan̰ ɔk ɔlin̰ daŋgay ki taa j'an̰ ɓaa dabara bini kɔgŋ naŋ sɛɛn̰ se maak ki.» 35Gɔtn se Isa ɗeekɗen ɔɔ: «Kɛn naase jaay debm ɔŋ tɛɗ te kalɗɛ gɛnaan̰ ki te maakin̰ paac ey se, Bubum maakŋ raa ki kic an̰ tɛɗn kalɗɛ ey bin kici.»

will be added

X\