Luc 4

1Gɔtn se Isa ɗooc te Nirl Salal se, iin̰o taa ool magal Jordan ki ɔɔ Nirl Salal se tɔɔɗ ɔlin̰ do kɔɗ‑ɓaar ki. 2Maakŋ ɓiige tun si‑sɔɔ se, Bubm sitange ɓaaɗo naamin̰a. Nɔɔrɔ katara se Isa ɔs te ɗim eyo ɔɔ kɛn ɓiigen si‑sɔɔ jaay aas se, naan̰ ɓo tɔɔlin̰a. 3Gɔtn ese se, Bubm sitange ɗeekin̰ ɔɔ: «Kɛn naai 'Goon Raa ɗeer num, 'taaɗ ko ki se ai dɛl nakŋ kɔsɔ.» 4Ɔɔ Isa tɛrlin̰ ɔɔ: «Taar se Kitap taaɗga taaɗa ɔɔ: Kɛn tɛɗ debkilimi iŋg se kɔsɔ kalin̰ ki sum eyo.» 5Tɛr Bubm sitange tɔɔɗ ɔlin̰ gɔtn raan. Gɔtn ese sum ɓo naan̰ naar taaɗin̰ taa naaŋ gaarin̰gen do naaŋ ki paac se. 6Ɔɔ Bubm sitange ɗeekin̰ ɔɔ: «Maam m'ai kɛɗn tɔɔgɔ paac ute nakgen aak bɛɛ kɛn do naaŋ ki kaam jii, taa nakgen se j'ɛɗumsin̰ga kɛɗ maam ki ɔɔ maam m'an̰ kɛɗn deb kɛn maakum jen̰a. 7Ɔɔ kɛn naai jaay 'ɓaaɗo ɛrgga naanum ki ɔɔ 'daanumga num, nakgen se paac maam m'aisin̰ kɛɗa.» 8Isa tɛrlin̰ ɔɔ: «Taa Kitap taaɗga taaɗ ɔɔ: Mɛli Raa kalaŋ tak se ɓo naai 'kɛrgŋ naanin̰ ki ɔɔ an̰ 'tɛɗn naabin̰a.» 9Tɛr Bubm sitange tɔɔɗ ɓaansin̰ maakŋ gɛgɛr kɛn Jeruzalɛm ki ɔɔ ɓaa uun ɔlin̰ do Ɓee Raa ki raan lɛŋ lɛŋ ɔɔ ɗeekin̰ ɔɔ: «Kɛn naai 'Goon Raa ɗeer num, do ɓee ki ara se iin̰ aal naaŋ ki. 10Taa Kitap se taaɗga taaɗ ɔɔ: Raa 'kund 'kulu kɔɗin̰ge tu ai bɔɔbɔ 11ɔɔ naaɗe ai caapm kɔkŋ jiɗege tu taa jɛige se 'kɔŋ rɔɔkŋ ro ko kɛn gam eyo.» 12Isa tɛrlin̰ ɔɔ: «Kitap taaɗga taaɗ ɔɔ: Ɓɛrɛ, naai se 'kɔŋ 'naam Mɛli Raa eyo.» 13Kɛn Bubm sitange naamin̰ kaam ara kaam ara jaay aas se, naan̰ iin̰ ɔn̰in̰a ɔɔ booy bini aan kaaɗ kɛn Raa mala ɔndin̰ se jaayo. 14Gɔtn se Isa ɗooc te tɔɔgŋ Nirl Salal, ɔk tɛrl ɓaa taa naaŋ Galile ki ɔɔ nookin̰ eem dɔɔɗ taa naaŋ gɔtn ese paac. 15Naan̰ lee dooyɗe maakŋ ɓeege tun kɛn Yaudge lee tus maak ki ɔɔ jeege paac tɔɔmin̰a. 16Isa tɛrl maakŋ gɛgɛr kɛn Nazarɛt gɔtn naan̰ teepmno ro ki. Kɛn ɓii sebit jaay aanga num, aan gɔɔ daayum naan̰ lee ɓaa maakŋ ɓee kɛn Yaudge lee tusn maak ki gɛn keem Raa ɗey se, naan̰ ɛnd maak ki ɔɔ ɓii kɛn se ɓo, naan̰ iin̰ ɗaara gɛn dooy Kitap naan jeege tu. 17Gɔtn se j'uun j'ɛɗin̰ Kitapm gɛn debm taaɗ taar teeco taar Raa ki kɛn k'daŋin̰ Ezayi. Naan̰ wɔrgin̰a, ɔɔ ɔŋ gɔtn kɛn k'raaŋin̰ j'ɔɔ: 18Nirl gɛn Mɛljege se, utu maakum ki, taa naan̰ bɛɛr ɔɔɗumo gɛn taaɗn Labar Jiga se jee daayge tu. Naan̰ ɔlumo taa m'taaɗn ɓulge tu se j'utu j'aɗen kɔɔɗn doɗe ɔɔ jee kaam‑tɔɔkge se utu 'kaaka ɔɔ jee kɛn j'ɔɔɗɗe yɛɛɓɗe cɛrɛ se, j'utu j'aɗen kɔɔɗn doɗe, 19ɔɔ maam m'ɓaaɗo se m'asen taaɗn ɓaar kɛn Raa tɛɗn bɛɛn̰ jeege tu kici. 20Kɛn naan̰ jaay dooy Kitap aas se, naan̰ teelin̰a, ɔɔ ɛɗin̰ gaab kɛn tɛɗn naaba gɔtn ese se ɔɔ naan̰ tɛrl iŋg gɔtin̰ ki ɔɔ jee iŋg maakŋ ɓee kɛn gɔtn ese paac ɔndin̰ kaama. 21Gɔtn se naan̰ baagɗen taaɗa ɔɔ: «'Booyki, taar Kitapm kɛn naase 'booyin̰ki jaaki se, aanga ɗoobin̰ ki.» 22Gɔtn se jeegen paacn̰ iŋg booy taarin̰ se taaɗ taargen jiga ron̰ ki ɔɔ taarin̰ nijim kɛn naan̰ taaɗɗen se, ɔkɗen taaɗ eyo. Naaɗe ɗeek ɔɔ: «Kɛse tap ɓo goon Yusup ey la?» 23Gɔtn se Isa ɗeekɗen ɔɔ: «Ɗeere, kaan̰ kaa taar kɛn jeege lee taaɗ se utu amsin̰ki tɛɗn dom ki kɛn taaɗ ɔɔ: ‹Kɛn naai jaay daptor num, aaj roi mala.› Bin se naase kic utu amki taaɗn ɔɔ: nakŋ naaje k'booy kɛn naai 'tɛɗo maakŋ gɛgɛr kɛn Kaparnayum ki se, ɓɔrse naai 'tɛɗin̰ maakŋ naaŋi ki ara kici.» 24Tɛr naan̰ taaɗɗen ɔɔ: «Ɗeere, 'booyki m'asen taaɗa: ɓii kalaŋ debm taaɗ taar teeco taar Raa ki gam j'ɔkin̰ te ɔɔn̰ maakŋ naaŋin̰ ki eyo. 25'Booyki bɛɛ m'asen taaɗa: do dɔkin̰ do Ɛli ki se, Israɛl ɔk mɛnd‑daayge dɛna ɔɔ kaaɗ kɛn se ɓaara mɔtɔ ute laapa mɛcɛ se, maane baate keeɗe ɔɔ ɓo tɔɔl tɛɗ daama maakŋ naaŋ ki. 26Num gaŋ Ɛli se, Raa ɔlin̰ te gɔtn mɛnd‑daay kɛn gam kɛn maakŋ taa naaŋ Israɛl ki se eyo; num ɔlin̰ gɔtn mɛnd‑daay kɛn iŋg maakŋ gɛgɛr kɛn k'daŋin̰ Sarepta kɛn taa naaŋ Sidɔŋ ki. 27Do dɔkin̰ do Ɛlizɛ ki kɛn debm taaɗ taar teeco taar Raa ki se kic ɓo, Israɛlge se ɔk jee bikiɗge dɛna. Naɓo maakɗe ki paac se, deb kalaŋ kic ɓo Ɛlizɛ ɛɗin̰ te lapi eyo; num gaŋ ɛɗ lapi ɓo gaab ki kalaŋ kɛn k'daŋin̰ Naaman kɛn kɔɗ Siri.» 28Kɛn jee maakŋ ɓee kɛn Yaudge lee tusn maak ki jaay booy taar kɛn naan̰ taaɗɗen se, naaɗe maakɗe taarɗe don̰ ki pirin̰. 