Matthieu 10

1Tɛr Isa daŋo jee mɛtin̰ kɛn sik‑kaar‑dio. Naan̰ ɛɗɗen tɔɔgɔ gɛn tuur sitange ro jeege tu ɔɔ gɛn kɛɗn lapi jee kɔɔn̰ge tu paac ɔɔ jeegen paacn̰ kɛn kɔɔn̰ɔ tujɗenga tuju. 2Kɛn ara ɓo ro jee kaan̰ naabm Isagen sik‑kaar‑dio: kɛn deet se, Simon k'daŋin̰ Piɛr se ute gɛnaan̰ Andre; Jak ute gɛnaan̰ Jan, naaɗen di se gaan Zebedege; 3Pilip ɔɔ Bartelemi; Tɔma ɔɔ Matiye kɛn naabin̰ tɔkŋ miiri se; Jak goon Alpe ɔɔ Tade; 4Simon debm je kujn̰ naaŋin̰a ɔɔ Judas Iskariɔt, naan̰ ɓo debm utu kutn Isa se. 5Naaɗe se ɓo jee kaan̰ naabm Isagen sik‑kaar‑di kɛn naan̰ ɔlɗen naaba. Kɛn ɔlɗe kɔl se, naan̰ dɛjɗe ɔɔ taaɗɗen ɔɔ: «Ɔn̰te 'ɓaaki maakŋ naaŋge tun mɛlin̰ge Yaudge eyo ɔɔ maakŋ gɛgɛr Samarige tu se kalaŋ kic ɓo ɔn̰te 'kɛndki maak ki. 6Num 'ɓaaki gɔtn gaan Israɛlge tu, naaɗen tec aan gɔɔ baatgen iigga kiig se. 7Kɛn 'ɓaaki ɓaa ɗoob ki se 'taaɗɗeki taar Raa ɔɔki: ‹Ɓɛrɛ, maakŋ Gaar Raa se ɔɔpga gɔɔrɔ!› 8Ɛɗki lapi jee kɔɔn̰ge tu, 'durki jeegen ooyga kooyo, ɛɗki lapi jee bikiɗge tu taa roɗe 'ɗaapm tɛɗn aak bɛɛ naan Raa ki ɔɔ 'tuurki sitange ro jeege tu. Taa naase lɛ ɔŋki cɛrɛ ɗey se, naase kic ɓo ɛɗin̰ki jeege tu cɛrɛ. 9«Kɛn naase 'ɓaaki ɓaa se, ɔn̰te 'kuunki daab, pudda ey lɛ gurs maakŋ pɔs ki. 10Ɔɔ kɛn 'ɓaaki ɓaa ɗoob ki se ɔn̰te 'kuunki ɓɔɔnɔ, ɔn̰ten 'tɔski kalge di dio, saage ɔɔ ɔn̰ten 'kuunki sirɗi. Taa debm tɛɗn naaba se, bɛɛki num, j'an̰ kɛɗn kɔsin̰a. 11«Kɛn naase jaay aki kɛnd maakŋ gɛgɛr ki ey lɛ maakŋ naaŋ ki se, 'jeki debm bɛɛ kɛn asen dɔɔɗn kɔkŋ jiga. Naase iŋgki gɔtn deb kɛn ese sum bini anki kiin̰ ɓaa maak ki. 12Maakŋ ɓee kɛn jaay naase ɛndkiga maak ki se, 'tɛɗɗeki tɔɔsɛ. 13Kɛn jee maakŋ ɓee ki se jaay dɔɔɗ ɔksenga lɛ, ɔn̰ tɔɔsɛ se kiŋg te naaɗe. Num kɛn naaɗe jaay dɔɔɗ ɔksen te ey lɛ, ɔn̰ tɔɔsɛ se asen tɛrl kɔŋ gɔtin̰ ki. 14Kɛn maakŋ gɛgɛr ki ey lɛ maakŋ ɓee kɛn naase aki kɛnd maak ki jaay, naaɗe baate dɔɔɗn kɔkse se, ɔɔ baate booy taarse num, naase 'teec ɔn̰ɗenki ɓeeɗe ey lɛ maakŋ gɛgɛrɗe ɔɔ kɛn teec 'ɓaaki ɓaa se, kuɗn jɛsege tu se kic ɓo 'tupɗeki naatn. 15'Booyki bɛɛ m'asen taaɗa: ɓii kɛn Raa 'kɔjn̰ bɔɔrɔ do jeege tu se, jee maakŋ gɛgɛr kɛn ese se bɔɔr koocn̰ do naaɗe ki se aɗen tɛɗn ɔɔn̰ cir gɛn jee taa naaŋ Sɔdɔm ute gɛn Gɔmɔr!» 