Mark 13

1Kaaɗ kɛn Isa teeco teec maakŋ Ɓee Raa ki se, maakŋ jeen̰ge tun mɛtin̰ ki se, deb kalaŋ ɗeekin̰ ɔɔ: «Debm dooyje, aak tu kogen aak bɛɛ kɛn j'iin̰ ɓee se! Aak tu ɓee se j'iin̰in̰ga aak bɛɛ aak eyo!» 2Isa tɛrlin̰ ɔɔ: «Aaka, ɓee magal ɗaar aak bɛɛ bɛɛ ese se, jeege utu an̰ ru naŋ tak. Kon̰gen rɛɛs aak bɛɛ bɛɛ se, utu wɔɔkŋ kalaŋ kalaŋ ɔɔ ko tap ɓo 'kɔŋ tooɗn do naapin̰ ko ki eyo.» 3Naan̰ kɛn se, Isa ook iŋg do kɔsn ɔlib ki ɔɔ ɔl kaamin̰ aak kaam sak Ɓee Raa. Gɔtn se jee mɛtin̰ ki se, Piɛr, Jak, Jan ɔɔ Andre naaɗe se sum ɓo ute te naan̰a ɔɔ naaɗe tɔnd mɛtin̰ ɔɔ: 4«'Taaɗjen tu, nakgen se 'kaan nuŋ ki? Ɔɔ naan̰ se 'tɛɗn ɔɔ ɗi jaay ɓo naaje j'an kaakŋ jeel ro ki kɛn nakgen se jaay kaaɗin̰ 'kaan se?» 5Gɔtn se Isa baagɗen taaɗa ɔɔ: «Ɔndki kɔndɔ, ɔn̰te 'kɔn̰ki nam ɔn̰ten 'dɛrlse. 6Jeege dɛna utu aɗe ɓaa ute roma ɔɔ asen taaɗn ɔɔ: ‹Maam ɓo al‑Masi!› Ɔɔ kɛn naaɗe 'tɛɗ bin se utu 'dɛrl jeege dɛna. 7Kɛn 'booykiga jeege jaay baaga kɔɔsn maan bɔɔrge, kɛn gɔɔr utu naase lɔɓu 'dɔkɔ, anum ɓɛrɛ, ɔn̰ten 'ɓeerki. Taa nakgen se utu 'kaana, naɓo duni se 'kɔŋ naŋ ey ɓɔrtɔ. 8Jee taa naaŋ kaam kalaŋ utu kiin̰ bɔɔrɔ ute jee taa naaŋ kuuy. Taa naaŋ gaar kaam kalaŋ utu kiin̰ bɔɔrɔ te taa naaŋ gaar kɛn kuuy. Maakŋ naaŋge tun mɛtin̰ naaŋa utu 'tea ɔɔ gɔtn mɛtin̰ ɓo utu tɔɔl jeege. Aan gɔɔ mɛnd kɛn maakin̰ tuunin̰ gɛn koojo se, nakgen se kic ɓo baaga kaana num, kɛse je taaɗn ɔɔ dunia ɔɔpga gɔɔrɔ. 9Num naase jee mɛtum ki se iŋgki do mɛtɛk se ki. Taa jeege se utu asen kɔnd bɔɔrɔ ɔɔ asen ɓaa tɔnd dɛrɛŋ maakŋ ɓeege tun Yaudge lee tusn maak ki. Taa maam se naaɗe asen tɔkŋ ɓaa naan magalge tu ɔɔ naan gaarin̰ge tu. Taa bin se, naase aki tɛɗn saaɗumge naan naaɗe ki. 10Anum bɛɛki se Labar Jigan gɛn Isa al‑Masi se, j'utu j'an̰ taaɗn mɛtjil jeege tun do naaŋ ki se paac jaayo. 11Kɛn j'ɔk k'ɓaanse ɓaa gɔtn kɔjn̰ bɔɔr ki se, nirlse ɔn̰te kaay se do taar kɛn naase aki ɓaa taaɗa, taa taar kɛn naase aki ɓaa taaɗ kaaɗ kɛn se naase mala eyo, num Nirl Salal ɓo asen kɔl naase aki 'taaɗa. 12Naan̰ kɛn se gɛnaa utu kɔl gɛnaan̰ j'an̰ ɓaa tɔɔlɔ ɔɔ bubu kici utu kɔl goonin̰a j'an̰ ɓaa tɔɔlɔ. Gaange utu tɛrl naaga bubɗege tu ɔɔ je yoɗe. 13Taa maam se jeege paac utu asen kɔɔɗn kundu; naɓo debm jaay aayga kaamin̰ bini aanga do taar tɔɔlin̰ ki num, naan̰ se utu 'kɔŋ kaaja.» 14«Kaaɗin̰ utu kaan se naase utu aki kaakŋ Debm tuj deelga te gɔtin̰ se utu 'kɛnd kiŋg maakŋ Ɓee Raa ki, gɔt kɛn salal se, kɛn bɛɛki num, naan̰ kɛnd eyo. Bin num debm jaay dooy taar ese se booy n̰'ɔkin̰ jiga jaayo! Kɛn jaay aakkiga nakgen se num, ɔn̰ jee kɛn iŋg taa naaŋ Jude ki se, k'j'aan̰ j'ook maakŋ koge tu. 15Debm iŋg kiŋg do ɓeen̰ ki raan se, kɛn naan̰ bɔɔy jaay aan̰ kaan̰ se, n̰'ɔn̰te bɔɔyo gɛn tɔsn nakin̰gen maakŋ ɓeen̰ ki. 16Debm jaay maakŋ gɔtin̰ ki kic lɛ n̰'ɔn̰te tɛrlo ɓeene gɛn kuun kal magalin̰a. 17Ɓii kɛn se, mɛndgen mɛndkaamge ute ko gaangen gɛnɗege aay kaay si se, aɗen tɛɗn ɔɔn̰ aak eyo. 18Eemki Raa taa nakgen se 'kaan kaaɗn kuul ki eyo. 19Kaaɗ kɛn se jeege utu dabar dɛna ɔɔ dubar se gɔtn Raa aal dunia tap ɓo nam naam te eyo ɔɔ mɔɔtn dubar naan ki jaay 'kɔɔn̰ cir naan̰ ese se gɔtɔ. 20Num Mɛljege Raa, ɓii dubar se, naan̰ gaaŋin̰ga duuku taa jeegen naan̰ bɛɛr tɔɔɗɗe se, kɛn ɓiigen se jaay naan̰ gaaŋɗen te duuk ey num, nam kɔŋ kaaja tap ɓo gɔtɔ. 21Kaaɗ kɛn se jaay nam taaɗsenga ɔɔ: ‹'Ɓaaɗo aakki, al‑Masi utu ara!› Ey lɛ taaɗsen ɔɔ: ‹Aakki! Naan̰ utu naane!› Naase, ɔn̰ten 'tookki taarin̰a. 22'Booyki! Jeegen kɛn tɛɗ roɗe ɔɔ naaɗe ɓo al‑Masige ute jeegen tɛɗ roɗe ɔɔ naaɗe jee taaɗ taar teeco taar Raa ki se utu aɗe ɓaao. Naaɗe utu 'tɛɗn nakŋ‑kɔɔɓge ute nakgen deel doa, taa 'kaan̰ jeege dala. Ɔɔ jee kɛn Raa bɛɛr tɔɔɗɗenga tɔɔɗ se kɛn naaɗe ɔŋga ɗoobo num, aɗen kaan̰ dal kici. 23Num, naase se ɔndki kɔndɔ! Ɓɛrɛ, taar se lɛ, maam m'aalsenga kaal paac bise ki.» 24Tɛr Isa taaɗɗen daala ɔɔ: «Kɛn ɓiigen gɛn dubarge se jaay deelga num, kaaɗa se utu 'tɛɗn ilim dib ɔɔ laapa se lɛ wɔɔr eyo. 25K‑dijgen maakŋ raa ki aɗe si naaŋ ki ɔɔ nakgen ɔk tɔɔgɔ maakŋ raa ki paac se, utu 'tea. 26«Gɔtn se j'kaakŋ Goon Deba aɗe bɔɔy maakŋ gapara ki ute tɔɔgŋ Raa kɛn wɔɔr gɔtɔ kɛlɛŋ. 27Ɔɔ Goon Deba se aɗe kɔl kɔɗn Raage ɔɔ naaɗe utu 'tusn jee kɛn naan̰ bɛɛr tɔɔɗɗe, mɛtn naaŋ kɛn kaam sɔɔ, gɔtn do naaŋa iin̰ ro ki bini ɗaar ro ki ɔɔ bini gɔtn mɛtn raa ɗaar ro ki.» 28«Naase ɔndki doa te ko ba: kɛn naan̰ jaay baaga kɔɔɗn taa‑oomo ɔɔ dɔɔb kamba se, naase 'jeelki ɔkki mɛt‑kijiri aanga ɔɔ ɓara ɔɔpga gɔɔrɔ. 29Bin num naase kic ɓo, kɛn aakkiga nakgen se jaay aanga num, 'jeelki Goon Deba se, naan̰ aan ɔŋsega gɔɔr kaam‑taarse ki. 30'Booyki bɛɛ, m'asen taaɗa: jee duni ki ɓɔrse se 'kooy naŋ ey sum ɓo, nakgen se utu 'kaana. 31Maakŋ raa ute do naaŋa se utu 'deele, num taar maam se 'kɔŋ deel eyo.» 32«Num gaŋ kɛn gɛn kaaɗin̰ ute ɓiin̰ Goon Deba ano ɓaa se, nam tap ɓo jeel eyo. Kɔɗgen maakŋ raa ki kic lɛ jeel eyo, ɔɔ Goono kic ɓo, jeel eyo. Nam jeel ɓiin̰ se, gɔtɔ. Kɛn jeel se, Bubu kalin̰ ki sum. 33Ɔndki kɔndɔ, ɔn̰te 'tooɗki bia, taa kaaɗn Goon Deba aɗe ɓaa se, naase 'jeelki eyo. 34Kɛse tec aan gɔɔ debm ɓaa ɓaa mɛrtɛ. Naan̰ ɔn̰ ɓeen̰ kaam ji jee tɛɗn naabin̰ge. Naŋa kic naan̰ taaɗin̰ naabin̰ naabin̰a ɔɔ debm bɔɔbm taa ɗoobo se naan̰ taaɗin̰ ɔɔ n̰'ɔn̰te tooɗn bia. 35Iŋgki zɛɛrɛ daayum, taa naase kic ɓo 'jeelki eyo kaaɗn kɛn mɛl ɓee aɗe ɓaa se, kɛn naan̰ ɓo 'kaan tɛgɛr, daan ɓea, do‑mɛtbɛɛki, lɔ tanɔɔrin̰a. 36Ɔndki kɔnd ey num sɔm naan̰ asen kaan kɔŋ pirsil kaaɗ kɛn naase utu tooɗki tooɗ bia. 37Taar kɛn maam m'taaɗsen se, m'taaɗin̰ jeege tu paac: daayum iŋgki zɛɛrɛ.»

will be added

X\