29Aan gɔɔ gɛgɛr se lɛ do ko ki se, naaɗe iin̰ iij‑ɔkin̰ teecn̰sin̰ naatn ɔɔ ɓaansin̰ taa an̰ 'kɔtn kɔl ziri ki. 30Num gɔtn se naan̰ iik uj jiɗe ki ɔɔ but aal daanɗe ki se ɔɔ uun ɗoobin̰ ɓaa. 31Gɔtn se Isa bɔɔy ɓaa maakŋ gɛgɛr kɛn Kaparnayum kɛn taa naaŋ Galile ki. Ɓii sebit jaay aan se, naan̰ ɓaa dooy jeege. 32Jeegen booy taar kɛn naan̰ dooyɗe se ɔkɗen taaɗ eyo, taa naan̰ dooyɗen ute tɔɔgin̰ mala. 33Jee iŋg maakŋ ɓee kɛn Yaudge lee tusn maak ki gɔtn ese se, gaaba kalaŋ se ɔk kɔɔn̰ sitan. Kɛn naan̰ aak Isa se ɔɔɗ ɔɔy makɔn̰ɔ ɔɔ: 34«Waay! Naai Isan Nazarɛt. Naai tap ɓo naaje j'ɔŋ ɗi ute naai? Naai se 'ɓaaɗo gɛn kutje! Maam se m'jeeli, naai se Debm Salal kɛn Raa ɓo ɔlio.» 35Gaŋ Isa aacin̰ kaama ɔɔ: «'Ɗoa! 'Teec naatn ro gaab kɛn se!» Gɔtn se gaabm se ooc daan jeege tu ɔɔ sitan se teec naatn ron̰ ki ɔɔ tɛɗin̰ te ɗim eyo. 36Jee paacn̰ aak nakŋ se, ɓeer ɔkɗe ɔɔ lee taaɗ ute naapa ɔɔ: «Kɛse taar ɔɔ ɗi ɓo bini! Gaabm se ute tɔɔgin̰ se, naan̰ taaɗ sitange tu ɔɔ naaɗe teec aan̰a.» 37Gɔtn se nookin̰ eem dɔɔɗ taa naaŋ gɔtn ese paac. 38Kɛn Isa jaay teeco maakŋ ɓee kɛn Yaudge lee tusn maak ki se, naan̰ ɓaa ɓee Simon ki ɔɔ ɔŋ moomin̰ mɛnda se ron̰ ɔŋg kɛɗɛk kɛɗɛk. Gɔtn ese naaɗe tɔnd mɛtn Isa ɔɔ n̰'saapm don̰ ki. 39Isa ɓaaɗo no don̰ ki aac kaama kɔɔn̰ ki ɔɔ ron̰ ɔŋg kɛɗɛk se tɛrɛc urlu. Gɔtn ese sum ɓo mɛnda se naar iin̰ ɗaara ɔɔ baagɗen tɛɗn kɔsɔ. 40Kaaɗ kɛn jaay kaaɗa ɓaa ɓaa kooco se, jeege dɛna ɓaano ute jee kɔɔn̰ge napar napar gɔtn Isa ki ɔɔ naŋa naŋa kic ɓo naan̰ ɔndin̰ jin̰ don̰ ki, ɔɔ jee kɔɔn̰gen se paac ɔŋ lapia. 41Gɔtn ese kic sitange dɛna teec naatn ro jeege tu ɔɔ kɛn naaɗe teec teec se tɔɔɗ tɔɔy makɔn̰ ɔɔ: «Naai se, 'Goon Raa.» Gaŋ Isa aacɗen kaama ɔɔ j'ɔn̰te taaɗa, taa naaɗe se jeelin̰a naan̰ ɓo al‑Masi. 42Tanɔɔrin̰‑nɔɔrin̰ se, Isa iin̰ teec ɓaa do kɔɗ‑ɓaar ki gɔtɔ kaam kalaŋ. Gɔtn se jee dɛnge se iin̰ taa jen̰a ɔɔ kɛn naaɗe jaay ɔŋin̰ se, jee se je naan̰ aɗe kɔn̰ɔ eyo, num 'kɔɔpm kiŋg ute naaɗe. 43Gaŋ Isa tɛrlɗen ɔɔ: «Bɛɛki se, m'ɓaa taaɗn Labar Jigan gɛn Gaar Raa se, maakŋ gɛgɛrge tun kuuy kici. Taa naan̰ se ɓo Raa ɔlumo.» 44Isa lee taaɗ taar Raa maakŋ ɓeege tun kɛn Yaudge lee tusn maak ki kɛn taa naaŋ Jude ki se paac.

will be added

X\