16«'Ɓooyki! Maam m'ɔlse aan gɔɔ baatge maakŋ k‑sogsogige tu; naɓo naase se iŋgki do mɛtɛkse ki aan gɔɔ wɔɔjge ɔɔ 'tɛɗki rose miskinge aan gɔɔ dɛɛrge. 17Ɔndki kɔndɔ, taa jeege utu asen tɔkŋ ɓaa gɔtn kɔjn̰ bɔɔrge tu, naaɗe asen tɔnd ute mɛɛjɛ maakŋ ɓeege tun Yaudge lee tusn maak ki. 18Taa maam se naaɗe asen tɔkŋ ɓaa naan magalge tu ɔɔ naan gaarin̰ge tu, taa bin se naase aki tɛɗn saaɗumge naan naaɗe ki ɔɔ naan jeege tun Yaudge ey se kici. 19Kɛn jaay j'ɔk k'ɓaansinga naan tɔɔgge tu num, gɔtn naane se ɔn̰te 'ɓeerki do taar kɛn naase aki ɓaa taaɗa ɔɔ ute raay naase aki kɔŋ jaay anki taaɗn taar se. Taa kaaɗ kɛn se, Raa ɓo asen kɛɗn taar kɛn naase aɗeki taaɗa. 20Taa taar naase aki taaɗ se, gɛn naase malin̰ge eyo, num taar se Nirl gɛn Bubse Raa ɓo asen kɔl naase aki taaɗa. 21Naan̰ kɛn se, gɛnaa utu kɔl gɛnaan̰ j'an̰ ɓaa tɔɔlɔ ɔɔ bubu kici utu kɔl goonin̰a j'an̰ ɓaa tɔɔlɔ. Gaange utu tɛrl naaga bubɗege tu ɔɔ je yoɗe. 22Taa maam se jeege paac utu asen kɔɔɗn kundu; naɓo debm jaay aayga kaamin̰ bini aanga do taar tɔɔlin̰ ki num, naan̰ se utu 'kɔŋ kaaja.» 23Kɛn jaay k'dabarse maakŋ gɛgɛr kɛn kaam kalaŋ num, aan̰ 'ɓaaki maakŋ gɛgɛr kɛn kuuyu. 'Booyki bɛɛ m'asen taaɗa: gɛgɛrgen maakŋ naaŋ Israɛl ki se, naase aɗeki lee dɔɔɗ ey sum ɓo, maam Goon Deba se m'kaan ro ki. 24«Debm lee mɛtn deb kɛn dooyin̰ se, 'kɔŋ cir debm dooyin̰ eyo; ɔɔ debm tɛɗn naaba gɔtn deb ki se, naan̰ se 'kɔŋ cir mɛlin̰ eyo. 25Anum debm lee mɛtn deb kɛn lee dooyin̰ se n̰'tɛɗ aan gɔɔ debm dooyin̰ se. Ɔɔ debm 'tɛɗ naaba gɔtn deb ki se kic lɛ, n̰'tɛɗ aan gɔɔ mɛlin̰ se. Taa debm kɛn mɛl ɓee se kic naaɗe naajin̰a ɔɔ naan̰ ɓo Belzebul, bin num mɛt kando k'naajn̰ jeegen maakŋ ɓeen̰ ki se cir gɛn naan̰ se daala!» 26«Taa naan̰ se ɓo jeege se, ɔn̰ten 'ɓeerɗeki! Taa kaaɗin̰ jaay utu 'kaan se, nakŋ paacn̰ j'ɔyin̰ga kɔy se, utu 'tooɗn tal. Ɔɔ nakŋ ɓɔrse k'jeelki mɛtin̰ ey se, j'utu j'an̰ki jeele. 27Nakŋ paacn̰ maam m'taaɗsesin̰ maakŋ nɔɔr ki se, 'ɓaa 'taaɗin̰ki jeege tu ute kaam kaaɗa. Nakŋ kɛn naase 'booyin̰ki k'taaɗsen naaŋ ki mɛtn bisege tu se 'wɔɔkin̰ki do ɓeege tu kici. 28Ɔn̰te 'ɓeerki jeege tun 'tɔɔl daa roa, ey num kɔŋ tɔɔl ko ey se; num 'ɓeerki ɓo Raa ki, naan̰ ɓo debm kɛn ɔk tɔɔgɔ kɛn tɔɔl daa rose ɔɔ tɔɔl kose maakŋ pooɗ kɛn gɛn daayum se. 29Yeelge sɛɛm sɛɛm di se k'dugin̰ ute kɔbɔrɔ kalaŋ sum ey la? Ute naan̰ se kic ɓo kɛn maakɗe ki se jaay kalaŋ 'koocn̰ naaŋ ki se kɛn Bubsen Raa tookga jaayo. 30Num gaŋ naase se bɛɛkŋ dosege kic ɓo Raa jeelin̰ kalaŋ kalaŋ. 31Bin se, ɔn̰te 'ɓeerki! Naan Raa ki se, naase se 'cirki yeelge se dɔkɔ. 32Debm jaay taaɗ naan jeege tu ɔɔ naan̰ debm maam se, maam kic m'taaɗn naan Bubum kɛn maakŋ raa ki m'ɗeekŋ m'ɔɔ: naan̰ se debm maama. 33Num debm kɛn baatum naan jeege tu se, maam kic m'utu m'an̰ baatin̰ naan Bubum kɛn maakŋ raa ki kici.» 34Isa taaɗ ɔɔ: «Ɔn̰ten 'saapki ɔɔki maam se m'ɓaano ute lapia ɓo do naaŋ ki. Maam se m'ɓaano ɓo ute lapi eyo, num m'ɓaano ute bɔɔrɔ. 35Ɗeere, maam se m'ɓaaɗo gɛn: gaaŋ goon gaaba ute bubin̰a, goon mɛnda ute kon̰a, moom mɛnda ute mɛnd goonin̰a. 36Jeegen maakŋ ɓei ki se ɓo utu 'tɛɗn jee wɔɔyige. 37«Debm jaay je bubin̰ ute kon̰ cirum maam se, naan̰ se aas te gɛn tɛɗn debm maam eyo. Ɔɔ debm jaay je goonin̰ gaaba ute goonin̰ mɛnda cirum maam se, naan̰ se aas te gɛn tɛɗn debm maam eyo. 38Ɔɔ debm jaay baate kuun kaagŋ j'ansin̰ tupm ro ki ɔɔ ɔk mɛtum ey se, naan̰ se aas te gɛn tɛɗn debm maam eyo. 39Debm jaay je kaajn̰ kon̰ se, naan̰ utu an̰ kutu, ɔɔ debm jaay ut kon̰a taa maam se, naan̰ utu an̰ kaaja.» 40«Debm jaay dɔɔɗ ɔksen naase se, aan gɔɔ naan̰ dɔɔɗ ɔkum maama ɔɔ debm dɔɔɗ ɔkum maam se lɛ, aan gɔɔ naan̰ dɔɔɗ ɔk debm kɛn ɔlumo. 41Debm kɛn jaay dɔɔɗ ɔk debm taaɗ taar teeco taar Raa ki, taa naan̰ jeelin̰ naan̰ se debm taaɗ taar teeco taar Raa ki se, naan̰ 'kɔŋ bɛɗin̰a aan gɔɔ gɛn debm taaɗ taar teeco taar Raa ki se kici. Debm jaay dɔɔɗ ɔk debm kɛn tɛɗ naka ute ɗoobin̰a, taa naan̰ jeelin̰ naan̰ debm daan ki se, naan̰ se 'kɔŋ bɛɗin̰a aan gɔɔ gɛn debm daan ki se kici. 42'Booyki bɛɛ m'asen taaɗa: maakŋ gaange tun sɛɛm sɛɛm se, debm jaay ɛɗga maan kurlu cɔkɔ deb kalaŋ ki, taa naan̰ jeelin̰ naan̰ debm maam se, debm bin se, bɛɛ naan̰ tɛɗ se 'kutn cɛr eyo, num naan̰ utu 'kɔŋ bɛɗin̰a.»

will be added

X\